T H S AN GYU T H S AN GR ARÜ 1 - AMÜSÜH HÜM CL Bible (BSI)

Rhangdung ha Akeangkeang

¹ Jirusalem ching kiulongthsüpuh David tsührü Thsangyuthsangrarü yubo.

² Akeangkeang, akeangkeang, Thsangyuthsangrarünü tha, akeangkeang, akeangkeang! Alala akeangkeang.

³ Mihtsürünü ani khüp rhimokhi chingnü tümü alü ngücho?

⁴ Lün khülang tsochoh, tüsho lün püpü arüchoh, tüshe alomi lünnü lah.

⁵ Ani akhiukchoh tüsho ani yüzahchoh, tüsho akhiukpung niokheamde yüchoh.

⁶ Apungnü düjinglim yünchoh tüsho dukulim mükamde yüchoh; mükamphülapde apung yünchoh, tüsho amüheanpungnü apung alode arüchoh.

⁷ Ayung alala keto ching bukyukchoh, tüshe keto mümi; kebo ju anü ching yülochoh tüsho mutuklode bukchoh.

⁸ Alala mukhiukmulukbe lang ah; khürünü athakhukbe kheaknü alü; angükhinü mük mümi yungsho asokhinü nükhün mümi.

⁹ Tümü dünjikheanü adünjilobah, tüsho tümü rhimodünü ju arhimolobah; alomiküp ching tümü she aso müla.

¹⁰ Ha ruk thakhi tümükhüh aso la shi, “ Kheahang, ha aso ah”? Isa müngüh lünbo ching ha dünjiabahdo.

¹¹ Adüso mihtsürübo mülümkhit, yungsho arüpü lakhi mihtsürübo arü dunglimrünü mülümkhit.

Lümlung ju Akeangkeang

¹² I, Thsangyuthsangrarü, Israel kurungkheak Jirusalem ching kiulongthsürü lachoki,

¹³ thüning bukkhüp rhimokhi alala lümlung hode ayimkhitpü inü lümkih; Thrünpuhnü mihtsürü kheak kuhi amütsü zojih-a lah.

¹⁴ Ha lomiküp ching rhimobo alala inü ngüdo; tüsho kheahang, alala akeangkeang ah, tüsho apung dunglim müshamchoh.

¹⁵ Tümü khürangdo lanü mümukhiungshihkhuk, tüsho tümü mülade lanü mükhekhuk.

¹⁶ Inü I küdah thsüde lüm, “ I müngüh Jirusalem ching larü kheaknü alü I lümlung ato lah; tüsho I lümkhi ching lümlung tüsho mükheahmudu lakhi dünjiakheahkhi ato lado.”

¹⁷ Lümlung tüsho bünkeangbünru le makhakhi dükeak mükheahpü inü lümakheahdo. Tüshe ha she apung dunglim müshamkhi ruk inü anikhitdo.

¹⁸ Tümüde lümlung ahihdo ching küpkhuk ahihdo lah, tüsho shepü mükheahmudu alü kamchonü mulong rozhak alü kamchoh.