AMIKHEAKAKHIUKKHI 4 - AMÜSÜH HÜM CL Bible (BSI)

Yinmi ching Kingaün

¹ Ha dunglim inü kheah, tüsho kheahang, yinmi ching ripit khülang khimshuh-a lakheah. Tüsho hulipungpung nangde I ki thade inü asokhi akhuhbe düsheaknü tha, “Ha kheak akihang, tüsho ha dunglim tümü dünjipü lanü inü nü ki huhbah.”

² Judüakede I Me ching lakheah, tüsho kheahang, mihtsürü khülang binbah yinmi ching kiulongthsü-binkiu khülang akhiuk.

³ Tüsho ju kheak binbuh ju asherühü tüsho shotolung-thüyin nangde, tüsho kiulongthsü-binkiu mükamde shotolung-phüyak nangde mürechin khülang lakheah.

⁴ Kiulongthsübinkiu mükamde kiulongthsü-binkiu mukukheak phüyi, tüsho kiulongthsübinkiu kheak binkhi ju amüye khimmih yihbah, arü ku kheak suna kuthran thrankhi azothsürü mukukheak phüyi lakheah.

⁵ Kiulongthsübinkiu ching junü chinchobe düsheakbo tüsho tsüngmukbo akhiuk, tüsho kiulongthsü-binkiu miki Thrünpuh me thüne, tsünduphung thüne lakheah;

⁶ tüsho kiulongthsübinkiu miki ju lungmüsang ruk meayingpung keto nangde alakheah. Tüsho kiulongthsü-binkiu mükamde, thrip aban arhang shiwühbo, müngüh tüsho dunglim mükbo kihbah alakheah:

⁷ akhuhbe arhang shiwüh ju kekhüzü nangde, mahnepü arhang shiwüh moshipung nangde, asampü arhang shiwüh mihtsürü miro kihde, tüsho aphüyipü arhang shiwüh ju aphinkhi müleang nangde alakheah.

⁸ Tüsho arhang shiwühbo aban arü ghidükeang thuruk alunglim tüsho aleanglim mükjibonü lüpchimbah, animung tüsho are khün thsüpü küyimkishe mutuklo, “Atungpuh Wuto Thrünpuh ju, amüsüh, amüsüh, amüsüh lah, Shepü alakhea, tüsho la, tüsho arüpü la.”

⁹ Tüsho küyimki arhang shiwühbo kiulongthsü-binkiu kheak binkhi, lünnü lün labuh kilim müretah, wüntre tüsho makshe jihbanü,

¹⁰ azothsürü mukukheak phüyinü kiulongthsü-binkiu kheak binbuh miki khukning tüsho lünnü lün labuh kingaün; arünü kiulongthsübinkiu miki arü kuthranbo yihkhide khün thsü,

¹¹ “Isa Atungpuh tüsho Thrünpuh, müretah, wüntre tüsho wu leangkhipü nü athülün ah, tümüde nünü alala thrün, tüsho nü lümkhinü arü thrün tüsho rhangdung lah.”