DANIEL 6 - AMÜSÜH HÜM CL Bible (BSI)

Daniel Kekhüzü Yam ching

¹ Dariusnü kiulongthsü kurungkheak kovünor 120, kiulongthsü alala ching zopü mulongkhit,

² tüsho arü kurungkheak kiuthsürü Daniel bede mahsam; junangde kiulongthsü ju kukshah mülapü thsüde harü kilim kovünorbonü mütsanmükhia jihpü lakheah.

³ Daniel ha püpürü kiuthsürü tüsho kovünorbo kurungkheaknü büthsüde kam tümütüsho me atsüdak api kheak lakheah, tüsho kiulongthsüpuhnü kiulongthsü alala kurungkheak api mokhitpü lümkhi thsü.

⁴ Jumonü kiuthsürü tüsho kovünorbonü kiulongthsü dünkheak Daniel azhihde atsangpü jing-thrümpung yimkhitpü mürang. Tüshe arünü atsangpü thsungkheak jingthrümpung yungsho athsümünim tümü müyimkhit, tümütüsho api thülünde alakheah, tüsho sheakmadukkhi yungsho athsümünim tümü api kheak müyimkhitkhukde alakheah.

⁵ Harü mihtsürübonü tha, “Api Thrünpuh kinkhi kheak khüh yungsho, isanü ha Daniel kheak azhihde tümü müyimkhitkhuk.”

⁶ Jumonü kiuthsürü tüsho kovünorbonü kiulongthsüpuh kilim müjimde arü tüsho tha, “ O kiulongthsüpuh Darius, kutsüpde laang!

⁷ Kiulongthsü yo kiuthsürü alala, khiukdahkhibo tüsho kiuthsü-kovünorbo, lümthiyan-jihrü tüsho kovünorbonü kiulongthsüpuhnü thiyuzüng tüsho thiyukhüm khülang thsüshihpü mulongarihdo, junangde shepünü nü hobah thrünpuh yungsho mihtsürü ki nimung samrü dükeak ching tamkhüntamnübanü, O kiulongthsüpuh, kekhüzübo yam ching jipyukbeah.

⁸ Kheakü, O kiulongthsüpuh, thiyukhüm hüm kheak mütsan dokihang, junangde Midiarü tüsho Persiarü yakzan yande, küpü mübahkhukbe lanü, ju mümüthrikhuk.”

⁹ Jumonü kiulongthsüpuh Dariusnü mütsan-hüm tüsho thiyukhüm kheak mütsan dokih.

¹⁰ Mütsan-hüm kheak ju dokihdo de Danielnü mükheahkheah she, apinü mutuklode api yam ching yü, küpü Jirusalem limpeang akube khiungshak ching ayinripitbo lakhea, tüsho apinü püpüki rhimokhi nangde api Thrünpuh ki tamkhüntamnüde api shijihpü nimung chingnü mahsam ki khukning.

¹¹ Arübonü arü tüsho Danielnü api Thrünpuh miki mihmüthsüm kheangde tüsho tamkhüntamnüde ngü.

¹² Jushu arünü kiulongthsüpuh ki yü tüsho thiyukhüm dünkheak tha, “ O kiulongthsüpuh! Khürünü khürü ki, thrünpuh yungsho mihtsürü ki nü hobah nimung samrü dükeak ching tamkhüntamnüsho, O kiulongthsüpuh, kekhüzübo yam ching jipyukbah de nünü thiyukhüm kheak mütsan müdokih de?” Kiulongthsüpuhnü alo, “Am, ju Midiarü tüsho Persiarü yakzan mümüthrikhukbe thiyukhüm lah.”

¹³ Judüki arünü kiulongthsüpuh ki alo, “Juda chingnü ramtsorü bolung khülang, Danielnü nü ki yungsho nünü mütsan-dokhi yukhüm mani, O kiulongthsüpuh, tüshe apinü nimung ching mahsam ki tamkhüntamnüchoh.”

