AMIKHEAKAKHIUKKHI 18 - AMÜSÜH HÜM CL Bible (BSI)

Babilon Lungkhi

¹ Ha dunglim yunirü püpü thiyukhüm-sühmüh lade yinmi chingnü akikhi inü ngü; tüsho api mürenü alomi yinde kamshih.

² Tüsho apinü düsheak atonü ji, “Lungdo, ato Babilon lungdo! Ha arimri lapung kamdo, amünean me, tüsho athraneanbe wuhnu mungpung kamdo;

³ tümüde trükshih alalanü anihbe mümüsühkhi shihkünkhi yukhu yungdo, tüsho alomi kiulongthsürübonü anihbe kheak müzammüram yihbeakdo, tüsho alomi shothsümolorübonü anihbe hode müthangmüsünkhi chingnü alarü kamdo.”

⁴ Judüki yinmi chingnü düsheak püpü thakhi inü so, “Alibe kinü akhiukang, I mihtsürü, jude yungsho nüsanü anihbe neakbo ching shihcham lubah, jude yungsho nüsanü anihbe arümbo ching shihcham lubah;

⁵ tümüde anihbe neakbo thüning khiungde mujunglah, tüsho Thrünpuhnü anihbe mülimkhibo lümkhitdo.

⁶ Anihbenü ajihkhi nangde anihbe ki jihang; tüsho anihbe rhimobo dün alü thsüde athrihloang; anihbe khilim alü thsüde müküpde pung ching dungyukjang.

⁷ Anihbenü müretah-a lukhi tüsho müthangmüsün ahorikhi nangde, alibe kilim ju ruk adüna thsümüchi tüsho tüzhopü jihang. Tümütüsho anihbe mulong ching alibenü thachoh, ‘I kiulongthsüberü thsüde binlah; I a khimoberü yung, I küyimkishe mütüzho,’

⁸ Jumonü anihbe arümbo, tukthsübo, tüzhopü tüsho khümzung nimungkhühnü arübah, tüsho anihbe monü aniuabahbah; tümüde anihbe mahkhapbuh ju Atungpuh Thrünpuh wuto ah.”

⁹ Tüsho alomi kiulongthsürü, sherünü anihbe lung müzammüram yihbeakkhea tüsho müthangmüsün ching lakheanü anihbe aniukhi mokhüh ngüchoki arünü atripbah tüsho tüzhobah;

¹⁰ arünü anihbe thsünükhi trede limshu ching zhipbah athabah, “Are! Are! Nü Babilon ato kiuto! Kimkhü 1 chingnü nü mahkhappü arüdo.”

¹¹ Tüsho alomi shothsümolorünü anihbe dünkheak tripchoh tüsho tüzhochoh, tümütüsho kheaküa shenü arü kukrukbo muthulo,

¹² suna kukruk, shotoyinchi, mürezhingzhing tüsho shotolungbo, khimthünak atsü, mürümmuchu, azhingzhing tüsho aneakrüm khim, rhümthünea sang mungjibo, thsotorü kukrukbo alala, amo achak sang kukrukbo alala, müwayinchi tüsho lungmüye,

¹³ sinamon sang, thüneathürabe, rhümkebe, rhümthüneabe, jinjinlak, yukhu, müdangke, ayikangkang, tüsho wheat atsüdak, moshi tüsho namfimihnubo, khorabo tüsho khoralolungbebo, azhorübo tüsho mihtsürübo rhangdung.

¹⁴ Shothsümolorünü anihbe ki thachoh, “Nü menü akünkhi sangaso nü kheaknü tsodo, tüsho nü lakhitbo tüsho nü thukhibo küyimkishe müngülopü thsüde nü kheaknü tsoabahdo!”

¹⁵ Harü kukruk shothsümolorübo, anihbe lakhit chingnü alü thsürünü alibe thsümüchikhi trede, tripde tüsho achangnü tüzhode limshude azhipbah,

¹⁶ “Are, are, khimthünak atsü, mürümmuchu tüsho aneakrüm yihkhi, suna, mürezhingzhing, tüsho shotolungbo züt thsükhi ato kiuto!

¹⁷ Kimkhü 1 chingnü anihbe lakhit alala thsümünima lah.” Sangkung putungrübo, hantsahrü, sangkung-berübo tüsho keto ching shothsümolorü alala limshude zhip

¹⁸ tüsho anihbe takkhi mokhüh arünü ngübah zhi, “Ato kiuto nangde püpü kiuto küju lakhea?”

¹⁹ Tüsho arünü arü kubo kheak awah sukkihbah trip tüsho tüzhode zhi, “Are, are, keto ching sangkungbo larü anihbe lakhit hode alarü kampung, ato kiuto! Kimkhü 1 chingnü anihbe thsümünima lah.”

²⁰ Anihbe kurungkheak asühachihang, O yinmi, O amüsührübo, amüsüh-thsangyurübo tüsho wukihrübo, tümüde Thrünpuhnü nüsa dünkheak anihbe azhihde mahkhapdo!

²¹ Judüki wuto yunirünü hizübelung ato nangde lung khülang shuh-a lu tüsho keto ching jipa bahde tha, “Hanangde ato kiuto Babilon thsümünimde jipkhia bahbah, tüsho küyimkishe müngülo;

²² bingkhung khungrü tüsho khün thsürü, khungpi khungrü tüsho hulipungpung khungrü nü kheaknü musolo; kheaklahrü nü kheak müngülo; tüsho hizübe-lung düsheak nü kheak musolo;

²³ nü kheak tsünpung ayinatrüm mütahlo; tüsho nü kheak yamkhün-kambuh le yamkhün-kambe düsheak musolo; tümüde nü shothsümolorübo alomi mungkhung mihtsürübo lakheah, tüsho nü wurük hode trükshih alala mülapyuk.

²⁴ Tüsho anihbe kheak wukihrübo le amüsührübo, tüsho alomi kheak laksahrü alala thiyih ngü.”