AMIKHEAKAKHIUKKHI 2 - AMÜSÜH HÜM CL Bible (BSI)

Efisia kilim Thiyusheak

¹ “Efisia borü ching yunirü kilim thrütang: ‘Api khah tsülim thüne shuhbuh, tsünpung dubopung thüne bolung tsahbuh yubo.

² “‘Inü nü rhimobo, nü khuksahkhi, nü arümkheamkhi, tüsho nünü amütsü mihtsürü ki marümkhukkhi tüsho arü küdahnü amüsüh-thsangyurü de ajirü rükakheahkhi mükheahlah, tüshe arübo a yung, tüsho arü arükchih ngükhitdo.

³ Nü arümkheamkhi, I mung dünkheak thsünükhi tüsho nü mükeaksahkhi inü mükheahlah.

⁴ Tüshe inü ha nü azhihde alakhi ju, nünü akhuhde amuzho lakhi bahyukdo.

⁵ Nü tümü chingnü ayoa lanü lümkhitang, tüsho nünü akhuhde arhimokhi rhimoang. Nünü mulong mümüthrisho, I nü kilim arübah tüsho nü tsünpung dubopung azopungnü luakhinbah.

⁶ Tütüshe nü ha lah, inü she thraneande alakhi Nikolaitarü rhimobo nünü thraneanlah.

⁷ Shepü nükhün kihlanü, Menü borübo ki tümü thachonü apinü aniang. Akuk ngübuh kilim Thrünpuh sühakhimpung ching lakhi rhangdung sangdung aso tsühpü inü mülüjihbah.’

Smyrna kilim Thiyusheak

⁸ “Tüsho Smyrna borü ching yunirü kilim thrütang: ‘Atankih tüsho akheam, shebah arhang kambuh yubo.

⁹ Inü nü thsünübo tüsho nü zhochihkhi mükheahlah– tütüshe nü alarü ah: Jihudarü ah de thade mülapmüjirü inü mükheahlah, tüsho arü a yung, tüshe Arimri sinagog ah.

¹⁰ Nü thsünüpü lakhi dünkheak dütre. Inü nü ki thachoh, arimrinü nüsa khürü rükakipü rihyam ching yukbah, tüsho nüsa thsümüchikhi nimung thürü rünkhitbah. Ashepü she khiungde thiyuro laang, tüsho inü nü kilim rhangdung kuthran jihbah.

¹¹ Shepü nükhün kihlanü, Menü borübo ki tümü thachonü apinü aniang. Shepü akuk ngüchonü mahne kipü ashepünü mütrünthsü.’

Pergamum kilim Thiyusheak

¹² “Tüsho Pergamum ching borü yunirü ki thrütang: ‘Khülim khülim ahüyuk nukshang labuh yubo.

¹³ “‘Nü küching lacho, Arimri kiulongthsü-binkiu küching lanü inü mükheahlah; I thiyuro thiyumütsan thsübuh, Arimri lapung nüsa bolung laksahkhi Antipas nimungbo ching she nünü I mung düngde ramrih tüsho I yo akin müreanglo.

¹⁴ Tüshe inü nü azhihde khürü lah: Ju ching Balak ki thaa Israel tsührübo müngüh jingmükhebe zoshihbah sangthsübo ki kingaünkhi tsühyungbe tsühshihkhi tüsho müzammüram rhimoshihkhi Balaam thsangyukhi yanrü khürü lah.

¹⁵ Junangde nüsa bolung Nikolaitarü thsangyukhi yanrü she khürü lah.

¹⁶ Jumonü mulong müthriang. Jude yungsho, I nü kilim arübah tüsho I mün chingnü akhiukkhi nukshangnü arü azhihde thirithsübah.

¹⁷ Shepü nükhün kihlanü, Menü borübo ki tümü thachonü apinü aniang. Shepünü akuk ngüchonü inü rama lakhi manna khürü jihbah, tüsho ju leangkhibuh kheak hode shenü mümükheahkhi amüye lung kheak mung aso thrütkihkhi khülang jihbah.’

Thyatira kilim Thiyusheak

¹⁸ “Tüsho Thyatira borü ching yunirü kilim thrütang: ‘Amükbo motru nangde, tüsho ajing müwayinchi phezhingzhingkhi nangde alakhi Thrünpuh tsührü yubo.

¹⁹ “ ‘Inü nü rhimobo, nü amuzho tüsho akin, tankihkhi tüsho arümkheamkhi mükheahlah, tüsho nü rhimo ashubenü akhuhbe kiholah.

²⁰ Tüshe inü nü azhihde ha lah: Anihbe küdahnü Thrünpuh yunirü ah de jia lukhi Jezebel kheak arümkheamchoh. Anihbe thsangyukhinü I tankihrübonü müzammüram rhimoshihde tüsho sangthsübo ki kingaünkhi tsühyungbe tsühshihde bemüchihdo.

²¹ Inü alibe mulong müthripü kim jih, tüshe anihbenü müzammüram chingnü mulong müthripü mükün.

²² Kheahang, inü anihbe tukthsü yapkiu kheak bahjihbah, tüsho sherünü alibe kheak müzammüram yihbeakchonü, arünü anihbe rhimo chingnü mulong mümüthrisho, inü thsümütsü ato ching bahjihbah;

²³ tüsho inü anihbe tsührübo shika sheshihbah. Tüsho borübo alalanü lümkhi tüsho mulong yimbuh ju I ah de amükheahbah, tüsho inü nüsa aban kilim rhimobonü athülünkhi jihbah.

²⁴ Kheakü Thyatira ching nüsa aningkhi, anihbe thsangyukhi müramrihrü tüsho Arimri rük asük de ajikhi manikhitrü ki inü thachoh, inü nüsa kheak hahmülang püpü tümü müyihkihjih;

²⁵ nüsa tümü lanü ju kheak lang I arü khiungde düküngde ramrihang.

²⁶ Shepünü akuk ngücho tüsho akheam khiungde I yubo zochonü, inü api kilim trükshihbo kurungkheak wu jihbah,

²⁷ tüsho apinü yinchi tsonü arü yakzan shuhbah; alo phüh adütre kamde ayihthünakkhi nangde alabah–I she I Buh kilimnü wu leangkhia lah;

²⁸ inü api kilim yapsu chiningthülü jihbah.

²⁹ Shepü nükhün kihlanü, Menü borübo ki tümü thachonü apinü aniang.’