AMIKHEAKAKHIUKKHI 6 - AMÜSÜH HÜM CL Bible (BSI)

Mütsanyümbo

¹ Kheakü Namfimihnununü ayümdokhi thüne bolung khülang khimshuhde inü ngü tüsho shiwüh phüyi bolung khülangnü tsüngmuk düsheak nangde athakhi inü so, “Arang!”

² Inü kheah, tüsho I miki khora amüye, abebuhnü sanglüh khülang shuh; kuthran khülang api kilim jih, tüsho apinü akuk ngüpü akuk-ngürü nangde bebah yü.

³ Küyimki apinü ayümdokhi mahnepü khimshuhkhea, mahnepü arhang shiwühnü thade inü so, “Arang!”

⁴ Jushu khora püpü amürüm akhiuk. Mihtsürübo khülangnü khülang laksahachihshihpü thsüde abebuh kilim ju alomi chingnü mungtsü luakhinpü wu jih; tüsho api kilim nukshang ato khülang jih.

⁵ Küyimki apinü ayümdokhi mahsampü khimshuhkhea, mahsampü arhang shiwühnü thade inü so, “Arang!” Tüsho kheahang, khora amürak khülang, abebuh khah ching adünarabe khülang shuhbah alakheah;

⁶ Tüsho arhang shiwüh phüyi bolungnü düsheak khülang inü so, “Nimung khülang mihkhah dün wheat hi khahngak 1, tüsho nimung khülang mihkhah dün barli khahngak 3; tüshe müdangke tüsho kurungasolu düthsümünim!”

⁷ Küyimki apinü ayümdokhi aphüyipü khimshuhkhea, aphüyipü arhang shiwühnü thade inü so, “Arang!”

⁸ Tüsho kheahang, khora amükin khülang inü ngü, tüsho abebuh mung ju Ashekhi lakheah tüsho Athsümüchinü api dunglim yan; tüsho nukshangnü, khümzungnü, arümnü tüsho alomi shiwühbonü asheshihpü shihcham phüyi ching khülang kurungkheak wu jih-a lakheah.

⁹ Küyimki apinü ayümdokhi aphüngüpü khimshuhkhea, Thrünpuh yu dünkheak tüsho arünü thiyumütsan thsükhi dünkheak laksahkhi mebo kingaün sadam khüp inü ngü;

¹⁰ arünü düsheak achangnü zhi, “Wuto Atungpuh, amüsüh tüsho thiyuro, isa thiyih dün alomi ching larü kheak mahkhappü tüsho royimpü külokhüh laba?”

¹¹ Judüki arü aban kilim shulünkhim amüye jih, tüsho arü nangde arü rukhüh tankihrü tüsho keoniorübo laksahpü wühkhe mübanyi khiungde aleangpü tha.

¹² Küyimki apinü ayümdokhi athurukpü khimshuhkhea, inü kheah, tüsho muliuyuk ato lakheah; tüsho ani ju shungliukhim nangde mürakdo, khinu abümnü thiyih nangde kamabah,

¹³ tüsho tsüngkam ching khubasodung kheaknü apung amüküpnü ayünkhikhi sangaso nangde thüning kheaknü chiningbo alomi kheak keamkhi;

¹⁴ thüning ju khiuthulungde kheamabah, tüsho awungbo le kekung-lo aban adangpung chingnü shuhakhin.

¹⁵ Judüki alomi kiulongthsürübo, yakzanshuhrü tüsho bonungrü torübo, alarü tüsho wularü, mihbüm aban, azhorü tüsho zuzu larü lungkhünbo tüsho awung ching lungbo khüp jikde,

¹⁶ awungbo tüsho lungtobo ki ji, “Isa kheak keamang tüsho kiulongthsübinkiu kheak binkhi, tüsho Namfimihnunu bukakhiukkhi kheaknü isa jikshang;

¹⁷ tümüde arü bukakhiukkhi nimung ato arüdo, tüsho shepünü ju müngüh zhipkhukba?”