AMIKHEAKAKHIUKKHI 7 - AMÜSÜH HÜM CL Bible (BSI)

Israelrü 144,000

¹ Ha dunglim yunirü phüyi apungnü alomi yungsho keto yungsho sangdung kheak müyünshihpü alomi pungbo tholobah alomi mühit phüyi kheak zhipde inü ngü.

² Judüki yunirü püpü arhang Thrünpuh mütsanyüm shuhbah aniakhiuklimnü akihde inü ngü, tüsho apinü alomi tüsho keto thsümünimpü wu jih-a lakhi yunirü phüyi ki düsheak achangnü zhide ji,

³ “Isa Thrünpuh tankihrü kingkangbo kheak isanü müyümyikia alomi yungsho keto yungsho sangdungbo düthsümünim.”

⁴ Judüki Israel trük alala chingnü 144,000 mütsanyümkhi düsheak inü so.

⁵ Juda trük chingnü mütsanyümkhi 12,000, Reuben trük chingnü 12,000, Gad trük chingnü 12,000,

⁶ Asher trük chingnü 12,000, Naphtali trük chingnü 12,000, Manase trük chingnü 12,000,

⁷ Simeon trük chingnü 12,000, Levi trük chingnü 12,000, Issakar trük chingnü 12,000,

⁸ Zebulun trük chingnü 12,000, Josep trük chingnü 12,000, Benjamin trük chingnü 12,000.

Boto Ato

⁹ Ha dunglim inü kheah, tüsho mihtsürü shenü akhepü mukukkhi, trükshih aban, trük alala, mihtsürü tüsho thiyutha aban chingnü, shulünkhimbo amüye yihbah, arü khahbo ching ashisang düchibo shuhbah kiulongthsü-binkiu miki zhipde alakheah,

¹⁰ tüsho düsheak achangnü zhi, “Akhümkhit ju kiulongthsü-binkiu kheak binbuh isa Thrünpuh, tüsho Namfimihnunu yo ah!”

¹¹ Tüsho yunirü alalanü kiulongthsü-binkiu, azothsürübo tüsho arhang shiwüh phüyi mükamde zhip, tüsho kiulongthsü-binkiu miki arü miro mükhüm tüsho Thrünpuh kingaünde

¹² tha, “Amen! Müngühmühi, müretah, lümlung, makshejihkhi, wüntre, wu tüsho sühmüh lünnü lün isa Atungpuh yo thsang! Amen.”

¹³ Judüki azothsürü bolung khülangnü I ki keokhi, “Harü shulünkhim amüye yihkhibo ha sherü a, tüsho arü küchingnü arükhea?”

¹⁴ Inü api ki alo, “Atobuh, nünü mükheahlah.” Tüsho apinü I ki tha, “Arübo thsümütsü ato chingnü akhiukkheah; arünü arü shulünkhimbo Namfimihnunu thiyih chingnü müsühbah müyedo kamshih.

¹⁵ Jumonü arübo Thrünpuh kiulongthsü-binkiu miki lah, tüsho api arüngyam ching azhing ayin api tankihchoh; tüsho kiulongthsübinkiu kheak binbuhnü arü kümdobah.

¹⁶ Arü kheaküa mükhüm yungsho kemüthüri; aninü yungsho alamlamnü arü mütak.

¹⁷ Tümüde kiulongthsü-binkiu phulung ching Namfimihnunu ju arü neakrü thsübah, tüsho apinü arhang kenü lim arü bebah; tüsho Thrünpuhnü arü mükbo chingnü chike nana bahjihbah.”