ESTER 2 - AMÜSÜH HÜM CL Bible (BSI)

Ester Kiulongthsüberü Kamkhi

¹ Ju dunglim, Zerzes kiulongthsüpuhnü mulong zhipzhipkhi keamloshuyamnü, Vashtinü tümü rhimokhea tüsho alibe azhihde apinü arhimokhibo lümkhit.

² Kiulongthsüpuh ki api lümlung-jihrü khürünü tha, “Atsangkhitkhi anünürü nü thsungkheaknü yimshang.

³ Tüsho nü bukkhüp atorübo thiyia kiulongthsü aban chingnü anünürü jaktsübo yima handarünü ha Susa kiuying ching nü yam khiungshak aliberü binpung binshang. Arü kümbuh Hegai dukhanü jaktsü-mujumürabe jihde mujushang.

⁴ Ju ruk, nünü amulongkhi liberü mokhita Vashti müthri kiulongthsüberü thsüshang.” Kiulongthsüpuhnü ha lümkhi atsü ah de lümbah rhimo.

⁵ Judüki Susa ching Jihudarü amungnü Mordekai, Jair tsührü lakheah; api ju Benjamin trük tüsho Kish le Shimei buhtsüh chingnü ah.

⁶ Küyimki Babilon kiulongthsüpuh Nebukednezarnü Jehoiakin Juda kiulongthsüpuh Jirusalem chingnü ramtso kuhi ching bede atsokhea, aramrü bolung api she abekheah.

⁷ Api lung akeoniorü tsührü Ester lakheah, küpü Ibri yunü Hadassa de ji; akheahakham tüsho trungdung atsü lakheah. Anihbe berübuhrü sheabahshu Mordekainü bea lu tüsho atsührü thsüde mütrükhit.

⁸ Küyimki kiulongthsüpuhnü thiyusheak aso zhiyukjihkhea, Susa ching anünürü ahihdo mukhung tüsho Ester she jurü bolung bekheah. Anihbe she kiulongthsüpuh yam ching aliberü binpung Hegai bukkhüp la.

⁹ Hegainü Ester kheak mulong keam, tümüde apinü alümkhi nangde alibenü rhimo. Alibe akheahakhamshihpü apinü kim dükdü ching mujumürade thsülüpjih tüsho tsühyungpü akeake akhin. Apinü Ester kilim anünürü thüne anihbe tankihshihpü mokhita jih tüsho kiulongthsürü lapung atsüdakbe ching lashih.

¹⁰ Kheakü, Mordekai athsunganah hode, Ester nü anihbe Jihudarü ah de müthade la.

¹¹ Animokhün Mordekainü alibe ju küde kamcho tüsho tümü dünjibaki de thüyam limkhuh yüla arülade kheahde tsah.

¹² Anünürübo mihbüm abande kheahtsübe mujumürabahle khinu thürükheak mahne dunglim Zerzes kiulongthsüpuh shorupü yakzan lakheah–khinu thuruk arhümthüneabe müdangke tüsho khinu thuruk arhümthüneabe püpü mungjibo mujujih.

¹³ Anünürübo ju arü binpung chingnü küyimki kiulongthsüpuh yam ching yübanü buh künkhi khimmih yihbah yüde la.

¹⁴ Arelim ju ching yü tüsho ashido yapsu zütthsü-yam püpü ching bede yübah kiulongthsüpuh hanniube kümbuh Shaashgaz dukhanü neakshih. Kiulongthsüpuhnü mürühde alibe mungnü müjiloyichokia mushoru.

¹⁵ Ester ju kiulongthsüpuh miki yüpü kim khiung. Abihail tsührü Ester, shepü Mordekainü mütrüa lukhea, angürü alalanü alibe tsülah de kheahkhit. Küyimki ayüpü kim khiungkhea, Hegai shepü zütthsüyam kurungkheak aberü lakhea, apinü athsunganahkhi nangde khimmih yih.

¹⁶ Junangde, kiulongthsükhi athünepü kam, Tebeth de ajikhi khinu thürüpü ching Ester ju Zerzes yam ching amiki bedarü.

¹⁷ Kiulongthsüpuhnü anünürü püpürü kheaknü Ester alü muzho, jumonü aku kheak kiulongthsüberü kuthran thranjihde Vashti müthri kiulongthsüberü kamshih.

¹⁸ Jushu, kiulongthsüpuhnü Ester akin jihde thünio ato jiyuk. Apinü kiulongthsü alala ching amupü zhiyuk tüsho kiulongthsüpuhnü amulongkhi thülün thsambahbo jih.

Mordekainü Kiulongthsüpuh Rhangdung Khümkhit

¹⁹ Küyimki anünürübo mahne kipü mukhungkhea, Mordekai ju kiulongthsüpuh ripit ki bin,

²⁰ tüshe Esternü a ju kim khiungde anihbe trük tüsho amihtsürü mümükheahshih, tümüde Mordekai nü azüki she ki she dütha de athakhi mihyu ani.

²¹ Nimungkhüh Mordekai ju kiulongthsüpuh ripit ki binchoki Bigthana dukha tüsho Teresh, kiulongthsüpuh ripit limro neaknenü kiulongthsüpuh kheak mulong khühde kambah alaksahpü rük yim,

²² Mordekainü mükheahbah Ester ki tha tüsho Esternü Mordekai mung damde kiulongthsüpuh ki she thaakhin.

²³ Yimakheahshe atsütsü lakheah, jumonü ane chido süksahdung kheak süka zhinde sheshih, tüsho kiulongthsüpuhnü ha rhimokhi kiuthsü hüm alala ching thrüta zoshih.