EFISIA 3 - AMÜSÜH HÜM CL Bible (BSI)

Khiungkerü thsungkheak Paul Rhimo

¹ Ha thsungkheaknü, I Paul, nüsa khiungkerü dünkheak Jisu Khrista aramrü–

² nüsa thsungkheak Thrünpuh amüthsüm rhimopü I kilim jihkhi nüsanü sodo de lümlah,

³ ju inü akhihkhüh thrütkhi amikheak akhiukkhi I kilim huhkhi aramyu lah.

⁴ Küyimki nüsanü ha khebanü Khrista aramyu ching I lümkhi nüsanü amükheahbah,

⁵ ju kheakü api amüsüh thsangyuthsangrarübo tüsho wukihrübo ki Menü ahuhkhi nangdüa püpürü lünbo mihtsürü tsührübo ki mümükheahshihde alakheah;

⁶ junangde khiungkerü ju rukhüh yamrüplurüp lurü, pang rukhüh ching kheyukrü, tüsho thiyusheak-atsü hode Jisu Khrista ching alokhikhi shihcham lurü ah.

⁷ Api wu rhimokhinü I kilim jihkhi Thrünpuh amüthsüm thsambah yande I ha thiyusheak-atsü tankihrü kamshih.

⁸ Amüsührü bolung alala kheaknü I aninibe thsüa lalashe, khiungkerü kilim müyimkhitkhukbe Khrista lakhit, ha amüthsüm I kilim jihdo,

⁹ tüsho lüpdükhi thrünrü Thrünpuh kheak lünbo ching rama lakhi aramyu lümkhi mihtsürü alalanü angüshihpü lakheah;

¹⁰ junangde borü hode yinmi kiulongthsübo ching yakzanshuhrübo tüsho thiyukhümsühmühbo ki Thrünpuh lümlung aphuaphu mükheahshihpü,

¹¹ ha isa Atungpuh Jisu Khrista hode akuk ngüshihkhi lün yo lümkhi yande,

¹² api kheak isa akin hode thüninde ayüpü mulong tokhi, tüsho mulongram lakheah.

¹³ Jumonü inü nüsa thsungkheak thsünükhi, nüsa müretah thsungkheak nüsa mulong müninipü inü nüsa ki mushuchoh.

Khrista Amuzho

¹⁴ Hamonü inü Abuh miki khukningchoh,

¹⁵ shepü kilimnü yinmi ching tüsho alomi kheak yamkhün aban mung jia la,

¹⁶ junangde api müretah lakhitbo yande pang lung ching api Me hode sühmüh lade nüsa düküngshihbah,

¹⁷ tüsho junangde akin hode nüsa mulongbo ching Khrista labah; junangde nüsa amuzho ching aying chinyukde tüsho düküngde,

¹⁸ wu lade, amüsührü alala lung rukhüh thsüde, Khrista amuzho atolim, ashanglim, achanglim, tüsho asüklim,

¹⁹ tüsho mükheahmudu zhichoki Khrista amuzho mükheahpü labah, junangde Thrünpuh khiukdahkhinü nüsa mide akambah.

²⁰ Kheakü shepü wunü isa pang ching rhimode isanü akeokhipü tüsho alümpü alala kheaknü alü thsüde arhimokhukpü lanü api kilim,

²¹ borü ching tüsho isa Khrista ching lünbo alala kilim lünnü lün api müretahshang. Amen.