ESTER 1 - AMÜSÜH HÜM CL Bible (BSI)

Vashti Kiulongthsüberü-binkiu chingnü Tso

¹ Kiulongthsüpuh Zerzes shepü hode Indianü Ethiopia khiungde 127 kiulongthsü kurungkheak,

² Susa kiulongthsü-binkiu chingnü yakzan shuh,

³ api kiulongthsü kam asampü kheak thünio ching abukkhüp atorübo, yamlarübo tüsho Persia le Midia bonungrü torübo, kovünorbo tüsho amükheahrü kiulongthsübo chingnü jiyuk,

⁴ api kiulongthsü mungshimungthu tüsho lakhit huhde nimung chikheak zheahrü mung.

⁵ Jushu, nimung thüne lude Susa kiuying ching boto, zhochihrü alala thünio kipde kiulongthsürü-yam shahwün ching mung.

⁶ Thüyam mühide lung-dungjing, shotoyinchibo kheak amüye, mürümmüri tüsho biyi khimbo chinga zo. Suna tüsho shotoyinchi dükhüm binkiubo ju, lungmürak tüsho asherühü lungbonü adamkhi kheak zo.

⁷ Yukhu ju kiulongthsüpuhnü amulongkhi nangde suna pung buh mungjiji chingnü ahiuh.

⁸ Yakzan yande, ayungpü ju alala ki mathsung; tümüde mihtsürübonü akünthülün tsühyungpü thsüde kiulongthsü bukkhüp atorübo hode zhiyukshih.

⁹ Vashtinü she kiulongthsüpuh Zerzes yam chingnü aliberübo thünio kip.

¹⁰ Thünio athüne nipü kiulongthsüpuh ju yukhu yungde asühkhi hode ayamlarü dukhabo harü thüne jiyuk: Mehuman, Biztha, Harbona, Bigtha, Abagtha, Zethar, tüsho Karkas.

¹¹ Apinü arübo Vashti kiulongthsüberü kuthran thranbah bebah arüshihpü thiyukhüm jih. Tümütüsho alibe ju akheahakham lakheah, jumonü kiulongthsüpuhnü atorübo le hanrübo ki huhpü lüm.

¹² Tüshe küyimki yamlarübonü Vashti ki hoju thakhea, alibenü arüpü thsungloabah; junü kiulongthsüpuh mulong zhipzhipde kam.

¹³ Kheakü, kiulongthsürü yakzan ching lakhi nangde apinü küruk thsüsho atsübanü de lümlung larü jibah keokhi.

¹⁴ Arürübo ju, Karshena, Shethar, Admatha, Tarshish, Meres, Marsena tüsho Memukan– harü ha Persia le Midia kiulongthsü ching atorübo ah.

¹⁵ Apinü arü ki tha, “kiulongthsüpuh Zerzesnü yamlarü thiyia Vashti jishih, tüshe marü, isanü yakzan yande alibe kheak rhimopü tümü la?”

¹⁶ Memukannü kiulongthsüpuh le abukkhüp larübo ki tha, “ Kiulongthsüberü Vashtinü kiulongthsüpuh ki lang marochih tüshe abukkhüp atorübo ki she ah–am kiulongthsüpuh bukkhüp alala ki!

¹⁷ Kiulongthsü ching aliberübonü ha sosho nihbe niubuhrü junobah. Arünü athabah, ‘ Kiulongthsüpuh Zerzesnü kiulongthsüberü Vashti api kilim arüshihpü thiyi tüshe thsunglo.’

¹⁸ Küyimki Persia le Midia torü niuberübonü Vashti yakli sobanü arü niubuhrü ki she ju ninü athabah, tüsho ju ching abahyukkhi tüsho mulong zhipzhip labah.

¹⁹ Ha nü kiulongthsü ching alim lasho kiuthsü yakzan yande Vashti ju kiulongthsüpuh ki küyimkishe müthüninpü thiyukhüm jihang. Ju Persia le Midia yukhüm ching thrütshang. Jude thsüsho lang küyimkishe mümüthrikhuk tüsho atsü liberü püpürü kiulongthsüberü thsüshang.

²⁰ Küyimki thiyusheak lomi alala ching zhiyukbanü, aliberü alalanü niubuhrü ki, api alarü yungsho zhochihrü thsüthsü dükde akin jihbah.”

²¹ Kiulongthsüpuh le api bukkhüp atorübo alalanü ha lümkhi mulongkhit, tüsho Memukannü athakhi yande kiulongthsüpuhnü rhimo.

²² Kiulongthsü lomi abande thiyutha tüsho athrütkhi limro yande, niubuhrü abannü nihbuh yamkhün ching atungpuh thsüang tüsho adüngakhi thsüde akheamyu thaang de thiyusheak jih.