AMOS 5 - AMÜSÜH HÜM CL Bible (BSI)

Mulong Müthripü Jikhi

¹ Inü nü kurungkheak tüzhokhi yu ha aniang, O Israel yamkhün:

² Anünübe Israel masürülopü thsüde lunga lah; anihbe lo kheak bahyuka lah, shenü anihbe mülahmusu.

³ Tümüde Atungpuh Thrünpuhnü ha thachoh: Kiuto khülang chingnü 1000 tsahmusukhi 100 aningbah, tüsho 100 tsahmusukhi chingnü 10 aningbah.

⁴ Tümüde Atungpuhnü Israel yamkhün ki ha thachoh: I yimang tüsho laang;

⁵ tüshe Bethel düyim, tüsho Gilgal ching düyüzah yungsho Beersheba hode düyü; tümüde tsükjide Gilgal ramtso ching yübah, tüsho Bethel tümü mülade akambah.

⁶ Atungpuh yimang tüsho laang, yungsho mo nangde apinü Josep yamkhün azhihde atrumusubah, tüsho hanü Bethel aniubah, shenü ju müzünmüt.

⁷ Nüsa thiyuro akhühsang kamshihrü, tüsho thiyuro-lungki alo kheak jipkhia bahrü ayokhe!

⁸ Shepünü chirhangshuhrü tüsho yamungshuhrü thrünkhea, tüsho zhingdoa amitingkhi ju yapsu kamshihkhea, tüsho animung ju azhing kamshihkhea, Shepünü keto kebo jikhea tüsho alo kheak dungkhitkhea, Atungpuh ju api mung,

⁹ shepünü sühmüh lakhi azhihde athsümünim phürapshih, junangde chipi kheak athsümünim arü.

¹⁰ Arünü chipimurung ching thiyuro mülakhi azhihrü thraneanchoh, tüsho arünü thiyuro asukrü thraneanchoh.

¹¹ Jumonü nüsanü zhochihrü kheak thrüm tüsho arü kheaknü hi jangkhia lu, nüsanü lung phukkhinü thüyambo thsü, tüshe nüsa jurü ching müla; nüsanü kurungaso atsü yangdo tüshe nüsanü jurü yukhu muyung.

¹² Tümüde nüsanü alakmihkhi küdükhühanü, tüsho nüsa neakbo küdükhüh atoanü inü mükheahlah–nüsa shepünü thiyuro-lungkirü thsünüshihcho, shenü buknim lucho, tüsho chipimurung ching müthsümülarü nimhuh-a bahcho.

¹³ Jumonü rük larünü a hadürü kim ching malanchoh; tümüde ha amütsü kim khülang ah.

¹⁴ Amütsü yungde atsü yimang, junangde nüsa alabah; tüsho junangde nüsanü athakhi nangde Atungpuh , Wuto Thrünpuh nüsa lung labah.

¹⁵ Amütsü thraneanang tüsho atsü muzhoang, tüsho chipimurung ching thiyuro lashang; khükijua Atungpuh , Wuto Thrünpuhnü ha trükshih mihtsürü aningkhi kheak müthsümbah.

¹⁶ Jumonü Atungpuh , Wuto Thrünpuhnü ha thachoh: Kiudunglimrobo alala ching atüzhokhi labah; tüsho limtobo alala ching arünü athabah: “Ayokhe! ayokhe!” Arünü thulu thsürübo ki atüzhopü tüsho atüzhosorü ki mitrippü jibah;

¹⁷ kurungasolu alala ching mitripkhi labah, tümüde I nüsa bolung tsahhobah, Atungpuhnü thachoh.

Atungpuh Nimung

¹⁸ Nüsa sherünü Atungpuh nimung künchonü ayokhe! Tümüde nüsanü Atungpuh nimung küncho? Ha amiting ah, ayin yung;

¹⁹ khürü kekhüzü kheaknü tsobah kuto shorukhi nangde; yungsho thüyam ching yüzahbah rhü kheak angükihchoki, phurutonü anguhkhi nangde!

²⁰ Atungpuh nimung ju ayin yungde amiting, tüsho ayinatrüm mülade aliudokhi yung de?

²¹ Inü thraneanlah, inü nüsa thüniobo khenochoh, tüsho nüsa arüngako mukhungbo ching inü masüh.

²² Nüsanü I kilim taka kingaünkhi tüsho hi kingaün jihjih she, inü jurü müleangkhi; tüsho nüsa mungtsü kingaün amüdangkhi shiwühbo kheak inü akheah she mükheah.

²³ Nüsa khün düsheakbo I kheaknü lude tsoang; nüsa bingshang khungkhi inü mani.

²⁴ Tüshe thiyuro ju kebo nangde tüsho thiyuro-lungki ayung ato nangde bukshang.

²⁵ Kam yirü dükeak sunglo ching nüsanü I kilim laksah-a kingaün tüsho kingaünbo hande arüdü de, O Israel yamkhün?

²⁶ Nüsanü nüsa kiulongthsüpuh Sakkuth, tüsho nüsa chining-thrünpuh Kaiwan, nüsanü nüsa thsungkheak thsükhi mejakbo kingaündo;

²⁷ jumonü inü nüsa Damaska hode ramtso ching bede ayübah, Wuto mung lakhi Thrünpuh, Atungpuhnü thachoh.