EZEKIEL 32 - AMÜSÜH HÜM CL Bible (BSI)

¹ Kam thürükheak mahne, khinu thürükheak mahne ching, akhuhbe nimung, Atungpuh yu I ki arü:

² Mihtsürü tsührü, Ijip kiulongthsüpuh Pharao kurungkheak tüzhoang, tüsho api ki thaang: Nünü nü ju trükshih bolung kekhüzü khülang khechoh, tüshe nü a ketobo ching shiwüh khülang ruk ah; nünü nü yungbo ching awuhchoh, nü jingnü ke rhumüneanchoh, tüsho ayungbo rhuzhihzhihchoh.

³ Atungpuh Thrünpuhnü ha thachoh: Mihtsürü ahihdo mukhungkhi ching inü I keang nü kheak jipkihbah; tüsho inü I keang ching nü phudoa lubah.

⁴ Inü nü alo kheak bahbah, mükeak ching inü nü jiba bahbah, tüsho thüning wuhnubo alala nü kheak keamshihbah, tüsho inü lomi alala shiwühbonü nü tsühshihbah.

⁵ Inü nü shih müzüngbo kheak hiukihbah, tüsho nü asheminü jindükhün mishihbah.

⁶ Inü lomi ju nü thiyih bukkhinü müzüngbo khiungde chimkhitshihbah, tüsho keyungbo nünü amibah.

⁷ Küyimki inü nü thsümünimba, inü thüningbo lüpdobah, tüsho chiningbo mitingshihbah; inü amonü ani khüpdobah, tüsho khinunü nihbuh ayin müjih.

⁸ Thüningbo ayinatrüm alala inü nü kurungkheak mitingshihbah, tüsho nü lomi kheak amiting yukjihbah, Atungpuh Thrünpuhnü thachoh.

⁹ Inü nü trükshih bolung nünü mümükheahkhi lomibo ching thsümünimchoki inü mihtsürü ahihdo mulong küpkhukshihbah.

¹⁰ Inü mihtsürü ahihdo nü kheak müyinsahshihbah; arü kiulongthsürübo nü dünkheaknü ajanbah. Küyimki inü arü miki I nukshang phürapbanü, arü mihbüm abannü nihbuh rhangdung thsungkheak kim abande nü keam nimung ajanbah.

¹¹ Tümüde Atungpuh Thrünpuhnü ha thachoh: Babilon kiulongthsüpuh nukshang nü kheak arübah.

¹² Inü nü mihtsürü boto ju athrungrü nukshangbonü akeamshihbah, arü alala trükshih bolung khide atrebe lah. Arünü Ijip kükheangkhi thsümünimbah, tüsho mihbo alala dükheakbah.

¹³ Inü ke suhdahkhi mungyeannü nü shiwüh alala thsümünimbah; tüsho mihtsürü jingnü arü küpkhuk müjihlo, yungsho moshi biuobonü jurü müthrüm.

¹⁴ Judüki inü kebo müsühde akamshihbah, tüsho yungzübo müdangke nangde abukshihbah, Atungpuh Thrünpuhnü thachoh.

¹⁵ Küyimki inü Ijip zhikrangkhündo kamshihba tüsho lomi chingnü lüpdükhi phüta bahba, küyimki inü ju ching larü alala kingmülünba, judüki arünü I Atungpuh de mükheahbah.

¹⁶ Ha tüzhokhi lah; ha khün thsübah. Trükshih liberübonü ha khün thsübah. Ijip tüsho mihbo alala kurungkheak arünü athsübah, Atungpuh Thrünpuhnü thachoh.

¹⁷ Kam thürükheak mahne, akhuhbe khinu, thürükheak phüngü nimung, Atungpuh yu I ki arü:

¹⁸ Mihtsürü tsührü, Ijip mihbo kurungkheak tüzhoang, tüsho wulakhi trükshihbo kilim Ashe-lomi ching yüzahshang.

¹⁹ Arü ki thaang, “Püpürü kheaknü nüsa atsübe de lümcho de? Yüzahang tüsho tsütamübahrü lung yapang!”

²⁰ Arübo nukshangnü alaksahrü bolung keambah. Ijip ju nukshang kilim jihdo; ha le mihbo chido hande tsoshang.

²¹ Ashe-lomi ching wuto limberübonü Ijip tüsho amüshiprü dünkheak thabah, “Arü azahdo tüsho nukshangnü alaksahkhi tsütamübahrü lung yaplah.”

²² Ju ching bonungrü bede Asiria lah; nukshangnü akeamshihkhi kiuyukbonü anihbe mükamdolah.

²³ Arü kiuyukbo ju alokhün asük ching lah tüsho anihbe kiuyuk mükamde bonungrü, rhangdung lapung lomi ching mihtrebe bushihrü alala nukshangnü laksah-a yapshihlah.

²⁴ Elam ju ching lah, tüsho mihbonü akiuyuk mükamdolah; arü alala nukshangnü laksah-a yapshihlah. Rhangdung lapung lomi ching atrebe bushihrü alala tsütamübahde Ashe-lomi ching yüzahdo. Arübo alokhün ching yüzahrü lung achih ngüde lah.

²⁵ Arünü Elam ju alaksahkhi bolung yapshihlah, anihbe bonungrü kiuyukbo api mükamde lah, arü alala tsütamübah, nukshangnü alaksahkhi lah; tümüde rhangdung lapung lomi ching arü trekhi bua lakheah, tüsho alokhün ching yüzahrü lung arünü achih ngüde lah; arübo alaksahkhi bolung zolah.

²⁶ Meshek tüsho Tubal ju ching lah, tüsho arü boto alala, arü kiuyukbo alala mükamde lah, arü alala tsütamübah, nukshangnü alaksahkhi lah; tümüde arünü rhangdung lapung lomi ching atrebe bushih.

²⁷ Tüsho arübo adüso athrungrü bolung müyap, sherü thirithsü thsühnuk bede Ashe-lomi ching yüzah, sherü nukshangbo arü kubo khüp zola, tüsho sherü tsungbo arü robo kheak la; tümüde athrungrübo trekhi rhangdung lapung lomi ching lakheah.

²⁸ Junangde nü nukshangnü alaksahkhi tsütamübahrü lung nü thsümünimbah tüsho ayapbah.

²⁹ Edom ju ching lah, kiulongthsürübo tüsho yakzanshuhrü alala, arü wu lalashe nukshangnü alaksahrü lung yaplah; arübo tsütamübahrü alokhün ching yüzahrü lung yaplah.

³⁰ Dukulim yakzanshuhrübo ju ching lah, arü alala tüsho Sidonrü alala arü wunü atreshihkhi dünkheak achih ngüde alaksahkhi lung yaplah; arübo tsühamübahde nukshangnü alaksahrü lung yaplah, tüsho alokhün ching yüzahrü lung achih ngüde lah.

³¹ Küyimki Pharao tüsho api bonungrünü nukshangnü alaksahkhi mihbo ngübanü api mulong shukheambah, Atungpuh Thrünpuhnü thachoh.

³² Tümüde apinü rhangdung lapung lomi ching atrebe bushih; jumonü nukshangnü alaksahkhi tsütamübahrü bolung Pharao tüsho api bonungrü boto alala sühakhimde ayapbah, Atungpuh Thrünpuhnü thachoh.