¹⁴ Küyimki kiulongthsüpuhnü ha thakhi sokhea, api khide lümthsünüde kam. Apinü Daniel khümkhitpü lümkih, tüsho ani yüzah khiungde api khümkhitpü anihbuhnü lüpdükhi rhimoakheah.

¹⁵ Jushu arünü kiulongthsüpuh ki arü tüsho api ki tha, “Mükheahang, O kiulongthsüpuh, kiulongthsüpuhnü athsükhi yukhüm yungsho yuzüng mümüthripü Midiarü tüsho Persiarü yakzan lah.”

¹⁶ Judüki kiulongthsüpuhnü thiyukhüm jih, tüsho Daniel bedarübah kekhüzübo yam ching jipyuk. Kiulongthsüpuhnü Daniel ki tha, “ Nünü thülünde tankihkhi nü Thrünpuhnü nü bekhitshang!”

¹⁷ Lung khülang ludarübah kekhüzüyam mün kheak hüpdo, tüsho kiulongthsüpuhnü anihbuh yingkhüm tüsho api putungrübo yingkhümnü Daniel dünkheak tümü mümüthrishihpü ju kheak amütsan yümkih.

¹⁸ Jushu kiulongthsüpuhnü ayam ching yü tüsho khümkeak thsüde tsüngre hoshih; apinü tsühyungpü tümü mütsüh, asühako müla tüsho yapshede müyü.

¹⁹ Jushu, ayinkhichoki, kiulongthsüpuhnü asürü tüsho niokheamde kekhüzübo yam lim yü.

²⁰ Küyimki api Daniel lapung kekhüzü-yam thüninde arükhea, apinü tripnede Daniel ki zhi, “ O Daniel, arhang Thrünpuh yamlarü, nünü thülünde tankihkhi nü Thrünpuhnü kekhüzübo chingnü nü bekhitkhuknah?”

²¹ Danielnü kiulongthsüpuh ki tha, “ O kiulongthsüpuh, kutsüpde laang!

²² I Thrünpuhnü api yunirü arüshihbah kekhüzübo mün khimdoshih, junangde arünü I muyuri, tümütüsho I api miki amülim mülade ngü; tüsho nü miki she, O kiulongthsüpuh, inü amülim tümü mürhimo.”

²³ Judüki kiulongthsüpuhnü khide asüh tüsho kekhüzü-yam chingnü Daniel bekhitpü thiyukhüm jih. Jumonü Daniel ju kekhüzü-yam chingnü bekhit, tüsho api kheak yurikhi tümü müngü, tümütüsho apinü api Thrünpuh kheak kin.

²⁴ Kiulongthsüpuhnü thiyukhüm jih, tüsho sherünü Daniel amülim jihkheanü bedarübah kekhüzübo yam ching jipyuk–arü, arü tsührü, tüsho arü niuberübo kekhüzübo yam abolim mukhiungyide kekhüzübonü arü kheak jukkih tüsho arü robo alala adütre kamde yihthünak.

²⁵ Judüki kiulongthsüpuh Dariusnü mihtsürü alala tüsho lomiküp lüpdükhi ching thiyutha trükshih aban kilim thrüt: “ Nüsa tsüde laang!

²⁶ I kiulongthsü ching mihtsürü alalanü Daniel Thrünpuh miki ajanbeah tüsho atrebeah de inü thiyuzüng khülang thsüchoh: Tümüde api arhang Thrünpuh ah, lünnü lah. Api kiulongthsü küyimkishe müthsümünim, tüsho api yakzan shuhkhi akheam müla.

²⁷ Apinü bekhitchoh tüsho khümkhitchoh, apinü yinmi ching tüsho alomi kheak amütsan tüsho khinthiyinbe rhimochoh; tümüde apinü kekhüzübo wu chingnü Daniel khümkhit.”

²⁸ Jumonü hanü Persiarü Darius kiulongthsü tüsho Sairus kiulongthsü kim ching Daniel lalim tsüde kam.