DANIEL 11 - AMÜSÜH HÜM CL Bible (BSI)

¹ Tüsho I, Midiarü Darius kam akhuhbe ching api rungpü tüsho reangzahshihpü zhip.

Ijip tüsho Siria Kiulongthsü

² “Tüsho kheakü inü nü ki thiyuro thabah. Kheahang, kiulongthsürü mahsam Persia ching asürübah; tüsho aphüyipü khülang ju arü alala kheaknü khide alarü labah; tüsho küyimki api lakhitbo hode api sühmüh lade akambanü, apinü Greek kiulongthsü alala azhihde rhumüneanbah.

³ Jushu wuto kiulongthsürü khülang asürübah, wu lade yakzan shuhbah tüsho api lümkhi yande arhimobah.

⁴ Tüshe api wu achang chingnü api kiulongthsü thsümünimbah tüsho shihcham phüyi thsüde achamnakbah. Api kheaknü arükhi kiulongthsürübonü yungde api müthri yakzan shuhbah, tüshe api lakhi nangde arü wu mülade alabah.

⁵ “Judüki düjinglim kiulongthsüpuh müküpde alabah, tüshe api torü khülang api kheaknü amürangbe labah tüsho api kiulongthsü kheaknü wu ato lade yakzan shuhbah.

⁶ Kam anükhüh dunglim arünü arihako khülang thsübah, tüsho düjinglim kiulongthsürü tsührübenü dukulim kiulongthsürü ki thiyuchihchimpü arübah. Tüshe anihbe wu mülade alabah tüsho api arihakokhi tsüpde müla. Judüki anihbe tankihrü aniubuh tüsho atsührü laksahbah.

⁷ “Anihbe yamkhün chingnü alibe müthripü khülang asürübah. Apinü dukulim kiulongthsüpuh bonungrü yanbah tüsho api chipi ching yüzahbah; apinü arü bede keochihbah tüsho akukbah.

⁸ Apinü arü thrünpuh mejakbo tüsho thrünpuhbo kilim müsühkhitkhi suna tüsho shotoyinchi kukrukbo Ijip lim hanlode ayübah. Tüsho kam anükhüh kheak apinü dukulim kiulongthsüpuh yanpü chingnü atuklobah.

⁹ Judüki dukulim kiulongthsüpuhnü düjinglim kiulongthsüpuh kiulongthsü ching arübah tüshe anihbuh lomi lim alode ayübah.

¹⁰ “Api tsührübonü thirithsüpü thsakhambah tüsho bonungrü boto ato bemukhungbah, keking nangde arübah tüsho api chipi khiungde thirithsübah.

¹¹ Judüki düjinglim kiulongthsüpuhnü bukakhiukde akhiukbah tüsho dukulim kiulongthsüpuh ki keochihbah, tüsho apinü boto ato bemukhungbah, tüshe ju api khah ching jihbah.

¹² Apinü akukkhi tüsho apinü bonungrü hihde alaksahkhi dünkheak apinü kükheangbah, tüshe ju ruk langa akuk müngü.

¹³ Tümüde dukulim kiulongthsüpuhnü atan kheaknü kheaküshe ahihbe boto bemukhungbah, tüsho kam anükhüh dunglim apinü bonungrü ato tüsho kukruk suhdahde lubah arübah.

¹⁴ “Judüki kim ching ahihdonü düjinglim kiulongthsüpuh azhihde wusurübah, tüsho nüsa bolung athsümünim mihtsürünü michih dünjishihpü thsüde arü zangrü shuhkihbah; tüshe arünü mukuk.

¹⁵ Jumonü Siria kiulongthsüpuhnü chipi ayünkhi kiuto yanpü thsakhambah tüsho ju yanbah. Ijip bonungrünü mutuklode mükeochih; arü bolung atsüdakbebo she sühmüh mülade akambah.

¹⁶ Tüshe shepünü api azhihde arüchonü anihbuh lümkhi nangde athsübah, tüsho shenü api müngüh müzhip, tüsho api müretah lomi ching zhipbah, tüsho ju alala api wu ching labah.

¹⁷ Apinü kiulongthsü sühmüh athrünkhinü arüshihpü lümbah, tüsho apinü mungtsü hande arübah tüsho jurü rhimobah. Kiulongthsü thsümünimpü thsüde apinü anihbuh ki aliberü rhangshihbah; tüshe api lümkhi akuk müngü.

¹⁸ Jushu apinü keyean lomibo kilim rholobah, tüsho ahihdo yanbah. Tüshe limthobuh khülangnü api bukmükekhi akheam thsüshihbah; atsütsü api bukmükekhi api kheak yülobah.

¹⁹ Jushu apinü nihbuh lomi chipi ayünkhibo lim rholobah, tüshe api jing mükhebah, tüsho alungbah, tüsho müngülode alabah.

²⁰ “Judüki kiulongthsü müretahpü thsungkheak ruk-threrü khülang api müthri asürübah; tütüshe nimung anükhüh dükeak ching api laksahbah, tüshe bukakhiukkhi yungsho thirithsü chingnü yung.

Siria Kiulongthsürü

²¹ “Tüsho api müthri mihtsürü amütsü arünü kiulongthsü wüntre müjihpü lakhi asürübah; tüshe apinü tümü mülümkhi kim ching arübah, tüsho rüknü kiulongthsü münita lubah.

²² Api müngüh bonungrübo tüsho Thrünpuh yo Achangbe Amükeambuh she shahde phüta bahbah tüsho alaksahbah.

