DANIEL 4 - AMÜSÜH HÜM CL Bible (BSI)

Nebukednezar Milim Mahnepü

¹ Kiulongthsüpuh Nebukednezarnü mihtsürü alala, trükshihbo, tüsho alomi ching lakhi thiyutha kilim: Nüsa mungtsü laang!

² Khide Achang Thrünpuhnü I thsungkheak amütsanbo tüsho amüyinsahbebo rhimokhibo inü asühde khechoh.

³ Api amütsanbo küdükhüh ato, api amüyinsahbebo küdükhüh wuto! Api kiulongthsü ju akheam mülakhi kiulongthsü, tüsho api yakzan shuhkhi lün chingnü lün lah.

⁴ I, Nebukednezar, I yam ching sühakhimde tüsho lalim tsüde alakheah.

⁵ Inü milim khülang ngübah I müyinsahshih; yapkiu ching lümzülümdo tüsho michihbonü I müyinsahshih.

⁶ Jumonü I ki milim thanakpü thsüde Babilon lümlung larü mihtsürü alala I miki bedarüpü inü thiyuzüng thsü.

⁷ Judüki kuhikheahrü, wurük-huhrü, thümürü, chining-kherübo tüsho Kaldearü alala bede azah, tüsho inü arü ki thaa huh, tüshe arünü I ki müthanakkhuk.

⁸ Akheam ching Daniel I miki azah–shepü I thrünpuh mung yande Belteshazzar de ajikhea, tüsho shepü kheak amüsüh Thrünpuh me lakhea–tüsho inü api ki milim tha,

⁹ “ O Belteshazzar, wurük-huhrü bolung atobuh, tümütüsho amüsüh Thrünpuh me nü kheak lakhi inü mükheahlah tüsho nü thsungkheak aramyu tümü küpkhuk müla, inü angükhi milim ha lah; I ki thanakang.

¹⁰ I yapkiu ching yapde alachoki I michihbo harü lakheah: Kheahang, alomi phulung ching sangdung khülang inü ngü; ju muliuhde changde alakheah.

¹¹ Sangdung ju tode yükih tüsho müküpde kam, tüsho amuyunü thüning khiung, tüsho alomi athrünkhi akheam chingnü ju ngüde alakheah.

¹² Ayübo ju tsüde alakheah tüsho aso suhdahde alakheah, tüsho ju ching alala thsungkheak tsühyungbe lakheah. Mütüm shiwühbonü ju khüp alam, tüsho thüning wuhnubonü akhahbo ching la tüsho rhangdung lakhi lüpdükhinü ju sangaso tsüh.

¹³ “ I yapkiu ching yapbah michih lachoki, aheangrü, yunirü khülang yinmi chingnü akide inü ngü.

¹⁴ Apinü achangnü zhi tüsho tha, ‘ Sangdung ju kiushakang tüsho akhahbo tsankhiang, ayübo mülakkhiang tüsho aso hiumüzütang; ju khüpnü shiwühbo tüsho akhahbo kheaknü wuhnubo tsoshang.

¹⁵ Tüshe ame le ayingbo mükamde yinchi tüsho müwayinchi liunü hingbah alo ching lashang. Alo ching rimkiu bolung lashang. Ayinkenü api pangshang; tüsho shiwühbo le rimkiu bolung api lashang;

¹⁶ kam thüne api lümkhi mihtsürü lümkhi müla, tüshe shiwüh lümkhi labah.

¹⁷ Ha aheangrü, yunirü khülang yuzüng lah, junangde Khide Achangbuhnü mihtsürü kiulongthsü kurungkheak yakzan shuhchoh, tüsho apinü amulongrü ki jihchoh, tüsho akheamkhibe mihtsürü kurungkheak she zojihchoh de mihtsürü lüpdükhinü amükheahbah.’

¹⁸ Ha I, Nebukednezarnü milim ngükheah. Tüsho nü, O Belteshazzar, thanakkhi amütsan I ki thaang, tümütüsho I kiulongthsü mihtsürü alalanü I ki thanaka müjihkhuk, tüshe nünü kuklah, tümüde amüsüh Thrünpuh me nü kheak lah.”

Danielnü Milim Thanakkhi

¹⁹ Judüki Belteshazzar de ajikhi Daniel ju anükhüh kheak lüm shangmangde kam. Anihbuh lümkhinü api trede kamshih. Kiulongthsüpuhnü tha, “Belteshazzar, milim yungsho thanakkhinü nü trede dükam.” Belteshazzarnü alo, “ I tungpuh, milim ju nü thraneanrü thsungkheak tüsho thanakkhi ju nü riribo thsungkheak lashang!

