EZEKIEL 27 - AMÜSÜH HÜM CL Bible (BSI)

Tair thsungkheak Tüzhokhi

¹ Atungpuh yu I ki arü:

² Mihtsürü tsührü, kheakü nünü Tair kurungkheak tüzhoang,

³ tüsho keto yüzahpung lakhi Tair ki, keyean lo ahihdo yinzüyindo mihtsürü ki thaang, Atungpuh Thrünpuhnü ha thachoh: O Tair, nünü thado, “ I jak tsüpü ching khiukdahlah.”

⁴ Nü aredungbo ketobo phulung ching lah; nü thrünrübonü nü jaktsü khiukdahde kamshih.

⁵ Arünü nü yo tsün sangbeakbo alala Senir chingnü thsü; arünü cedar nü thsungkheak sangkung shungdung thsüpü Lebanon chingnü lu.

⁶ Bashan thülamsangbonü arünü nü sangkung-bebe thsü; arünü Saipra keyeannü nü sangkung dampü tsünsangbonü thsotohü lakyukde thsü.

⁷ Nü sangkung khim ju Ijip chingnü atsüdak yakkhokhi khim zhingzhing, nü yo amütsan riphin lakheah; nü yo ayinripit tüsho ripit phudobe ju Elisha keyean chingnü biyi tüsho amüwa lakheah.

⁸ Sidon tüsho Arvad ching larü ju nü sangkung berü lakheah; Zemer ayeanzo mihtsürübo nü lung lakheah, arübo nü berü lakheah.

⁹ Gebal azothsürübo tüsho lümlung larü nü sangkung trükhi müjimdode nü lung lakheah; keto sangkungbo alala aberü bede nü kukruk yinzüyindopü nü lung lakheah.

¹⁰ Persia, Lydia tüsho Libya amüzhak thirithsürübo nü bonungrü lakheah; arünü tsung tüsho yinchikuthran nü kheak wuh-a zo; arünü nü kilim mungthu jih.

¹¹ Arvad tüsho Helek mihtsürü nü chipibo mükamde lakheah; Gamad mihtsürü nü yo aheangsadambo kheak lakheah. Arünü arü tsungbo nü chipibo mükamde wuh-a zo; arünü nü jaktsü khiukdahde kamshih.

¹² Tarshishnü nü lakhit ato suhdahkhi ching shothsümolodo; shotoyinchi, yinchi, yinchi-apü, tüsho yinchithünak nü kukruk dün müthriachih.

¹³ Javan, Tubal, tüsho Mesheknü nü lung shothsümolodo; arünü nü thsungkheak yinzüyindopü azhorü tüsho müwayinchi phühlungbo müthriachih.

¹⁴ Nü kukruk shothsümolopü thsungkheaknü Beth-togarma mihtsürübo nü rhimobe khorabo, thirithsü khorabo tüsho khoranunubo müthriachih.

¹⁵ Rhodiarünü nü lung yinzüyindo; keyean lobo ahihdo büthsüde nü yinzüyindopung lakheah; arünü nü kilim thsotorü tüsho sangrobo handarü jih.

¹⁶ Nü kukrukbo suhdahkhi hode Sirianü nü lung yinzüyindo; arünü shothsümolopü phüyakmuchu-lung, mürümmuchulung, akeakkhi rhimo atsüdak khimthünak, muliuke-lung, tüsho shotomürüm-lungbo müthriachih.

¹⁷ Juda tüsho Israel lominü nü lung yinzüyindo; wheat hi, minnith, danji, mukhuke, müdangke, tüsho molikenü nü kukrukbo müthriachih.

¹⁸ Damaskanü nü kukruk suhdahkhinü nü lung–tümütüsho mungji aban nü lakhit ato dünkheaknü– Helbon yukhu tüsho shihnamkhimnü shothsümolo.

¹⁹ Uzal chingnü Vedan tüsho Javannü nü ki shothsümolopü azah; kingarih-yinchi, kassia sang tüsho niungyinü müthriachih.

²⁰ Dedannü nü lung khora kheak binpü thsungkheak khora-düthsün-khimbo shothsümolopü nü lung azah.

²¹ Arabia tüsho Kedar yakzanshuhrü alala nünü mulongkhi namfimihnubo, namfimihnupung, tüsho mihnubo yinrü lakheah; harü ching arünü nü lung yinzüyindo.

²² Sheba tüsho Raama shothsümolorünü nü lung yinzüyindo; arünü nü ki rhümthüneabe mungji alala, tüsho shoto lungbo alala tüsho suna müthriachihde shothsümolo.

²³ Haran, Kanne, Eden, Sheba shothsümolorü, Asshur, tüsho Kilmadnü nü lung shothsümolo.

²⁴ Harünü nü lung amokhit-khimmihbo, biyi khim tüsho yakkhokhi rhimo le akhimbe kukruk, shungliubonü rhük tüsho yihdobah shothsümolo; harü ching arünü nü lung shothsümolo.

²⁵ Tarshish sangkungbo nü shothsümolo thsungkheak ahanbe lakheah. Junangde nü a ketobo phulung ching mia lakheah tüsho hah mülangde lakheah.

²⁶ Nü sangkung berübonü nü ketobo asük ching bedarü. Aniakhiuklim pungnü nü keto phulung ching yünphülap.

²⁷ Nü lakhitbo, nü kukruk yinbebo, yinzüyindobebo, keto ching tsahrübo tüsho sangkung berübo, sangkung müjimdorübo, shothsümolo ching yinrübo, tüsho nü lung thirithsürü alala nü lung boto alala nü thsümünim nimung ketobo phulung ching yüzah.

²⁸ Nü sangkung berü zhikhi düsheaknü lomibo ajanchoh,

²⁹ tüsho arü sangkungbo chingnü sangkung-bebe shuhrü alala arüchoh. Keto-hantsahrü tüsho sangkung berü alala kemungyean zhiplah,

³⁰ tüsho nü kurungkheak tüzhochoh tüsho düsüknimde tripchoh. Arünü arü kubo kheak asungthulung kamkihchoh tüsho awahbo ching awuhchoh;

³¹ arünü nü thsungkheak arü zangrü ku hütrakrakchoh, tüsho shungliukhim phuyuchoh, tüsho arü me khühkhi ching nü dünkheak tüzhode tripchoh.

³² Arünü nü thsungkheak tüzhochoh: Keto phulung ching Tair nangde küpü kiuto thsümünimkhea?

³³ Küyimki nü kukruk yinbebo ketobo chingnü arükhea, nünü mihtsürü ahihdo reangkeamshih; suhdahkhi nü lakhit tüsho shothsümolonü nünü lomi kiulongthsürübo lakhitshih.

³⁴ Kheakü ketobo ching thsümünima lah, ke asükbo ching; nü shothsümolorü tüsho rhimorü alala nü lung keamyukdo.

³⁵ Keyean lomi ching larübo alalanü nü kheak müyinsahchoh; tüsho arü kiulongthsürübo müyinnima lah, arü mirobo ching atrekhi lah.

³⁶ Mihtsürü bolung shothsümolorünü nü kheak ish thsüchoh; nü a mihtrebe kamdo tüsho lünnü mülalo.