Biblia Todo Logo
Bìoball air-loidhne

- Sanasan -

ESTER 6 - AMÜSÜH HÜM CL Bible (BSI)


Kiulongthsüpuhnü Mordekai Wüntre Jihkhi

1 Ju re kiulongthsüpuh yapshede müyükhuk, jumonü kiulongthsü yakzan thrütkhi hüm handarünü api ki khea huhang de thiyukhüm jih.

2 Ju ching kherhakkhi ju, dukha 2 Bigthana le Teresh kiulongthsüpuh ripit neaknenü api laksahpü rük yimkhi dünkheak Mordekainü athakhitkhi thrüta kherhak.

3 Kiulongthsüpuhnü keokhi, “Ha dünkheak Mordekai ki isanü wüntre tüsho thsambah küdükhüh jihde?” Ayamlarübonü alo, “Api thsungkheak isanü tümü lang she mürhimo.”

4 “Thüyam ching ju shepü la le?” de kiulongthsüpuhnü keokhi. Kheakü Haman thüyam dükeak apinü athsakhamkhi süksahdung kheak Mordekai zhinpü thsüde, kiulongthsüpuh ki thiyu kheangpü azah.

5 Jumonü ayamlarübonü alo, “Nü shorupü, Haman ha kheak aleanglah.” “Api azahshang” de kiulongthsüpuhnü thiyu jih.

6 Küyimki Haman azahkhea, kiulongthsüpuhnü keokhi, “Inü khide wüntre jihpü thsüde mihtsürü khülang lah, ju buh kheak inü tümü rhimobea?” Hamannü alangzü lüm, “ Kiulongthsüpuhnü wüntre jihpü thsüde I hobah she lapü?”

7 Hamannü Kiulongthsüpuh ki tha, “Mihtsürü shepü kheak kiulongthsüpuhnü wüntre jihpü lümcho,

8 Kiulongthsüpuhnü aphuyukhi khimmih hande arüshang, khora tüsho kiulongthsürü kuthran,

9 tüsho mükheahmudurü khülang thiyia phuyujihshang, jude thsah khora ju kiuto mükamde tsahshang. Tüsho abebuhnü hade zhishang, ‘ Kheahang ha buh mihtsürü kheak kiulongthsüpuhnü küdükhüh wüntre jihpü lümcho!’ ”

10 Kiulongthsüpuhnü Haman ki tha, “Niokheamang tüsho khim le khora ludarang, tüsho kiulongthsüpuh ripit ki binbuh Jihudarü Mordekai kilim jurü jihang. Nünü athakhi nangde api thsungkheak alala rhimoang.”

11 Jumonü Hamannü khim le khora ludarü, tüsho Mordekai kheak khim phukihjih. Mordekai ju khora kheak binshihbah Haman nü kiuto mühide be, tüsho api müngüh ching hade zhi, “ Kheahang, ha buh mihtsürü kheak kiulongthsüpuhnü küdükhüh wüntre jihpü lümcho!”

12 Ju dunglim Mordekainü kiulongthsüpuh ripit ki alode yü, tüshe Haman a ami khurambah khümkhümde ayam lim niokheamde tso.

13 Hamannü api kheak dünjikhi aniube le amüyamrübo ki thakhama huh. Aniube le amüyamrü mükheahmudurübonü api ki tha, “Nü wu dükheakmuroh. Mordekai ju Jihudarü ah, tüshe nünü api mukuk. Dükde apinü nü kukbah.”


Haman Sheshihkhi

14 Arü asukachihchoki, kiulongthsüpuh dukhabo niokheamde arübah Esternü aniojikhi ching Haman bebah yü.

Yimkhiung Naga CL Bible - AMÜSÜH HÜM

Copyright © 2008 by The Bible Society of India

Used by permission. All rights reserved worldwide.

Bible Society of India
Lean sinn:



Sanasan