EZEKIEL 11 - AMÜSÜH HÜM CL Bible (BSI)

Israel Limberübo kheak Mahkhap

¹ Judüki menü I shuhkih tüsho aniakhiuklim abinkhi A TU N GPU H yam chipiripit ching bedarü. Chipiripit limro kheak ju mihtsürü 25 lakheah tüsho arü bolung inü mihtsürübo limberü Azzur tsührü Jaazania tüsho Benaia tsührü Pelatia ngü.

² Atungpuhnü I ki tha, “Mihtsürü tsührü, harü mihtsürü ha lümkhi amütsü thsürübo tüsho ha kiuto ching mihbukmuyuk athsunganah jihchoh.

³ Arünü thachoh, ‘ Isanü nahde thüyambo thsülobah; ha kiuto ju phüh, tüsho isa ju shih ah.’

⁴ Jumonü arü azhihde müchitang; müchitang, mihtsürü tsührü.”

⁵ Judüki Atungpuh me I kheak arü, tüsho athashihpü apinü I ki tha: “Atungpuhnü athakhi ju ha: Nünü ha thachoh, O Israel yamkhün, tüshe nü lüm ching tümü lanü inü mükheahlah.

⁶ Nünü ha kiuto ching mihtsürü ahihdo laksah tüsho kiudunglimrobo asheminü mishih.

⁷ Jumonü Wuto Atungpuhnü ha thachoh: Nünü abahkhi pangbo ju shih tüsho ha kiuto ju phüh, tüshe inü ju chingnü nü yankhitbah.

⁸ Nünü nukshang trechoh, tüsho nü azhihde inü nukshang handarübah, Wuto Atungpuhnü thachoh.

⁹ Inü kiuto chingnü nü yankhitbah tüsho khiungkerü khah ching nü yukjihbah tüsho nü kheak mahkhapbah.

¹⁰ Nukshangnü nü keambah, tüsho Israel aredung kheak inü nü kheak mahkhapbah. Judüki I Atungpuh de nünü mükheahbah.

¹¹ Nü thsungkheaknü ha kiuto phüh khülang müthsü, yungsho ju ching nü shih müthsü; Israel aredung kheak inü nü kheak mahkhapbah.

¹² Tüsho I Atungpuh de nünü mükheahbah, tümüde nünü I yakzan thsükhibo müyan yungsho I yakzanbo muzo tüshe nü mühi trükshih yuzüngbo kheak mulong jih.”

¹³ Kheakü inü müchitchoki Benaia tsührü Pelatia sheabah. Judüki inü miro mükhüm tüsho düsheak achangnü trip, “Ah, Wuto Atungpuh ! Israel aningkhi nünü shahde dükheakshihba de?”

¹⁴ Atungpuh yu I kilim arü:

¹⁵ Mihtsürü tsührü, nü keoniorü khung tüsho Israel yamkhün athrünkhi ki Jirusalem ching larünü tha, Arübo Atungpuh kheaknü limshude lah; ha lo ha isa yamalo thsüpü jihkheah.

Israel Alodarüpü Alokhikhi

¹⁶ Jumonü thaang: Wuto Atungpuhnü ha thachoh: Inü arübo trükshih bolung limshude yüshihshih she tüsho lomi bolung ching arü hiumüzütshihshih she, arü yükhi lomibo ching arü thsungkheaknü I arüngakopung khülang lakheah.

¹⁷ Jumonü thaang: Wuto Atungpuhnü ha thachoh: Trükshihbo chingnü inü nüsa bemukhungbah tüsho nüsa hiumüzütkhi lomibo chingnü belodarübah, tüsho nüsa kilim inü Israel lomi jihlobah.

¹⁸ Arünü ju ching rholobah tüsho achihbe-yakli mejakbo tüsho athraneanbe sangthsübo lahkhita bahbah.

¹⁹ Inü arü kheak mulong khülang jihbah tüsho arü kheak me aso khülang yukjihbah; inü arü shih chingnü lung mulong yihkhitbah tüsho arü kilim shihtsü mulong jihbah.

²⁰ Jushu arünü I yakzan thsükhibo yanbah tüsho I yakzanbo zopü kümkangbah. Arü ju I mihtsürü thsübah, tüsho I ju arü Thrünpuh thsübah.

²¹ Tüshe sherü arü yo sheak mülakhi mejakbo tüsho athraneanbe sangthsübo ki mulong jihchonü, inü arünü arhimokhibo arü nihbuh ku kheak hankihjihbah, Wuto Atungpuhnü thachoh.

²² Judüki cherubim, arü rheang ki lolungbe-jingbo bebah arü ghidükeang shuhkih, tüsho Israel Thrünpuh müretahkhi arü kumung lakheah.

²³ Atungpuh müretahkhi kiuto chingnü yükih tüsho aniakhiuklim müzüng kheak tuklo.

²⁴ Menü I shuhkih tüsho Thrünpuh menü ajikhi michih ching I Babilon ching ramtsorü kilim bedarü. Judüki inü angükhi michih I kheaknü yükihabah,

²⁵ tüsho Atungpuhnü I ki huhkhi lüpdükhi inü ramtsorü ki tha.