EZEKIEL 19 - AMÜSÜH HÜM CL Bible (BSI)

Israel Yakzanshuhrü thsungkheak Tüzhokhi

¹ Israel yakzanshuhrü thsungkheak tüzhopü tankihang,

² tüsho thaang: Küdükhüh she kekhüzü bolung nü be ju kekhüzü dreto lakhea! Anihbenü kekhüzübo lung yap tüsho anihbe nunubo mütrü.

³ Anihbenü anunu bolung khülang mütrümusu tüsho api sühmüh lakhi kekhüzü kam. Apinü shih rampü mükheah tüsho mihtsürübo tsüh.

⁴ Trükshihbonü api dünkheak so, tüsho arü müthrim ching api phuh. Arünü api khoyangnü wuka Ijip lomi lim bede yü.

⁵ Küyimki anihbenü mulonglamkhi mukukde angükhea, anihbe mükkin tsoabah, anihbenü anunu püpü lu tüsho api sühmüh lakhi kekhüzü kamshih.

⁶ Apinü kekhüzü bolung jimchoh, tümüde api kheakü kekhüzü athunu lakheah. Apinü shih rampü mükheah tüsho apinü mihtsürü tsüh.

⁷ Apinü arü chipibo yihkheam tüsho arü kiutobo thsümünim. Lomi tüsho ju ching larü alalanü api arungkhi sobah müyinsah.

⁸ Judüki trükshihbonü api azhihde mühide alakhi kewungbo chingnü arü. Arünü api thsungkheak keang phua zojih tüsho arü müthrim ching api phuh.

⁹ Arünü khoyangnü api thoa lubah chirhang ching yuk tüsho Babilon kiulongthsüpuh kilim api bedarü. Arünü api rihyam ching yuk, jumonü api arungkhi Israel müzüngbo kheak musodebah. @1- L I N E- SP AC E=

¹⁰ Nü be ju nü yo kurungasolu ching kurungaso khülang ke ching khimkhi nangde lah; Ke suhdahkhi hode aso aso tüsho akhahbo mide la.

¹¹ Akhahbo ju yakzanshuhrü tso thsüpü khiukde düküngde alakheah. Ha akhah hihkhi kumung changde yükih, achangkhi tüsho ayü niuniukhi anihbe kheak ngü.

¹² Tüshe ju bukmüshakkhi ching rukkhit tüsho alo ching bah. Aniakhiuklim pungnü aso ju yünmukuhabah, akhah adüküngbo yünshaka sheshih tüsho monü aniuabah.

¹³ Kheakü ha sunglo ching, akunglo tüsho anikio lo ching khim.

¹⁴ Akhah dungto khülang chingnü mo akhiuk tüsho aso aniuabah. Jumonü akhah adüküng yakzanshuhrü tso thsüpü khiukde ju kheak maning. Ha tüzhokhi khülang tüsho tüzhopü kamabah.