²⁰ Nünü angükhi sangdung küpü ato tüsho düküngde kamkhea, junangde amuyunü thüning khiung, tüsho ju alomi athrünkhi ching alalanü ngüde alakheah;

²¹ küpü ayübo akhamde lakhea tüsho asobo suhdahkhea, tüsho küpü ching alala thsungkheak tsühyungbe lakhea; küpü khüp mütüm shiwüh alamkhea, tüsho küpü khahbo ching thüning wuhnu lakhea–

²² ju nü ah, O kiulongthsüpuh! Nü tode zokih tüsho düküngde kam. Nü tokhi alü kam tüsho thüning khiung tüsho nü wunü alomi akheambo khiung.

²³ Küyimki kiulongthsüpuhnü kheahde lakheanü, yinmi chingnü yunirü khülang aki tüsho tha, ‘ Sangdung kiushakang tüsho thsümünimang, tüshe ame tüsho ayingbo yinchi tüsho müwayinchinü hingbah rimkiu bolung alo ching yapshang; tüsho ayinkenü api pangshang, tüsho api ju ching shiwüh bolung kam thüne lashang’—

²⁴ athanakkhi ju ha lah, O kiulongthsüpuh, tüsho ha I tungpuh kiulongthsüpuh kheak arükhi Khide Achangbuh yuzüng ah:

²⁵ Nü mihtsürü bolungnü yanabahbah, tüsho nü lapung ju mütüm shiwüh bolung labah. Moshipung nangde nü rim rhipa tsühshihbah, nü ayinke ajipbah, tüsho Khide Achangbuhnü mihtsürü kiulongthsü kurungkheak yakzan shuhchoh, tüsho apinü amulongrü kilim ju jihchoh de nünü manikhityi khiungde kam thüne rünkhitbah.

²⁶ Sangame tüsho ayingbo zolopü thiyukhüm jihkhi nangde, Thrünpuhnü alomi alala yakzan shuhchoh de nünü anikhitshu lang nü thsungkheaknü nü kiulongthsü labah.

²⁷ Jumonü, O kiulongthsüpuh, inü athakhi yanang. Neak yihbeakpü tukloang, tümü alim lanü rhimoang, tüsho zhochihrü ki müthsümang. Junangde nü lalim tsüde alabah.”

²⁸ Ha alala kiulongthsüpuh Nebukednezar kheak dünji.

²⁹ Khinu thürükheak mahne akheam ching Babilon kiulongthsürü-yam kumung api tsahde lakheah,

³⁰ tüsho kiulongthsüpuhnü tha, “ Kheahang Babilon küdükhüh ato a! Ha inü I wu tüsho sühmüh, I müretah tüsho mungthu huhpü I yo kiuying thsükheah.”

³¹ Thiyubo ju kiulongthsüpuh mün ching lade, yinmi chingnü düsheak khülang arü: “ O kiulongthsüpuh Nebukednezar, nü ki ha thado: Nü kheaknü kiulongthsü chamdo!

³² Mihtsürü bolungnü nü yana bahbah, tüsho mütüm shiwüh bolung nü labah. Moshipung nangde nü rim rhipa tsühshihbah, nü ayinke ajipbah, tüsho Khide Achangbuhnü mihtsürü kiulongthsü kurungkheak yakzan shuhchoh tüsho apinü amulongrü kilim ju jihchoh de nünü manikhityi khiungde kam thüne rünkhitbah.”

³³ Judüchokinü Nebukednezar azhihde thiyu ju dünji. Api ju mihtsürü bolungnü yanabah, moshipung nangde rim tsüh, tüsho apang ju ayinkenü pang, tüsho anam ju müleang ghibo lokhüh tüsho api müzan ju wuhnu müzanbo lokhüh chin.

Nebukednezarnü Thrünpuh Shikhi

³⁴ Küyimki ju kim hokhea, I Nebukednezarnü yinmi lim abinkih-a kheah, tüsho I lümlung I kilim alodarü. Inü Khide Achangbuh müngühjih tüsho shijih tüsho lünnü alabuh wüntre jih. Tümüde api yakzan shuhkhi ju akheam müla yakzan shuhkhi lah, tüsho api kiulongthsü ju lün chingnü lün lachoh.

³⁵ Apinü alomi ching larü alala tümü kheyuka müla, tüsho yinmi putungrü tüsho alomi ching larü ki apinü tümü lümlanü rhimochoh. Api khah leanglorü yungsho api ki, “ Nü tümü rhimocho?” de atharü she müla.

³⁶ Ju kim ching I lümlung I kilim alodarü; tüsho I mungthu tüsho I müretah I kiulongthsü müretah thsungkheaknü I kilim jihlo. I yo atorübo tüsho I putungrübonü I yimkhit, I kiulongthsü kurungkheak I lalo, tüsho kheaküshe khide atobo I kilim jihlo.

³⁷ Kheakü I, Nebukednezarnü yinmi kiulongthsüpuh shijih, wüntre jih tüsho müretahshih; tümüde api rhimobo alala alim tüsho api limrobo thiyuro; tüsho kükheangde atsahrü apinü thokheamkhuklah.