T H S AN GYU T H S AN GR ARÜ 5 - AMÜSÜH HÜM CL Bible (BSI)

Thrünpuh Wüntreang

¹ Küyimki nü Thrünpuh yam ching yübanü nü jingdükübo aheangang; makharünü arhimokhi nangde shuhmülanga jihkhi kheaknü a anipü phünide ayükhi atsübe ah; tümütüsho arünü amütsü tümü rhimochonü mümükheah.

² Nü münnü düniokheam, yungsho nü mulongnü Thrünpuh miki thiyu thapü dünahnahshih, tümüde Thrünpuh yinmi ching lah, tüsho nü alomi kheak lah; jumonü nü yubo nükshang.

³ Tümütüsho limmülim rhimokhi ahihdo chingnü milimbo michoh, tüsho thiyu hihde athakhi chingnü makhakhi arüchoh.

⁴ Küyimki nünü Thrünpuh ki thiyuchihchim khülang thsübanü, ju akuk ngüde arhimopü dashu; tümüde makhakhibo ching api asühpü müla. Nünü tümü thiyuchihchima lanü rhimoang.

⁵ Nünü thiyuchihchimbah akuk ngüde mürhimokhi kheaknü a nünü thiyuchihchim mulukhi atsübe ah.

⁶ Nü münnü nü aneak ching dübeshih, tüsho Thrünpuh yunithsürü miki ha lakmihdo de dütha; tümüde Thrünpuhnü nü kheak bukakhiukshihpü, tüsho nü khah rhimobo thsümünimshihpü?

⁷ Milim hihkhibo tüsho thiyu hihkhibo akeangkeang; tüshe Thrünpuh treang.

Lakhit ju Akeangkeang

⁸ Nünü lomi khülang ching zhochihrü junokhi tüsho thiyuro le alungki ahorimüchihkhi ngüsho, ju dünkheak dümüyinsah; tümüde atorü achang ju achangbenü kheahde lah, tüsho kheaküshe ane kurungkheak achangbe lah.

⁹ Kheaküshe thulu chingnü alü ngükhi ju alala thsungkheaknü lah; kiulongthsüpuh she alo kheak düthsün angülah.

¹⁰ Sho muzhorünü sho kheak reangmükeam; yungsho lakhit muzhorünü alü thsükhi kheak reangmükeam. Ha she akeangkeang.

¹¹ Küyimki kukrukbo hihbanü, ju tsühpü larübo hihde kamchoh; tüsho müknü angükhi kheak hode atungrübo tümü alü la?

¹² Arünü aninikhüh yungsho hihde tsühtsüh she rhimorübo a keamramde yapchoh; tüshe muzhomopungde alakhinü alarü a müyapsheshihkhuk.

¹³ Inü alomiküp ching amütsübe ngüdo: mihtsürübonü nihbuh yuripü lakhit zomukhungdo,

¹⁴ tüsho lakhitbo thsü kuhi amütsü ching dükheakabahdo; api tsührü lachoki akhah ching tümü aninga muzojih.

¹⁵ Berü nuyam chingnü mihtsürübo arüdo, junangde arü arükhi nangde bünkeang tsolobah; arünü arhimokhi arü khah chingnü tümü she lubah mutso.

¹⁶ Ha she amütsübe lah: arü arükhi nangde, arü tsolobah; tüsho apung thsungkheak rhimokhi chingnü arü tümü alü ngüde?

¹⁷ Ju lung, arü nimungbo alala arünü amiting ching khide küpkhukde, tukthsüde tüsho bukakhiukde tsühyungdo.

¹⁸ Inü ha yimkhitdo: Thrünpuhnü isa kilim jihkhi rhangdung nimung anükhüh ching alomiküp ching rhimokhi alala lung atsühpü tüsho ayungpü tüsho asühachihkhi lapü atsübe lah; tümüde ha isa shihcham lah.

¹⁹ Junangde sherü kilim Thrünpuhnü lakhit tüsho yamalo tüsho shepü ki apinü jurü asühshihkhukcho, tüsho arü shihcham leangkhide tüsho arü rhimo ching asühpü ngüchonü–ha Thrünpuh thsambah ah.

²⁰ Tümüde arünü arü rhangdung nimungbo thsungkheak lakkhilakyuk lang lümakheahbah, tümütüsho Thrünpuhnü arü mulong asühpü zojihlah.