AMIKHEAKAKHIUKKHI 21 - AMÜSÜH HÜM CL Bible (BSI)

Yinmi Aso tüsho Alomi Aso

¹ Judüki inü yinmi aso tüsho alomi aso ngü; tümüde akhuhbe thüning tüsho akhuhbe alomi hode tsoabah, tüsho keto müladebah.

² Tüsho amüsüh kiuto, Jirusalem aso, ayamkhünbuh thsungkheak züt thsükhi yamkhünbe nangde Thrünpuh kilimnü yinmi chingnü akide inü ngü;

³ tüsho kiulongthsü-binkiu chingnü düsheak achangnü thade inü so, “Kheahang, Thrünpuh lapung mihtsürübo lung lah. Api arü lung labah, tüsho arübo api mihtsürü thsübah, tüsho Thrünpuhnü aküdah thsüde arü lung labah tüsho arü Thrünpuh thsübah;

⁴ apinü arü mük chingnü chikebo nana bahjihbah, tüsho ashepü mülade akambah, mulong rozhakpü yungsho atrippü yungsho thsünüpü mülade akambah, tümüde akhuhlim lakhibo hode tsoabahdo.”

⁵ Tüshe kiulongthsü-binkiu kheak binbuhnü tha, “Kheahang, inü alala aso kamshihchoh.” Apinü thalo, “Ha thrütang, tümüde harü yubo akin labe tüsho thiyuro.”

⁶ Tüsho apinü I ki tha, “Ha rhimodo! I Alpha tüsho Omega, Atankih tüsho Akheam. Kethürirü kilim amo mulude rhangdung kekhip chingnü inü ayungpü jihbah.

⁷ Shepünü akuk ngüchonü ha yamrüplurüp lubah, tüsho I api Thrünpuh thsübah, tüsho api I tsührü thsübah.

⁸ Tüshe mulong müzahrü, akin-mülarü amüneankhi, mihlaksahrü, müzammüramrü, wurük-huhrü, sangthsü kingaünrü tüsho akeangyu tharü thsungkheak a arü shihcham ju mahnekipü shekhi, mo tüsho yinchike bede atrukhi modüjim labah.”

Jirusalem Aso

⁹ Judüki yunirü thüne bolung khülang akheam arümbo thüne mide azahkhi phurusük thüne labuh arübah I ki tha, “Arang, inü Namfimihnunu yamkhünbe nü ki huhbah.”

¹⁰ Tüsho apinü Me chingnü I bede awung ato tüsho achang ching yü, tüsho amüsüh kiuto Jirusalem Thrünpuh kilimnü yinmi chingnü akide I ki huh,

¹¹ Thrünpuh müretah lade, azhingzhingkhi ju athukhi mürelung nangde, asherühü, lungmüsang nangde la.

¹² Ju chipi ato tüsho achang, ripit thürükheak mahne, tüsho ripitbo ching yunirü thürükheak mahne, tüsho ripitbo kheak Israel tsührü thürükheak mahne mung thrütkih-a lakheah;

¹³ aniakhiuklim ripit mahsam, dukulim ripit mahsam, düjinglim ripit mahsam, tüsho aniyüzahlim ripit mahsam.

¹⁴ Kiuto chipi ju khimtan thürükheak mahne, tüsho jurü kheak Namfimihnunu amüsühthsangyurü thürükheak mahne mung lakheah.

¹⁵ Tüsho I ki asukbuh ju kiuto le ripitbo tüsho chipibo akepü suna tso khülang lakheah.

¹⁶ Kiuto ju thrip phüyi thsübah, ayunglim ju apunglim lokhüh lakheah; tüsho apinü aketsonü kiuto ju kilomitir 2400 ake tüsho ayunglim, apunglim tüsho achanglim rukhüh lakheah.

¹⁷ Apinü chipi she, yunirünü ahorikhi, mihtsürübuh yo akebenü khahnap 144 ake.

¹⁸ Chipi ju asherühünü thsü, tüshe kiuto a meayinpung nangde suna müthsünnü thsü.

¹⁹ Kiuto chipi khimtan ju mürelungbonü thsü; akhuhbe ju asherühü, mahnepü shotolung-bluk, mahsampü shotolung-müzhak, aphüyipü shotolungphüyak,

²⁰ aphüngüpü lungmütri, athurukpü shotolung-thüyin, athünepü lungmükin, atizheahpü ayinlung, atukupü kelülülung, athürüpü lungphüyak, thürükheak khülangpü athuyunglung, thürükheak mahnepü lungbluk.

²¹ Ripit thürükheak mahne ju sünso thürükheak mahne, ripit abande sünso khülang khülangnü thsü, tüsho kiuto kiudunglimro ju meayinpung nangde suna müthsün lakheah.

²² Inü kiuto ching arüngyam tümü müngü, tümüde arüngyam ju Wuto Atungpuh Thrünpuh tüsho Namfimihnunu ah.

²³ Tüsho kiuto yinpü ani yungsho khinu yihnüpü müla, tümüde Thrünpuh müretahkhi ju ayin, tüsho Namfimihnunu ju tsün ah.

²⁴ Ha ayin hode trükshihbonü atsahbah; tüsho alomi kiulongthsürübonü arü müretah ju ching lude arübah,

²⁵ tüsho animung küyimkishe ju ripit mürih tüsho ju ching azhing müla;

²⁶ arünü ju ching trükshihbo müretah tüsho wüntre lude arübah.

²⁷ Tüsho mümüsühkhi tümü she, yungsho athranean yungsho arükchih rhimorü ju ching müyüzah, tüshe Namfimihnunu rhangdung hüm ching thrüta larü lang ayüzahbah.