T H S AN GYU T H S AN GR ARÜ 11 - AMÜSÜH HÜM CL Bible (BSI)

Lümlung Larü Mihtsürü Rhimo

¹ Ke kheaknü yikhap yüshang, tümüde nimung ashang dunglim nünü ju ngülobah.

² Nü shihcham thüne, yungsho tizheah chamnakang, tümüde alomi kheak thsümütsü tümü arübanü nünü mümükheah.

³ Amo ju kenü misho, alomi kheak tsüng arüshihchoh; sangdung khülang düjinglim yungsho dukulim keamsho, sangdung kükheak keamkheanü, ju kheak yapbah.

⁴ Shepünü apung kheahde lachonü mümükhean; tüsho shepünü amobo aleangbanü müyimlu.

⁵ Berü nuyam ching sheak ju pang ching küruk arüchonü nünü mümükheahkhi nangde, shepünü lüpdükhi thsüchonü, Thrünpuh rhimo nünü mümükheah.

⁶ Yapsu limnü müjih hiuang, tüsho arelim nü khah dütuklo; tümüde küpü tsübanü nünü mümükheah, ha yungsho hoju, yungsho ane chido tsüpü kuklah.

⁷ Ayin ju niunglah, tüsho müknü ani kheahpü tsülah.

⁸ Sherü kam ahihdo lachonü jurü alala ching asühshang; tütüshe amiting nimungbo ahihbe labah de arünü lümkhitshang. Alala arükhi ju akeangkeang.

Athunurü ki Athsunganah

⁹ Athunu mihtsürü, nü athunu kim ching asühang, tüsho nü athunu nimungbo ching nü mulong asühshang. Nü mulongnü abekhi tüsho nü müknü angükhi yanang, tüshe harü alala thsungkheak Thrünpuhnü mahkhap ching hande arübah de mükheahang.

¹⁰ Jumonü, nü mulong chingnü mulong rozhak bahang, tüsho nü pang chingnü thsünü tsoshang; tümüde azürü tüsho athunu rhangdung akeangkeang.