T H S AN GYU T H S AN GR ARÜ 8 - AMÜSÜH HÜM CL Bible (BSI)

¹ Shepü lümlung larü mihtsürü nangde la? Tüsho tümükhüh thanakkhi shepünü mükheahla? Lümlungnü khürü miro yinshihchoh, tüsho miro mitingkhi müthrishihchoh.

Kiulongthsürü ki Mihyuaniang

² Thrünpuh ki thiyuchihchimkhi hode kiulongthsüpuh yukhüm rhimoang.

³ Dümüyinsah; api mikinü tsoang, tümüanü masühkhi ching dashu, tümüde apinü tümüpürü mulonglanü rhimochoh.

⁴ Tümüde kiulongthsüpuh yu wu lah, tüsho shepünü api ki thakhukpü, “Nü tümü thsücho?”

⁵ Sherünü thiyukhüm anibanü athsümünim mushoru, tüsho lümlung larü lümnü kim tüsho yakli mükheahbah.

⁶ Mihtsürü küpkhuk arü kheak mülangde lalashe, lüpdükhi thsungkheak kim tüsho yakli lah.

⁷ Dükde, tümü dünjibanü arünü mümükheah, tümüde ju küruk labanü shenü arü ki thakhukpü?

⁸ Apung yanlopü she kheak wu müla, yungsho ashepü nimung kurungkheak wu müla; thirithsü chingnü atuklokhi müla, yungsho mihbukmuyuk rhimorü junü mübekhit.

Mihbukmuyuk tüsho Thiyuro-lungkirü

⁹ Ha alala inü ngüdo, tüsho alomiküp ching rhimokhi lüpdükhi ching I mulong jihdo: mihtsürü khürünü nihbuh yuripü thsüde püpürü kheak yakzan shuhkhi kim khülang lah.

¹⁰ Judüki mihbukmuyuk kiuyuka bahkhi inü ngü, tüshe mihtsürübonü mibahpung chingnü atsochoki arünü amütsü rhimokhi kiuto ching arü shijih. Ha she akeangkeang.

¹¹ Tümütüsho amütsü-rhimo azhihde nahde müthsümüchimonü, mihtsürü mulong ju amütsü rhimopünü milah.

¹² Aneakrünü amütsü-rhimo chi khülang ki rhimomo she tüsho arü rhangdung shangde lalashe, sherünü Thrünpuh trechonü tsüde alabah de inü mükheahlah, tümütüsho arünü api ki trede zhipchoh,

¹³ tüshe mihbukmuyuk ki a tsüde müla, yungsho alamme khülang nangde alakhi arü nimungbo mushuhakhin, tümütüsho arünü Thrünpuh miki trede müzhip.

¹⁴ Alomi ching akeangkeang dünjikhi lah, junangde thiyurolungki mihtsürübo mihbukmuyuk dün thsümüchikhi lah, tüsho mihbukmuyuk mihtsürü ju thiyuro-lungkirü dün thsambah ngükhi lah. Ha she akeangkeang de inü tha.

¹⁵ Jumonü asühde alapü inü thachoh, tümüde mihtsürü thsungkheaknü alomiküp ching atsühpü, ayungpü tüsho asühpü kheaknü tümü atsübe müla, tümüde ha alomiküp ching Thrünpuhnü api jihkhi rhangdung ching ha rhimobah.

¹⁶ Küyimki lümlung mükheahpü inü alümkihkhea, tüsho alomi kheak rhimorhiyi kheahkhea, animung tüsho are mük düküpde müyü,

¹⁷ tüsho inü Thrünpuh rhimo alala ngü, junangde alomiküp ching tümü dünjichonü shenü müyimkhitkhuk. Arünü küdükhüh mürangde yimyim she, ju müyimkhit; lümlung larü mihtsürünü amükheahpü mürangrang she, arünü ju müyimkhitkhuk.