T H S AN GYU T H S AN GR ARÜ 9 - AMÜSÜH HÜM CL Bible (BSI)

¹ Thiyuro-lungki tüsho lümlung larü arü rhimobo Thrünpuh khah ching künangde lanü rükakiakheahde ha alala inü mulong ching zodo; amuzho yungsho athraneankhi thsüthsü arü müngüh lakhi shenü mümükheah.

² Lüpdükhi rukhühnü alala ki dünjichoh, thiyuro-lungki tüsho mihbukmuyuk, atsü tüsho amütsü, amüsüh tüsho amümüsüh, shuhmülanga jihrü tüsho shuhmülanga müjihrü ki rukhüh dünjichoh. Atsürü kheak nangde aneakrü kheak lah; sherünü thiyuchihchimchonü arü ju thiyuchihchim bahyukrü nangde lah.

³ Alala kilim kuhi rukhüh arükhi ha alomiküp ching amütsü khülang ah. Kheaküshe, alala mulong amütsünü milah; arü arhang lachoki arü mulong ching bünkeangbünru lah, tüsho jushu arü sheabahchoh.

⁴ Tüshe sherü arhang larü lung arihdünü mulonglam khürü lah, tümüde arhang lakhi yihnu ju ashekhi kekhüzü kheaknü atsübe.

⁵ Arhang larünü arü ashebah de mükheahlah, tüshe ashekhinü tümü mümükheah; arü kheaküa thsambah müla, tüsho arü lümhan she dükheakdo.

⁶ Arü amuzho tüsho arü thraneankhi tüsho arü mükthsü dükheakabahdo; alomiküp ching dünjikhi alala ching kheaküa arü shihcham tümü müla.

⁷ Yüang, asühde nü jim tsühang, tüsho mulong asühde yukhu yungang; tümüde adüsonü nü rhimo Thrünpuhnü leangkhido.

⁸ Nü khimmihbo kamruhroro müyeshang; nü ku kheak müdangke mujuang.

⁹ Alomiküp ching Thrünpuhnü nü kilim jihkhi akeangkeang rhangdung nimungbo alala ching nünü muzhokhi nü yamkhünbe lung asühang, tümütüsho ju alomiküp ching nü rhimo tüsho rhangdung ching nü shihcham lah.

¹⁰ Tümüpürü nü khahnü arhimopü ngübanü, mürangde rhimoang; tümütüsho nü yüde alakhi Ashe-lomi ching rhimo yungsho lümkhi yungsho mükheahmudu yungsho lümlung müla.

¹¹ Kheaküshe alomiküp ching inü angükhi ju, athride alihrünü kamruhroro malihkhukchoh, mulong zahrünü kamruhroro thirithsü mukukchoh, lümlung larünü kamruhroro jim müngüchoh, kukhiuk ayuk mihtsürünü kamruhroro lakhit müngüchoh, tüsho anikhit mihtsürünü kamruhroro achang ching müyükihchoh. Kuhi amütsü mihbüm abande dünjichoh.

¹² Tümüde thsümütsü kim shenü mümüchitkhuk. Keang ching thüngüh phuhkhi nangde, tüsho qimürip ching wuhnu phuhkhi nangde, zukleangnü arü kheak keamchoh, thsümütsü kim ching mihtsürübo phuhchoh.

Makhakhi kheaknü Lümlung Atobe

¹³ Kheaküshe inü alomiküp ching ha lümlung amütsan ngüdo, tüsho I ki ha ato lah.

¹⁴ Kiuto anikhüh khülang ching mihtsürü nükde alakheah. Wulakhi kiulongthsürü khülangnü ju azhih. Apinü sündo tüsho chipi yeahshungpü thsakham.

¹⁵ Kheakü ju ching zhochihrü khülang lümlung larü mihtsürü lakheah, tüsho api lümlung hode kiuto ju khümkhit. Tütüshe shenü she zhochihrü mihtsürü ju mülümkhit.

¹⁶ Jumonü inü tha, “ Lümlung ju wu-sühmüh kheaknü atsübe; tütüshe zhochihrü mihtsürü lümlung mükhemükimabah, tüsho api yubo mani.”

¹⁷ Keamramkhi lümlung larü yubo ju makharü yakzanshuhrünü azhikhi kheaknü alü anipü lah.

¹⁸ Lümlung ju thirithsü thsühnuk kheaknü atsübe, tüshe amütsü rhimorü khülangnü kukruk ahihdo thsümünimchoh.