DANIEL 8 - AMÜSÜH HÜM CL Bible (BSI)

Namfimihnupung tüsho Mihnu Michih

¹ Kiulongthsüpuh Belshazzar kiulongthsü kam asampü ching I, Danielnü michih mahnepü ngü.

² Michih ching inü kheahde alakheah tüsho I ju Susa kiuying, Elam lomi ching lade ngü, tüsho I Ulai ayung ki lakheah.

³ Inü abinkih-a kheah tüsho namfimihnupung khülang ayung yean zhipkhi ngü. Ju ajuh mahne kihde alakheah. Ajuh ane chido ashang lakheah, tüshe khülang ju püpü kheaknü ashangbe lakheah, tüsho ashangbe ju ashude akhiuk.

⁴ Namfimihnupung junü aniyüzahlim tüsho dukulim tüsho düjinglim khude inü ngü. Ju thsolopü tümü shiwüh she mülakheah, tüsho shenü she ju wu chingnü mütsokhitkhuk; apinü alümkhi nangde apinü rhimo tüsho müküpde kam.

⁵ Inü kheahde lachoki, aniyüzahlimnü mihnu pung khülang alo müqiude alomi athrünkhi hode arü. Mihnu ju amükbo dükeak ajuh khülang lakheah.

⁶ Api ju ayung ki zhipkhi inü ngüde alakhi ajuh mahne kihkhi namfimihnupung kilim arü, tüsho alihde yübah abukakhiukde khang.

⁷ Api ju namfimihnupung kilim yüde inü ngü. Abukakhiukde namfimihnupung juh mahne khushakjih. Namfimihnupungnü ju nanlopü wu müla; namfimihnupung ju alo kheak nimmülün tüsho ju kheak jung, tüsho api wu chingnü namfimihnupung khümkhitpü she mülakheah.

⁸ Jushu mihnu pung ju khide tode kam; tüshe api wu changkhi ching, ajuh atobe zhakabah, tüsho ju müthri ajuh phüyi akhiukbah thrip phüyi ching abina lakheah.

⁹ Arü bolung khülang chingnü ajuh püpü anikhüh khülang akhiuk, ju düjinglim, aniakhiuklim, tüsho müretahkhi lomi lim khide tode kam.

¹⁰ Hoju yinmi bonungrü lokhüh zokih. Junü bonungrü khürü tüsho chiningbo alomi ching jipkhi, tüsho arü kheak jung.

¹¹ Yinmi bonungrü yakzanshuhbuh she azhihde bukakhiukde rhimo; api kheaknü mutukzhakde taka kingaünkhi lude tso tüsho api arüngyam lahyuka bahjih.

¹² Nimung aban dükde kingaünpü müthri mihtsürünü neak yihbeak, tüsho thiyuro kingaün ju alo kheak jipkhi. Rhimo lüpdükhi ching akuk ngüde alakheah.

¹³ Judüki amüsühbuhnü asukkhi inü so, tüsho püpü amüsühbuhnü khülang ki ju asuk, “Taka kingaünkhi, zhikabahshihde neak yihbeakkhi, arüngyam tüsho yinmi bonungrü jungpü michih ha külokhüh laba?”

¹⁴ Tüsho apinü anihbuh ki tha, “ Nimung 2300 thsungkheak ah; jushu arüngyam ju müsühkhitlobah.”

Yunirü Gabrielnü Michih Thanakkhi

¹⁵ Küyimki I, Danielnü michih ngükhea, inü ju anikhitpü mürang. Judüki khürü mihtsürü nangde I miki akhiuka zhip,

¹⁶ tüsho Ulai ayung ki mihtsürü khülang düsheak jikhi inü so, “Gabriel, ha buh mihtsürü ki michih ha anikhitshang.”

¹⁷ Jumonü I zhippung phünide api arü; tüsho küyimki api arükhea, I trede kam tüsho alo ching yap. Tüshe apinü I ki tha, “ O mihtsürü tsührü, michih ha akheam kim thsungkheak ah de anikhitang.”

¹⁸ Apinü I ki asukde lachoki, I miro alo lim abinbah yapshea lakheah; jushu apinü I qiu tüsho I langde zhipshih.

¹⁹ Apinü tha, “Aniang, tüsho bukakhiukkhi kim dunglim tümü dünjibanü inü nü ki thabah; tümüde ha akheam kim akhukhitkhi dünkheak ah.

²⁰ Nünü angükhi ajuh mahne kihkhi namfimihnupung thsungkheak ju, harü ha Midia tüsho Persia kiulongthsürübo ah.

²¹ Mihnu pung ju Greek kiulongthsüpuh, tüsho amükbo dükeak ajuh ato ju akhuh kiulongthsüpuh ah.

²² Azhakkhi shihjuh, küpü müthri püpü phüyi akhiukkhea, api trükshih chingnü kiulongthsü phüyi asürübah, tüshe api wu nangde müla.

²³ Arü yakzan shuhkhi akheam ching, küyimki athsümünimrü arü mihbukmuyuk thülünde akambanü, jak mitingkhi, rükmütsü kiulongthsürü khülang asürübah.

²⁴ Api wu ato labah tüshe anihbuh wunü yung; tüsho apinü arhimokhi ching akuk ngübah, tüsho wulakhi mihtsürü tüsho amüsüh mihtsürü thsümünimbah.

²⁵ Api rüknü api rük-thsükhi ching akuk ngübah, tüsho anihbuh lüm ching api zangrü shilobah. Mümükheahshihde apinü ahihdo thsümünimbah; tüsho apinü kiulongthsürü kheaknü kiulongthsürü she azhihbah; tüshe mihtsürü khahnü yungde api thsümünimbah.

²⁶ Arebo tüsho yapsubo dünkheak michih thakhi ju thiyuro. Tüshe michih ju yümdoa zoang, tümüde ha dünjipü nimung ahihkhüh lah.”

²⁷ Jumonü I, Daniel lümthsünüde kam tüsho nimung anükhüh tukthsüde yap; jushu inü asürü tüsho kiulongthsüpuh rhimo thsungkheak yü. Tüshe michihnü I yingyingabah tüsho ju manikhit.