AMIKHEAKAKHIUKKHI 15 - AMÜSÜH HÜM CL Bible (BSI)

Yunirübo tüsho Akheam Arümbo

¹ Judüki thüning ching amütsan ato tüsho khinthiyinbe inü ngü: arüm thüne lung yunirü thüne lakheah, jurü akheambo, tümütüsho Thrünpuh bukakhiukkhi arün thsüpü arü kheak lakheah.

² Judüki meayinpung keto ju mo lung düsahbah akhiuk, tüsho sherünü shiwüh le mejak tüsho amung khekhi kurungkheak akuk ngükheanü, Thrünpuh bingkhungbo shuhbah meayinpung keto yean zhipde inü ngü.

³ Tüsho arünü Thrünpuh tankihrü Mosa tüsho Namfimihnunu khün thsüde tha, “Nü rhimobo ato tüsho amüyinsahbe, O Wuto Atungpuh Thrünpuh! Nü limrobo alungki tüsho thiyuro, O lünbo kiulongthsüpuh!

⁴ O Atungpuh, shepünü nü mütrepü tüsho nü mung müremütahpü? Tümüde nü lang amüsüh ah. Trükshih alalanü arübah tüsho nü kingaünbah, tümüde nü mahkhapkhibo amikheak akhiukdo.”

⁵ Ha dunglim inü kheah, tüsho yinmi ching thiyumütsan khimyam, arüngyam ju khimshuh,

⁶ tüsho arüngyam chingnü yunirü thüne, arüm thüne lubah, ayinatrüm khimthünak müthsün yih tüsho arü treangbo suna treangkhümbebonü rümbah akhiuk.

⁷ Tüsho arhang shiwüh phüyi bolung khülang yunirü thüne kilim lünnü lün labuh, Thrünpuh bukakhiukkhinü mide suna phurusükbo thüne jih;

⁸ arüngyam ju Thrünpuh müretahkhi tüsho api wu ching yo mokhühnü mide kam, tüsho yunirü thüne yo arüm thüne mükheamyikia shenü she arüngyam ching müyüzahkhuk.