DANIEL 3 - AMÜSÜH HÜM CL Bible (BSI)

Suna Mejak tüsho Motrukhi

¹ Kiulongthsüpuh Nebukednezarnü suna mejak achanglim khahnap 60 tüsho atolim khahnap 6 thsü, tüsho ju Babilon lomi, Dura dükhün ching khima zo.

² Judüki apinü kiuthsü-kovünorbo, khiukdahrübo, kovünorbo, athsunganahrübo, rahpung zhimrübo, mahkhaprübo, atorübo tüsho kiuthsü torü püpürü alala apinü thsüa zhipshihkhi mejak müsükhitkhi ching arüshihpü ji.

³ Küyimki harü atorü alala müsükhitpü thsungkheak mukhungkhea tüsho sangthsü miki zhipkhea,

⁴ thiyusheak-jihrünü düsheak achangnü zhi, “Ha nüsanü arhimopü thiyukhüm jihchoh, O mihtsürübo, trükshihbo tüsho thiyutha aban mihtsürübo:

⁵ Nüsanü shihjuh, khungpi, hulipungpung, bingkhung, bingshang, huhpungbo tüsho khün mungji alala düsheak sosho khukningbeah tüsho kiulongthsüpuh Nebukednezarnü thsüa zhipshihkhi mejak kingaünang.

⁶ Shepünü mukhukningba tüsho mükingaünbanü judüchokinü motru ching jipyukbah.”

⁷ Jumonü, arünü khün mungjibo düsheak soakede, mihtsürü alala, trükshih tüsho thiyutha aban mihtsürübonü khukning tüsho kiulongthsüpuh Nebukednezarnü thsüa zhipshihkhi suna mejak kingaün.

⁸ Jumonü, ha kim ching Kaldearü khürü mikhuh ching arü tüsho Jihudarü azhihde tha.

⁹ Arünü kiulongthsüpuh Nebukednezar ki tha, “ O kiulongthsüpuh kutsüpde laang!

¹⁰ Nünü thiyuzüng ahiuhdo, O kiulongthsüpuh, sherünü khün mungjibo düsheak sobah mukhukningba tüsho suna mejak mükingaünba,

¹¹ tüsho shepünü mukhukningba tüsho mükingaünbanü motru ching jipyukbah.

¹² Tüshe Jihudarü khürü Babilon lomi kurungkheak nünü azojihkhi– Shadrak, Meshak tüsho Abednego arünü nü ki mihyumani, O kiulongthsüpuh. Arünü nü thrünpuhbo mütankih yungsho nünü thsüa zhipshihkhi suna mejak mükingaün.”

¹³ Nebukednezarnü bukakhiukde Shadrak, Meshak tüsho Abednego bedarüpü thiyukhüm jih. Jumonü arü mihtsürü mahsam ju kiulongthsüpuh miki bedarü,

¹⁴ tüsho Nebukednezarnü arü ki tha, “Shadrak, Meshak tüsho Abednego, nüsanü I thrünpuhbo yungsho inü thsüa zhipshihkhi suna mejak mütankihkhi ju atsütsüa de?

¹⁵ Kheakü nüsanü küyimki shihjuh, khungpi, hulipungpung, bingkhung, bingshang, huhpung tüsho khün düsheak aphuaphu sobanü inü athsükhi mejak kingaünpü thsüde khukningpü thsakhama lasho khide tsülah. Tüsho nüsanü ju mükingaünsho, judüchokinü nüsa motru ching ramyukbah. Judüki tümü thrünpuhnü nüsa I khah chingnü khümkhitkhukba?”

¹⁶ Shadrak, Meshak tüsho Abednego arünü kiulongthsüpuh ki alo, “ O Nebukednezar, hadürü ching nü miki isanü alopü yihnüpü müla.

¹⁷ Isa motru ching ramyuksho, isanü tankihkhi Thrünpuhnü isa ju chingnü khümkhitkhuklah, tüsho Apinü isa nü khah chingnü bekhitbah, O kiulongthsüpuh.

¹⁸ Tüshe Apinü jude müthsüthsü she nünü ha mükheahang, O kiulongthsüpuh, junangde isanü nü thrünpuhbo mütankih yungsho nünü thsüa zhipshihkhi suna mejak mükingaün.”

¹⁹ Judüki Nebukednezarnü Shadrak, Meshak tüsho Abednego kheak mulong zhipzhip, tüsho arü ki api yakli müthriabah. Apinü motru ju püpüki kheaknü thüne ki alü takshihpü thiyukhüm jih,

²⁰ tüsho Shadrak, Meshak tüsho Abednego rhüka motru ching jipyukshihpü anihbuh bonungrü athrungrü khürü ki thiyukhüm jih.

²¹ Jumonü harü mihtsürübo, arü shulünkhim, khimniuniubo, kuhingbebo tüsho püpü khimmihbo yihbah rhük tüsho motru ching jipyuk.

²² Kiulongthsüpuh yukhüm ju khide aniokheam lakheah tüsho motru khide atakkhinü Shadrak, Meshak tüsho Abednego shuhyukrübo ju monü taksah,

²³ tüsho harü mihtsürü mahsam ju düngdüng rhükbah motru ching yüzahshih.

²⁴ Judüki kiulongthsüpuh Nebukednezarnü müyinsahde jukmusu tüsho api athsunganahrü ki keokhi, “ Isanü rhükbah motru ching yukkhi thsü arü mihtsürü mahsam yung de?” Arünü alo, “Atsütsünü, O kiulongthsüpuh.”

²⁵ Apinü tha, “ Kheahang! Mihtsürü phüyi mürhükde tüsho tümü müthsüde mo ching mühide atsahkhi inü ngüchoh, tüsho aphüyipü ju Thrünpuh tsührü nangde lah.”

²⁶ Judüki Nebukednezarnü motrukhi ripit ki yü tüsho zhi, “Shadrak, Meshak tüsho Abednego, khide Achang Thrünpuh yamlarübo, akhiukang! Ha kheak arang!” Jumonü Shadrak, Meshak tüsho Abednego arünü mo chingnü akhiuk,

²⁷ tüsho kiuthsü-kovünorbo, khiukdahrübo, kovünorbo tüsho kiuthsü athsunganahrübo arü mükamde shomukhung. Monü arü pang mütakkhi yungsho arü kuyü mümuliukhi arünü ngü; arü shulünkhimbo mütakatsük tüsho arü kheak mo-rhüm mümünimde alakheah.

²⁸ Judüki Nebukednezarnü tha, “Shadrak, Meshak tüsho Abednego Thrünpuh shiang, shepünü Api yunirü thiyi tüsho api yamlarübo khümkhit! Arünü api kheak kin tüsho kiulongthsüpuh yukhüm mani tüsho arü Thrünpuh kheak hobah püpü thrünpuhbo tankihde mükingaünpü rhangdung shuhmülanga jih.

²⁹ Jumonü trükshih khürü mihtsürü yungsho thiyutha shepünü Shadrak, Meshak tüsho Abednego Thrünpuh azhihde tümükhüh thabanü adütre kamde akhapbah tüsho arü yambo sünit-bahpung kamshihbah de inü thiyuzüng khülang thsüchoh, tümüde püpü thrünpuh shenü she hanangde mükhümkhitkhuk.”

³⁰ Judüki kiulongthsüpuhnü Shadrak, Meshak tüsho Abednego Babilon lomi ching shuhkihjih.