T H S AN GYU T H S AN GR ARÜ 2 - AMÜSÜH HÜM CL Bible (BSI)

¹ Inü I küdah thsüde lüm, “ Kheakü arang, inü shih asühkhi rükakia kheahanü; nü asühang.” Tüshe kheaküshe ha she akeangkeang lakheah.

² Inü keangrümünekhi dünkheak tha, “Ha bünkeangbünru ah,” tüsho shih asühkhi dünkheak, “Ha tümü yihnüpü la?”

³ Yukhunü I pang asühshihpü thsüde tüsho küde thsah makhakhi kheak ramloba, thüning bukkhüp mihtsürübonü arü rhangdung lakhi nimung anükhüh kim ching tümü atsü rhimobeanü inü müyimkhityi khiungde inü I lümlung bede I lümkhi yimdo.

⁴ Inü rhimobo ato thsü; inü thüyambo thsü tüsho I thsungkheaknü kurungasolubo thsü;

⁵ inü shahwünbo tüsho danawupungbo thsü tüsho ju ching sangaso dungbo mungji abande khim.

⁶ Sangdung mukhuhkhi ke duhpü thsüde kekungbo kiu.

⁷ Inü athrürü tüsho aliberü azhorübo thulo tüsho I yam chingnü azübekhi azhorübo lakheah; kheaküshe I müngüh Jirusalem ching larü kheaknü alü I moshi tüsho mihnu boto ato lakheah.

⁸ Kheaküshe inü I thsungkheak shotoyinchi le suna tüsho kiulongthsürü tüsho lomibo rahpung hanmukhung; khün thsürübo, athrürü tüsho aliberü chido lakheah, shih asühde la tüsho hanniuberü ahihdo lakheah.

⁹ Junangde I ato kam tüsho Jirusalem ching I müngüh larü alala zhihode kam; kheaküshe I lümlung I kheak lakheah.

¹⁰ I müknü akünkhibo chingnü inü mutuklo; shih asühkhi tümü chingnü she inü I mulong muwuhlo, tümüde inü arhimokhi alala ching I mulongnü asühkhi ngü, tüsho ha I rhimo thsungkheaknü I thsambah lakheah.

¹¹ Judüki I khahnü arhimokhi alala tüsho kim bahde ju rhimokhibo inü lümakheah, tüsho kheaküshe, alala akeangkeang tüsho apung dunglim müshamkhi lakheah, tüsho alomiküp ching alü thsüpü tümü she mülakheah.

¹² Jumonü inü lümlung tüsho bünkeangbünru le makhakhi lümakheahpü rholo; tümüde kiulongthsüpuh müthrirü mihtsürünü tümü thsükhukpü? Apinü rhimoabahkhi lang ah.

¹³ Judüki amiting kheaknü ayin atsübe lakhi ruk makhakhi kheaknü lümlung atsübe inü ngü.

¹⁴ Lümlung larü a arü ku ching mük kihlah, tüshe makharübo a amiting ching tsahchoh. Tütüshe arü alala kuhi-shihcham rukhüh lang ah de inü mükheahdo.

¹⁵ Judüki inü I küdah thsüde lüm, “Makharü ki tümü dünjichonü I ki she adünjibah; dale tüsho tümü thsüpü I khide lümlung lakhea?” Tüsho ha she akeangkeang de inü lüm.

¹⁶ Tümüde makharü nangde lümlung larü mihtsürü ashangkhüh mülümkhit; arübe nimung ching ane chido mihabahbah. Makharü nangde lümlung larü she ashebah.

¹⁷ Jumonü inü rhangdung thraneanlah, tümütüsho alomiküp ching tümü rhimokheanü I thsünüdo; tümüde alala akeangkeang tüsho apung dunglim müshamchoh.

¹⁸ Inü alomiküp ching rhimokhi alala thraneanabahdo, tümütüsho inü jurü I dunglim arübuh kilim zojihbeah.

¹⁹ Tüsho api lümlung larü mihtsürü laba shi makharü labanü shepünü mükheahla? Tütüshe alomiküp ching inü arhimokhi tüsho I lümlung ahorikhi alala kurungkheak arünü aputungrü thsübah. Ha she akeangkeang.

²⁰ Jumonü inü rholobah inü alomiküp ching rhimokhi alala dünkheak mulong ashide kam,

²¹ tümütüsho kim khülang ching khürünü lümlung tüsho mükheahmudu le kukhiuknü arhimokhi, ju mürhimorü püpürü reangkeamde asühshihpü zojihbah. Ha she akeangkeang tüsho kuhi amütsü lah.

²² Mihtsürübonü alomiküp ching rhimokhi tüsho mulong rozhak alala chingnü tümü alü ngücho?

²³ Tümüde arü nimungbo alala thsününü milah, tüsho arü rhimobo küpkhuk khülang ah; azhing ching she arü lümkhi sühakhim müla. Ha she akeangkeang.

²⁴ Mihtsürübo thsungkheaknü atsühpü tüsho ayungpü, tüsho arü rhimokhi ching asühachihkhi kheak hode tümü atsübe müla. Ha she Thrünpuh khah chingnü ah de inü ngü;

²⁵ tümüde api mübede shepünü atsühpü yungsho asühachihpü kukla?

²⁶ Tümüde shepünü api asühshihchonü Thrünpuhnü lümlung, mükheahmudu tüsho asühpü jihchoh; tüshe aneakrü kilim a Thrünpuh asühshihrü kilim jihshihpü lang, apinü hanmukhungpü tüsho wumujungpü rhimo jihchoh. Ha she akeangkeang tüsho apung dunglim müshamkhi khülang ah.