EZEKIEL 20 - AMÜSÜH HÜM CL Bible (BSI)

Azhih Israel

¹ Kam thüne, khinu phüngü, nimung thürü nipü, Israel azothsürü khürü Atungpuh ki keokhikeorapü arü, tüsho arübo I miki bin.

² Judüki Atungpuh yu I ki arü:

³ Mihtsürü tsührü, Israel azothsürü ki asukang tüsho arü ki thaang, Wuto Atungpuhnü thachoh: Nüsa I keokhikeorapü arükhea de? Tsükjide I lale, nüsa I mükeokhishih, Wuto Atungpuhnü thachoh.

⁴ Nünü arü mahkhapba shi? Nünü arü mahkhapba shi, mihtsürü tsührü? Dale tüsho arü buhrünü athraneanbe rhimokhibo arü ki mükheahshang,

⁵ tüsho arü ki thaang: Wuto Atungpuhnü ha thachoh: Inü Israel mokhit nimung, inü I khah shuhkihde Jakob yamkhün tsühsoniuso ki thiyuchihchim thsü tüsho Ijip ching arü ki I akhiuka huh. I khah shuhkihde inü arü ki tha, “ I Atungpuh nüsa Thrünpuh.”

⁶ Ju nimung inü arü ki Ijip chingnü arü thsungkheak yimkhitkhi niuhke tüsho mukhuke bukkhi lomi, alala kheaknü khide akhamkhi lomi ching bekhitpü arü ki thiyuchihchim thsü.

⁷ Tüsho inü arü ki tha, “ Nüsa mihbüm abannü nüsa mük ki lakhi athraneanbe mejakbo yihkhita bahang, tüsho Ijip sangthsü kheak nü dümünean. I Atungpuh nüsa Thrünpuh.”

⁸ Tüshe arünü I azhih tüsho I ki mani; arü mük ki lakhi athraneanbe mejakbo arünü yihkhita mübah, yungsho arünü Ijip sangthsübo mübahyuk. Jumonü I mulong zhipzhip arü kheak dungkihpü tüsho Ijip ching arü kheak I bukakhiukpü inü tha.

⁹ Tüshe I mung chingnü arü lapung trükshihbo miki mümüneanpü inü rhimo tüsho arü mikinü Israelrü Ijip chingnü bekhitde I akhiuka huh.

¹⁰ Jumonü inü arübo Ijip chingnü bekhit tüsho sunglo ching beyuk.

¹¹ Inü arü kilim I yakzan thsükhibo jih tüsho I yakzanbo arü ki mükheahshih, tümüde jurü mihyu anikhi hode mihbüm aban alabah.

¹² Kheaküshe isa dükeak amütsan thsüde arü kilim I yo amunibo jih, junangde I Atungpuhnü jurü müsühkhitdo de arünü mükheah.

¹³ Tütüshe Israel mihtsürünü sunglo ching I azhih. Mihtsürünü mihyuanibah rhangdung lapü lalashe, arünü I yakzan thsükhibo müyan tüshe I yakzanbo bahyuk tüsho arünü shahde I amunibo müneanjih. Jumonü inü arü kheak I bukakhiuk dungkihbah tüsho sunglo ching arü dükheakshihbah de inü tha.

¹⁴ Tüshe I mung chingnü rhimode trükshihbo miki mümüneanshihpü inü arü mikinü inü arübo bekhit.

¹⁵ Kheaküshe inü arü kilim jihkhi lomi, niuhke tüsho mukhuke bukkhi lomi, khide akhamkhi lomi ching bede marüpü arü ki inü sunglo ching thiyuchihchim thsü,

¹⁶ tümütüsho arünü I yakzanbo bahyuk tüsho I yakzan thsükhibo müyan tüsho I amunibo müneanjih; tümüde arü mulong arü sangthsübo dunglim yü.

¹⁷ Tütüshe inü arü ki muzhode kheah tüsho arü müdükheakshih yungsho sunglo ching arü mükheamshih.

¹⁸ Inü sunglo ching arü tsührübo ki tha, “ Nüsa bebuhrü yuzüngbo düyan yungsho arü yakzanbo düzo yungsho arü sangthsübo kheaknü nüsa müneana dulu.

¹⁹ I Atungpuh nüsa Thrünpuh; I yakzan thsükhibo yanang tüsho I yakzanbo zopü kümkangang.

²⁰ I amunibo müsühde zoang, junangde jurübo isa dükeak amütsan khülang labah. Judüki I Atungpuh nüsa Thrünpuh de nüsanü mükheahbah.”

²¹ Tüshe tsührübonü I azhih: Arünü I yakzan thsükhibo müyan, mihtsürünü mihyu anibah rhangdung lapü lalashe arünü I yakzanbo zopü mükümkang, tüsho I amunibo müneanjih. Jumonü sunglo ching arü kheak I bukakhiuk dungkihpü tüsho arü azhihde bukakhiukpü inü tha.

²² Tüshe inü I khah tuklo, tüsho I mung chingnü arü mikinü arü bekhitkhi trükshihbo miki mümüneanshihpü inü rhimo.

²³ Kheaküshe arü trükshih bolung müzütpü tüsho lomibo ching hiumüzütpü sunglo ching I khah shuhkihde arü ki thiyuchihchim thsü,

²⁴ tümütüsho arünü I yakzanbo mani tüshe I yakzan thsükhibo bahyuk tüsho I amunibo müneanjih, tüsho arü bebuhrü sangthsübo kheak arü mük kheahkih-a lakheah.

²⁵ Kheaküshe amütsü thiyuzüngbo tüsho arü mülakhukbe yakzanbo inü arü kilim jih;

²⁶ inü arü treshihpü thsüde, arü akhuh zübekhi thsambahbo jihkhi hode inü arü müneanjih, junangde I Atungpuh de arünü mükheahbah.

