ESTER 9 - AMÜSÜH HÜM CL Bible (BSI)

Jihudarübonü Arü Riri Laksahkhi

¹ Adar khinu nimung thürükheak mahsam ni, kiulongthsüpuhnü Jihudarü arü riri khah ching yüzahshihpü mülüjihkhi khiung, ju nimung arü riribonü arü kukpü mükkin thsü tüshe ju müthri arü kurungkheak Jihudarübonü kuk.

² Jihudarü lomi kiutobo alala ching arü laksahpü lümrübo athrihpü trüngmusu. Alala ching mihtsürübonü arü tre, tüsho arü azhihde shenü she müzhipkhuk.

³ Atsütsünü, yakzanshuhrü, thiyuzüng hanrü, tüsho kiulongthsü bukkhüp atorü alalanü Jihudarü rung, tümüde arünü Mordekai tre.

⁴ Mordekai ju kiulongthsürü-yam ching wu-sühmüh toshangkhi dünkheak lomi alala ching soride yü.

⁵ Jumonü Jihudarünü arü riri kheak tümü rhimobeanü ju athrünkhi rhimokhuk. Arünü thsühnuk shuhbah yande laksah.

⁶ Susa kiuying chingnü lang she Jihudarünü mihtsürü 500 laksah,

⁷ Parshandatha, Dalphon, Aspatha,

⁸ Poratha, Adalia, Aridatha,

⁹ Parmashta, Arisai, Aridai tüsho Vaizatha harü laksah,

¹⁰ harü mihtsürü thürü ha Jihudarü riri Hammedatha tsührü Haman tsührübo ah; tüshe arünü kukruk a muqiu.

¹¹ Ju nimung Susa ching mihtsürü ahihkhüh laksahkhi kiulongthsüpuh ki thiyusheak jih.

¹² Apinü Ester ki tha, “Susa chingnü lang Haman tsührü thürü bebah mihtsürü 500, Jihudarünü laksahdo. Tüsho lomi püpü ching she arünü tümü rhimode! Kheakü nünü tümü lunela? Ju inü amülüjihbah. Tümü künlanü I ki thaang, tüsho ju arhimobah.”

¹³ Tüsho Esternü alo, “Nünü mulonga lasho Jihudarübonü Susa ching khihni nangde shido she rhimoshang. Tüsho Haman tsührübo arü thürü ju süksahdung kheak zhinpü mülüjang.”

¹⁴ Ha rhimoshihpü, kiulongthsüpuhnü Susa ching thiyukhüm jih, tüsho arünü Haman tsührü thürü ju zhina zo.

¹⁵ Adar khinu nimung thürükheak phüyi ni Jihudarübo Susa ching mukhunglobah ju kiuto ching mihtsürü 300 laksah, tüshe arünü kukruk a tümü mulu.

¹⁶ Lomibo ching Jihudarü püpürübo she shumukhung tüsho arü rhangdung thsungkheaknü düküngde zhip. Arü mükheahnerü thiriri 75,000 laksahkhinü arü reangkeamdo, tüshe arünü kukruk a mulu.

¹⁷ Ha Adar khinu nimung thürükheak mahsam ni lakheah. Ashidopü, thürükheak phüyi ni ju alaksahkhi müla, tüshe asukachihde thiriarüngkhi tsühyungde mung.

¹⁸ Tüshe Susa ching Jihudarübonü thürükheak mahsam le thürükheak phüyi ni khiungde laksahbah thürükheak phüngü nimung lang thiri-arüng ju mung.

¹⁹ Jumonü kiulongbo ching larü Jihudarübonü Adar khinu thürükheak phüyi nimung ju asühachihde, tüsho tsühyungachihde khülangnü khülang thsambah jihachihde mungchoh.

Purim Thünio

²⁰ Mordekainü adünjikhi alala thrütbahle aphüni tüsho limshu larü Jihudarü kilim, Persia kiulongthsü alala ching yüshih,

²¹ ju Adar khinu thürükheak phüyi le thürükheak phüngü ni ju kam aban amuni thsang dükhi ah.

²² Harü nimungbo ju Jihudarübo arü riri kheaknü lümyinkhi; tüsho mulong thsümünimkhi adükheakbe chingnü asühpü nimung müthrikhi khinu lakheah. Harü nimungbo ching boto tsühyungachihde, tsühyungbenü thsambah khülangnü khülang ki jihachihde tüsho zhochihrü kilim thsambahbo jihshihpü arü ki thrüt.

²³ Junangde, Jihudarübonü Mordekainü athrütkhibo yan, tüsho arüngde amungpü ju akheah thsüabah.

²⁴ Agag kheaknü atrükkhitkhi Hammedatha tsührü Haman ju Jihudarübo riri–apinü Jihudarü laksahpü azan thsü.

²⁵ Tüshe Esternü kiulongthsüpuh miki yü, tüsho Hamannü lümkhi akhüh Jihudarü sheshihpü thsükhi ju anihbuh sheloshihpü kiulongthsüpuhnü thiyukhüm thrüta ahiuh–api tüsho atsührübo süksahdung kheak zhinde sheshih.

²⁶ Jumonü amunimungbo Purim de ji (Pur yubüm chingnü). Tümüde ju Mordekainü athrütkhi kihüm tüsho arü kheak dünjikhinü,

²⁷ Jihudarübonü arü thsungkheak yakzan thsü, arü tsührü tsührübo tüsho shepü Jihudarü kambanü, Mordekainü athrütkhi yande kim dükdü ching kam aban mahne ni mülakphahde amupü yakzan thsü.

²⁸ Lün lün ching yamkhün aban, kiuthsü aban, tüsho kiuto aban ching harü nimungbo lümkhitbah, tüsho Purim thünio ha Jihudarü trük alalanü mülakphahde yihkhia lude alapü thsü.

²⁹ Abihail tsührü kiulongthsübe Esternü she Jihudabuh Mordekainü athrütkhi lung ajakde alümkhi alalanü Purim amütsan thrüt.

³⁰ Tüsho apinü kihümbo ju Jihudarü athrünkhi kilim thrüt, tüsho ju Persia kiulongthsü lomi 127 ching yüshih. Ju Jihudarü mungtsü tüsho thiyuro dünkheak lakheah–

³¹ Purim nimungbo kim dükdü ching mungde alapü thsüde Jihudabuh Mordekai le kiulongthsübe Ester anenü tsühsoniusobo ki khümkeak thsüpü tüsho atüzhopü dünkheak yakzan thsüa jih.

³² Esternü adüngakhikhi, Purim yakzan laklangkhi ju, hüm ching thrütyuk.