T H S AN GYU T H S AN GR ARÜ 3 - AMÜSÜH HÜM CL Bible (BSI)

Lüpdükhi thsungkheak Kim Khülang

¹ Thüning bukkhüp lüpdükhi thsungkheak akheahmünchi lah, tüsho yihnüpü aban thsungkheak kim khülang lah:

² Zübepü kim khülang, tüsho ashepü kim khülang; akhimpü kim khülang, tüsho rukkhita bahpü kim khülang;

³ alaksahpü kim khülang, tüsho athsüngupü kim khülang; athokheampü kim khülang, tüsho athsüpü kim khülang;

⁴ atrippü kim khülang, tüsho amünepü kim khülang; atüzhopü kim khülang, tüsho atsünpü kim khülang;

⁵ lung hiumüzütpü kim khülang, tüsho lung wumukhungpü kim khülang; kapa lupü kim khülang, tüsho akapkhi chingnü azüpü kim khülang;

⁶ ayimpü kim khülang, tüsho adükheakpü kim khülang; azopü kim khülang, tüsho jipa bahpü kim khülang;

⁷ arukrüppü kim khülang, tüsho athürepü kim khülang; zhikde alapü kim khülang, tüsho athapü kim khülang;

⁸ amuzhopü kim khülang, tüsho athraneanpü kim khülang; thirithsüpü kim khülang, tüsho mungtsüpü kim khülang.

⁹ Rhimorübo arü rhimokhi chingnü tümü alü la?

¹⁰ Thrünpuhnü mihbüm aban hahmülang yihkihjihkhi inü ngüdo.

¹¹ Apinü lüpdükhi kim thsungkheak ayearade thsüjihdo; kheaküshe apinü ahokhi tüsho arübe mükheahpü arü lümkhi ching yukjih, tütüshe Thrünpuhnü tümü atankih chingnü akheam khiungde arhimokheanü arünü müyimkhitkhuk.

¹² Arü lachoki thürün arü asühpü tüsho asühachihpü kheak hode tümü atsüdak müla de inü mükheahlah;

¹³ kheaküshe, mihbüm aban atsühbeah tüsho ayungbeah tüsho api rhimokhi alala ching shih asühpü labeah–ha Thrünpuh thsambah lah.

¹⁴ Tümüpürü Thrünpuhnü thsüchonü lünnü tsüpde alabah de inü mükheahlah; tümü she ju ching muyukajakkhuk, yungsho ju chingnü tümükhüh she müyihkhit; Thrünpuhnü ha rhimodo, junangde alalanü api miki trede azhipbah.

¹⁵ Küpü dünjicho yungsho adünjipü kuklanü püpüki dünjiabahdo, tüshe hoabahkhi Thrünpuhnü yimkhitkhukchoh.

Alomiküp ching Thiyuro-mülakhi

¹⁶ Kheaküshe alomiküp ching thiyuro lapung ching mihbukmuyuk lakhi inü ngü, tüsho thiyuro-lungki ching she mihbukmuyuk lakheah.

¹⁷ Inü lüm, Thrünpuh nü thiyuro tüsho mihbukmuyuk mahkhapbah, tümüde yihnüpü lüpdükhi tüsho rhimo lüpdükhi thsungkheak apinü kim khülang akhukhita lah.

¹⁸ Inü mihtsürü dünkheak I mulong ching lümkhi ju, arübo shiwühbo ah de ahuhpü Thrünpuhnü arü ki rükakheahkhi lah.

¹⁹ Tümüde mihtsürü tüsho shiwühbo kuhi-shihcham rukhüh lang ah; khürü shesho, püpürü she shechoh. Arü alala sheak rukhüh lah, tüsho shiwühbo kurungkheak mihtsürübo alü tümü müla; tümüde alala akeangkeang.

²⁰ Alala dangpung khülang ching yüchoh; alala asungthulung chingnü ah, tüsho alala asungthulung kamlochoh.

²¹ Mihtsürü me akulim yükihcho shi tüsho shiwühbo me alo lim yüzahchonü shepünü mükheahla?

²² Jumonü alalanü arü rhimo ching asühachihpü kheak hode tümü atsüdak müla, tümüde ju arü shihcham lah; arü dunglim tümü labanü shepünü arü ki handarü angüshihkhukba?