²⁷ Jumonü, mihtsürü tsührü, Israel mihtsürü ki asukang tüsho arü ki thaang, Wuto Atungpuhnü ha thachoh: Ha ching she nüsa bebuhrünü I bahyukde mükhemükim yu thado:

²⁸ Küyimki inü arü kilim jihpü alokhikhi lomi ching arü bedarükhea tüsho arünü awung achang yungsho ayüniuniu sangdung ngükhea, ju ching arünü laksah-a kingaün, I bukakhiukpü thsüde kingaün jih, arü yo arhümthüneabebo jih tüsho arü yo ayungbe kingaünbo dungabah.

²⁹ Judüki inü arü ki tha: Nüsa yüpung achang dangpung ha tümü a? (Ha khihni Bamah de jichoh.)

Mahkhap tüsho Lalokhi

³⁰ Jumonü Israel yamkhün ki thaang: Wuto Atungpuhnü ha thachoh: Nüsa bebuhrünü arhimokhi yande nüsa müneana luba de tüsho arü yo sheak mülakhi mejak dunglim mulong jihba de?

³¹ Küyimki nüsanü nüsa tsührübo mo ching shuhmülanga jihde nüsa thsambah jihbanü, nüsanü khihni khiungde nüsa yo sangthsübo alala kheaknü müneanchoh. Inü nüsa ki I keokhishihba de, O Israel yamkhün? Tsükjide I lale, Wuto Atungpuhnü ha thachoh, Inü nüsa ki I mükeokhishih.

³² Nüsanü thachoh, “ Isanü trükshihbo nangde, sang tüsho lung tankihrü lomi mihtsürübo nangde lanelah.” Tüshe nüsa lüm ching tümü lanü müdünji.

³³ Tsükjide I lale, Wuto Atungpuhnü thachoh, Inü nüsa kurungkheak wuto khah tüsho achungkhitkhi bin tüsho mulong zhipzhip yakzan shuhbah.

³⁴ Inü wuto khah, achungkhitkhi khah, tüsho bukakhiukde nüsa müzütshihpung mihtsürü chingnü bekhitbah tüsho lomibo chingnü bemukhungbah;

³⁵ inü nüsa trükshihbo sunglo ching bedarübah tüsho ju ching mironü miro, nüsa kheak inü mahkhapbah.

³⁶ Inü nüsa mahkhapbah, Wuto Atungpuhnü thachoh.

³⁷ Inü nüsa I tso khüp hosihbah tüsho tangzüngkhi ching inü nüsa hanyukbah.

³⁸ Nüsa I azhihrü inü müsühkhitbah. Arü lakhi chingnü inü arübo bekhitkhit she, arübo Israel lomi ching müyüzah. Judüki I Atungpuh de nüsanü mükheahbah.

³⁹ Nü thsungkheaknü, O Israel yamkhün, Wuto Atungpuhnü ha thachoh: Nüsa mihbüm abannü yüang tüsho nüsa sangthsübo tankihang! Tüshe ju dunglim tsükjide nüsanü I ki anibah tüsho kheaküa nüsa thsambahbo le nüsa sangthsübonü I mung amüsüh mümüneanjih.

⁴⁰ Tümüde I yo amüsüh müzüng, Israel müzüng kheak, Wuto Atungpuhnü thachoh, ju lomi ching Israel yamkhün lüpdükhinü I tankihbah, tüsho ju ching inü arübo leangkhibah. Ju ching inü nüsa kingaünbo tüsho amokhitkhi nüsa thsambahbo, nüsa yo amüsüh shuhmülanga jihkhi bede yihnüpü labah.

⁴¹ Inü nüsa trükshihbo chingnü bekhitchoki tüsho nüsa hiumüzütpung lomi chingnü bemukhungchoki rhümthüneabe nangde nüsa leangkhibah, tüsho trükshih miki nüsa bolung I amüsüh huhbah.

⁴² Inü nüsa bebuhrü jihpü khah shuhkihde thiyuchihchimkhi Israel lomi ching bedarüchoki I Atungpuh de nüsanü mükheahbah.

⁴³ Ju ching nüsanü nüsa rhimorhiyi tüsho nüsa küdah thsüde müneankhi rhimobo lümkhitbah, tüsho nüsanü arhimokhi amütsü alalanü nüsa mukhiukbah.

⁴⁴ Küyimki inü I mung chingnü nüsa ki rhimorhiyibo tüsho nüsa amütsü limrobo tüsho athsümünim rhimobo yande mürhimobanü, I Atungpuh de nüsanü mükheahbah, O Israel yamkhün, Wuto Atungpuhnü thachoh.

Düjinglim azhihde Müchitkhi

⁴⁵ Atungpuh yu I ki arü:

⁴⁶ Mihtsürü tsührü, nü miro düjinglim abinang; düjinglim azhihde thsangyuthsangraang tüsho düjinglim murung azhihde müchitang.

⁴⁷ Düjinglim murung ki thaang: Atungpuh yu soang. Wuto Atungpuhnü ha thachoh: Inü nü kilim mo thsahkihpü lah, tüsho junü nü sangdungbo alala aphüyak tüsho akung chido aniubah. Mo trukhi mükheamde alabah, tüsho mihbüm aban miro düjinglimnü dukulim khiungde takreapreapa labah.

⁴⁸ Ha I Atungpuhnü atakkihkheah de mihbüm abannü mükheahbah; ha müyihmüt.

⁴⁹ Judüki inü tha, “Ah, Wuto Atungpuh ! Arünü I dünkheak thachoh, ‘ Apinü shihdanglimyu thachoh yung de?’ ”