AMIKHEAKAKHIUKKHI 8 - AMÜSÜH HÜM CL Bible (BSI)

Mütsanyüm Thünepü

¹ Küyimki Namfimihnununü mütsanyüm thünepü khimshuhkhea, kimkhü thripkhüh bande yinmi ching zhikde alakheah.

² Judüki yunirü thüne Thrünpuh miki zhipde inü ngü, tüsho arü kilim hulipungpung thüne jih.

³ Yunirü püpü arü tüsho suna mophuru shuhbah kingaün sadam kheak zhip; tüsho amüsührü alala tamkhüntamnükhi lungnü kiulongthsü-binkiu miki suna kingaün sadam kheak jihpü api kilim rhümthüneabe hihde jih;

⁴ tüsho Thrünpuh miki yunirü khah chingnü rhümthünea mokhüh ju amüsührü tamkhüntamnü lungnü yükih.

⁵ Judüki yunirünü mophuru ju lubah kingaün sadam kheak yo mo yuk tüsho alomi kheak jipa bah; tüsho tsüngmukkhibo, düsheakbo, chinchobe phürapkhi, tüsho muliuyuk lakheah.

Hulipungpungbo

⁶ Kheakü hulipungpung thüne zhimbah alakhi yunirü thünenü amütsü thsakhama lakheah.

⁷ Akhuhbe yunirünü api hulipungpung müt, tüsho aru le mo thiyih lung düsahbah alomi kheak keamkhi; alomi shihcham mahsam ching khülang, tüsho sangdungbo shihcham mahsam ching khülang, tüsho sangrung phüyak alala aniuabah.

⁸ Mahnepü yunirünü api hulipungpung müt, tüsho awung ato nangde, mo trude keto ching jipyuk;

⁹ tüsho keto shihcham mahsam ching khülang thiyih kam, keto ching arhang shiwühbo shihcham mahsam ching khülang sheabah, tüsho sangkungbo shihcham mahsam ching khülang thsümünim.

¹⁰ Asampü yunirünü api hulipungpung müt, tüsho thüning kheaknü chining ato, tsünduphung nangde trude keamkhi, tüsho ju ayungbo shihcham mahsam ching khülang tüsho kenübo kheak keam.

¹¹ Chining mung ju Akhüh. Ke shihcham mahsam ching khülang akhüh kam, tüsho ke khühkhinü mihtsürü ahihdo sheabah.

¹² Aphüyipü yunirünü api hulipungpung müt, tüsho ani shihcham mahsam ching khülang, khinu shihcham mahsam ching khülang, tüsho chiningbo shihcham mahsam ching khülang kheak lak, junangde arü ayin shihcham mahsam ching khülang mitingde kam; nimung shihcham mahsam ching khülang, tüsho azhing she shihcham mahsam ching khülang jude alakheah.

¹³ Judüki inü kheah, tüsho müleangnü thüning phulung phinde achangnü akhungkhi inü so, “Yunirü püpü mahsamnü hulipungpung mütpü lakhi dünkheak alomi ching larübo Are! Are! Are!”