EZEKIEL 24 - AMÜSÜH HÜM CL Bible (BSI)

Dükihthüra Phüh

¹ Kam tuku, khinu thürü, nimung thürü nipü, Atungpuh yu I ki arü:

² Mihtsürü tsührü, khihni nimung ha thrütang. Ha nimung Babilon kiulongthsüpuhnü Jirusalem yankheah.

³ Tüsho azhih yamkhün ki mihmüchit thakhitang tüsho arü ki thaang, Atungpuh Thrünpuhnü ha thachoh: Phüh dükihang, dükihang, ju ching ke she yukang;

⁴ ju ching shih khapkhi atsübo apho tüsho adubuh yukang; ju ching arobo yukang.

⁵ Namfimihnu bolung amokhitkhi luang, ju khüp sang rhungkihang; ju amapshang tüsho ju ching arobo khiungang.

⁶ Jumonü Atungpuh Thrünpuhnü ha thachoh: Thiyih bukkhi kiuto are, phüh ching thrung zahlah, ju chingnü thrung muwukhiuk! Shihtsan khülang khülangnü yihkhitchoh tüsho khülang she maning.

⁷ Tümüde ju ching thiyih zahlah; anihbenü ju lung kheak yihkih; alonü alüpdopü thsüde anihbenü alo kheak mubukkhit.

⁸ I mulong zhipzhipshihpü, royimshihpü anihbenü abukkhi thiyih inü lung kheak yihkih, junangde ju müyihdo.

⁹ Jumonü Atungpuh Thrünpuhnü ha thachoh: Thiyih bukkhi kiuto are! Inü sang rhungkihkhi she ato kamshihbah.

¹⁰ Sangthulungbo rhungkihang, mo takkihang; shih tsüde khiungang, rhümthüneabebo ching düsahang, arobo takshang.

¹¹ Mokhih kheak ju akeangkeang phüh duboang, junangde ha takde akambah, shotolung lamlam kamchoh, ju ching aneak niuchoh, thrungbo tsühabahchoh.

¹² Akeangkeang ching I khido; monü she thrung akheah mutsoshih.

¹³ Tütüshe küyimki inü nü makhamaleak münean chingnü müsühkhea, amünean chingnü nü müsühde mükam; nü kheak I reangkeamde bukmakhiukyi khiungde nü müsühde mükamlo.

¹⁴ I Atungpuhnü asukdo; kim arüchoh, inü rhimobah. Inü mutsomuwuh, inü maningshih, inü mülümalo. Nü limrobo tüsho nü rhimobo yande inü nü mahkhapbah, Atungpuh Thrünpuhnü thachoh.

Ezekiel Niube Shekhi

¹⁵ Atungpuh yu I ki arü:

¹⁶ Mihtsürü tsührü, khülang ki damkhinü inü nü mük ki asühbe lude atsopü lah; tütüshe nünü mimütrip yungsho mütrip, yungsho nü chikebo mubukkhi.

¹⁷ Mükhihde düsüknimang; asherü thsungkheak midütrip. Nü kuhingbe hingang, tüsho nü jingbo ching jingkhümpübo yukang; nü münküp achangbe düyihdo yungsho mahmi-jimpung dütsüh.

¹⁸ Jumonü inü yapsulim mihtsürübo ki asuk, tüsho arelim I niube sheabah. Tüsho ashido yapsu I ki thiyukhüm jihkhi nangde inü rhimo.

¹⁹ Judüki mihtsürübonü I ki tha, “ Nünü hade arhimokhi ha isa thsungkheak tümü amütsananü nünü isa ki müthaba de?”

²⁰ Jushu inü arü ki tha: Atungpuh yu I ki arü:

²¹ Israel yamkhün ki thaang, Atungpuh Thrünpuhnü ha thachoh: Inü nüsanü lülüshishikhi, nüsa mükbo asühkhi, tüsho nüsa mulongnü akünkhi I yo arüngyam müneanbah; tüsho nüsanü aninga lashihkhi nüsa tsührübo le tsührübebo nukshangnü akeambah.

²² Tüsho inü rhimokhi nangde nüsanü arhimobah; nüsanü nüsa münküp achangbe düyihdo yungsho mahmi-jimpung dütsüh.

²³ Kuhingbebo nüsa kubo kheak labah tüsho jingkhümpübo nüsa jing kheak labah; nüsanü mimütrip yungsho mütrip, tüshe nüsa mülimkhibo ching nüsa sühkeakeabah tüsho khülangnü khülang ki ashearabah.

²⁴ Hanangde Ezekiel ju nüsa ki amütsan khülang labah; apinü arhimokhi nangde nüsanü arhimobah. Küyimki ha arübanü, I Atungpuh T H RÜ NPU H de nüsanü mükheahbah.

²⁵ Tüsho mihtsürü tsührü, küyimki inü arü kheaknü arü chipibo, arü asühachih tüsho müretah, arü mük asühkhi tüsho arü mulong amuzho, tüsho arü tsührübo le tsührübebo she lukhambanü,

²⁶ ju nimung atsokhitbuh khülangnü thiyusheakbo jihpü nü ki arübah.

²⁷ Ju nimung atsokhitbuh ki nü mün khimshuhbah, tüsho nünü asukbah tüsho zhikde müla. Junangde nü arü ki amütsan khülang labah; tüsho I Atungpuh de arünü mükheahbah.