Biblia Todo Logo
Bìoball air-loidhne

- Sanasan -

ESTER 8 - AMÜSÜH HÜM CL Bible (BSI)


Keochihloshihpü Jihudarü ki Mülüjihkhi

1 Ju nimungnü kiulongthsüpuh Zerzes hode Ester kilim Jihudarü riri Haman yamrüplurüp jih. Esternü kiulongthsüpuh ki Mordekai ju akeoniorü ah de tha, judükinü kiulongthsüpuh miki Mordekai azahshihpü mülü.

2 Tüsho kiulongthsüpuhnü Haman kheaknü alulokhi mütsanyüm ayingkhing chingnü yihkhita Mordekai kilim jih, tüsho Esternü Mordekai ju Haman yamrung kurungkheak binshih.

3 Kheakü Esternü kiulongthsüpuh jing kheak kingrama yapbah chike ayode, Agag kheaknü atrükkhitbuh Hamannü Jihudarü azhihde lümkhi amütsü rhimokhi ju zhipdojang de mushu.

4 Kiulongthsüpuhnü shoto tso alibe ki shuhkih, tüsho Esternü wusubah kiulongthsüpuh ki zhip.

5 Tüsho anihbenü tha, “Ha kiulongthsüpuhnü mulongsho, tüsho nünü I muzhoa lasho yungsho nü miki ha lungkisho, Agag kheaknü atrükkhitbuh Hammedatha tsührü Hamannü Jihudarü sheshihpü kiuthsübo ching yakzan thsükhi ju mürhimopü nünü zhipdode thiyukhüm jihang.

6 I mihtsürübo kheak thsümütsü arükhi tüsho I trük laksahsho inü küde arümkhukpü?”

7 Kiulongthsüpuh Zerzesnü Ester le Jihudabuh Mordekai ane ki tha, “ Kheahang, Jihudarü sheshihpü rük amütsü thsükhi hode Haman süksahdung kheak zhindo, tüsho inü api yam Ester kilim jihdo.

8 Tüshe kiulongthsüpuh mung chingnü kiulongthsü mütsan yingkhümnü yümbah thiyusheak ahiuhkhia mübahkhuk, judüalalashe nüsanü akünkhi nangde Jihudarü thsungkheak I mung chingnü thrütbah kiulongthsü mütsan yingkhümnü ayümpü kuklah.”

9 Ha Sivan de ajikhi khinu mahsam nimung mukukheak mahsam ni dünjikheah; Mordekainü kiulongthsüpuh yo athrütrübo jibah Jihudarü dünkheak kihüm thade thrütshih, tüsho ju yakzanshuhrü, thiyuzüng ahorirü alala, lomi 127 kilim, India chingnü Ethiopia khiungde yüshih. Kihümbo ju lomibo ching thiyumüthsü tüsho athrütkhi buh lungkiki chingnü thrüta mühah, tüsho Jihudarü kilim she arü yumüthsü chingnü thrüt.

10 Mordekainü kihümbo ju kiulongthsüpuh Zerzes mung chingnü thrüt tüsho apinü kiulongthsü mütsan yingkhümnü yüm, jurübo ju aberünü kiulongthsüpuh yo khora yam chingnü adukathri kheak binbah niokheamde hanbah yü.

11 Harü kihüm ching zahkhi ju, kiuto abande Jihudarübonü arü thsungkheak limzhimpü thsüde küdang lapü kiulongthsüpuhnü mülülah de thrüt. Mürangkhüh püpürü lomi mihtsürü thirithsürü arübahle Jihudarü, arü tsührü niuberü yansho, arünü she keochihlode asheshihpü kuklah; tüsho laksahkhamde arü lakhitbo she yankhia lupü kuklah de thrüt.

12 Ha yuzüng Persia lomi ching yande rhimoshihpü Jihudarübo laksahpü akhukhitkhi nimung Adar khinu thürükheak mahne, nimung thürükheak mahsam nipü thsakham.

13 Mütsan-hüm thrütkhibo ju lomibo ching yakzan kampü thsüde mihtsürü alala kilim ahiuh, jude thsüsho Jihudarübonü arü ki royimpü ju nimung ching thsakhampü lakheah.

14 Kiulongthsüpuhnü thiyukhüm jihkhi nangde, khoraberübonü alü shande be. Thiyuzüng ju Susa kiuying ching boto ki she ahiuh.

15 Mordekainü kiulongthsü khim biyi le amüye, khimthünak yih tüsho suna kuthran thranbah kiulongthsü yam chingnü tsahmusu. Tüsho Susa kiuto ju asühkhi düsheaknü mide kam.

16 Judüki Jihudarübo akukkhi dünkheak mulong keamkhi tüsho asühkhi atonü asühachih.

17 Kiuto tüsho lomi aban ching kiulongthsüpuh yusheak küyimki khekhea, Jihudarübonü mude asühkhi thünio niode mung. Tüsho lomi ching püpürü mihtsürübo she ahihkhüh Jihudarü kam, tümüde kheaküa arübonü Jihudarübo treabah.

Yimkhiung Naga CL Bible - AMÜSÜH HÜM

Copyright © 2008 by The Bible Society of India

Used by permission. All rights reserved worldwide.

Bible Society of India
Lean sinn:



Sanasan