²³ Tüsho api ki arihakoshu, apinü rük thsüde arhimobah tüsho mihtsürü anükhüh bebah müküpde akambah.

²⁴ Thiyusheak müjihde apinü kiuthsü lakhit dangpung ching azahbah; tüsho api jingyanrü bolung ayankhikhi kukruk chamachih-a lude anihbuh jipürü shenü she küyimkishe mürhimokhi rhimobah. Apinü chipi ayünkhibo kheak azhihde lümkhi thsübah, tüshe kim anükhüh thsungkheak lang alabah.

²⁵ Apinü mulong tode Ijip kiulongthsüpuh yanpü bonungrü ahihdo bemukhungbah, tüsho anihbuhnü mihhihkhi tüsho wulakhi bonungrü bebah keochihlobah. Tüshe Ijip kiulongthsüpuh ju arükyukbah tüsho akuk müngü.

²⁶ Api lümthiyan-jihrünü anihbuh thsümünimbah. Api bonungrü ahihdo laksahbah tüsho phüta bahbah.

²⁷ Judüki kiulongthsürü mahne ju lümkhi amütsü hanbah tsühyungpü dükhüm khülang kheak binbah, tüsho anenü khülangnü khülang ki akeangyu thaachihbah, tüshe ju akuk müngü, tümütüsho ju kim akhukhi mukhiungyi.

²⁸ Siria kiulongthsüpuhnü lakhit ato lubah nihbuh lomi lim alode ayübah, tüshe api mulong ju amüsüh tangzüng azhihde alabah. Apinü nihbuh lümkhi rhimobah, tüsho nihbuh lomi lim alode ayübah.

²⁹ “Akhukhitkhi kim ching api düjinglim yüzahbah, tüshe ju kim ching akhuhlim nangde müla.

³⁰ Tümüde Kittim sangkungbo api azhihde arübah, tüsho api mulong dükheakbah atsolobah. Apinü bukakhiukbah tüsho amüsüh tangzüng azhihde arhimobah. Apinü alode ayübah tüsho amüsüh tangzüng bahyukrü ki anibah.

³¹ Apinü bonungrübo bemukhungkhinü arüngyam le chipi müneanjihbah. Arünü mutukzhakde taka kingaünkhi tukloshihbah tüsho athraneanbe mihtrebe zhipshihbah.

³² Tangzüng bahyukrü ki apinü rüknü abephülapbah; tüshe Thrünpuh ki thiyuro larünü düküngde api thsolobah.

³³ Mihtsürü bolung lümlung larünü ahihdo kilim anikhitkhi jihbah; judüalalashe nimung anükhüh arübo nukshang tüsho motrunü tüsho yande aramkhinü akeambah.

³⁴ Küyimki arü akeambanü, arü arung anikhüh ngübah, tüsho rüklimnü ahihdo arü lung bebah.

³⁵ Lümlung larü khürü akeambah, junangde mihtsürübo akheam kim khiungde changkhitbah, tsangkhitbah tüsho areak mükihde alabah, tümüde akhukhitkhi kim ching ju arübah.

³⁶ “ Kiulongthsüpuhnü anihbuh lümkhi rhimobah. Apinü aküdah thsüde anihbuh shuhkihbah tüsho thrünpuh kheaknü atobe lümbah, tüsho thrünpuhbo bolung Thrünpuh azhihde mükhemükimyu thabah. Bukakhiuk kim muhoyi khiungde api kukzamde alabah, tümütüsho tümü lümkihlanü arhimopü tsütsü.

³⁷ Apinü api jipürü thrünpuh yungsho aliberübonü amuzhokhi ki manijih; apinü püpü thrünpuh ki akin müjih, tümüde apinü alala kheaknü anihbuh atobe de alümbah.

³⁸ Harü müthri apinü chipi thrünpuh ki wüntrebah; api jipürünü mümükheahkhi thrünpuh ki apinü suna tüsho shotoyinchi, shoto lungbo tüsho amo-achak thsambahbonü wüntre jihbah.

³⁹ Chipi amüküpbo apinü khiungkerü thrünpuh arung hode ayanbah tüsho api mükheahrü tode wüntre jihbah. Apinü arübo mihtsürü ahihdo kurungkheak yakzanshuhrü kamshihbah tüsho thsambah khülang thsüde alo jihbah.

⁴⁰ “ Kim akheam ching Ijip kiulongthsüpuhnü api yanbah, tüsho Siria kiulongthsüpuhnü api wu alala, khora-lolungbe, khorabo, tüsho sangkungbo ahihdonü keochihlobah. Apinü düchinü azünkhi nangde lomi ahihkhüh ching yüzahbah.

⁴¹ Apinü akheah atsü lomi ching yüzahbah, tüsho chithürü thürü laksahbah, tüshe Edom le Moab tüsho Amon limberübo api wu chingnü atsokhitbah.

⁴² Apinü lomibo azhihde akhah chungbah, tüsho Ijip lomi mutsokhi.

⁴³ Api ju suna tüsho shotoyinchi rahpungbo, tüsho Ijip lakhi alala yo yakzanshuhrü kambah; tüsho Libyarü le Ethiopiarü api jing ki tsahbah.

⁴⁴ Tüshe aniakhiuklim tüsho dukulim yusheaknü api treshihbah, tüsho apinü bukakhiukde mihtsürü ahihdo laksahbah.

⁴⁵ Apinü keto le akheah atsü amüsüh müzüng dükeak nihbuh kiulongthsü khimyambo thsübah. Tütüshe api rungrü she mülade, api ashebah.