AMIKHEAKAKHIUKKHI 13 - AMÜSÜH HÜM CL Bible (BSI)

Shiwüh Mahne

¹ Tüsho shiwüh khülang keto chingnü, ajuh thürü tüsho aku thüne, ajuhbo kheak kuthran thürü tüsho akubo kheak athruaji mung kihbah akhiukde inü ngü.

² Inü angükhi shiwüh ju sangtsung nangde, ajingbo ju kuto jing nangde, tüsho amün ju kekhüzü mün nangde alakheah. Tüsho ju kilim dragonnü api wu le kiulongthsü-binkiu tüsho thiyukhüm-sühmüh ato jih.

³ Aku bolung khülang ashebe mü nangde alakheah, tüshe ashebe mü ju nguabah, tüsho alomi lüpdükhinü müyinsahde shiwüh dunglim yan.

⁴ Mihtsürübonü dragon kingaün, tümüde apinü shiwüh kilim thiyukhüm-sühmüh jih, tüsho arünü shiwüh kingaünde tha, “Shiwüh nangde shepü la, tüsho shepünü ju bede keochihpü kukla?”

⁵ Shiwüh kilim ju lülüshishi yu thapü, athruaji mün tüsho khinu yirükheak mahne api thiyukhümsühmüh ahoripü jih-a lakheah.

⁶ Thrünpuh athruajipü tüsho api mung le api lapung tüsho yinmi ching larü athruajipü api mün khimshuh.

⁷ Api kilim amüsührü bede thirithsüpü tüsho arü kukpü she wu jih-a lakheah. Tüsho trük aban, mihtsürü, thiyutha tüsho trükshih kurungkheak thiyukhüm-sühmüh wu jih-a lakheah.

⁸ Alomi ching larü, thrüna lakhi alomi chingnü alaksahkhi Namfimihnunu rhangdung hüm ching mung thrüta mülarü alalanü shiwüh ju kingaünbah.

⁹ Nüsa nükhün kihlasho aniang!

¹⁰ Khürü ramde atsopü lasho, api aramkhi ching yübah; khürü nukshangnü alaksahpü lasho, nukshangnü api laksahbah. Ha amüsührü arümkheam tüsho thiyuro lapü thsungkheak jichoh.

¹¹ Judüki alomi chingnü akhiukkhi shiwüh püpü inü ngü; namfimihnunu nangde ajuh mahne kih tüsho dragon nangde asuk.

¹² Apinü akhuhbe shiwüh thsung thsüde api thiyukhüm-sühmüh alala ahori, tüsho alomi le ju ching larübonü ashebe mü thsüngukhi akhuhbe shiwüh ju kingaünshih.

¹³ Apinü amütsan atobo rhimode, mihtsürübo mikinü thüning chingnü alomi kheak mo she akishih;

¹⁴ khinthiyinbebo hode akhuhbe shiwüh thsung thsüde apinü arhimopü wu jih-a lakhinü, apinü alomi kheak larü mülapyuk. Nukshangnü yuribah arhang lakhi shiwüh wüntre jihde mejak khülang thsüpü arü ki thiyukhüm jih.

¹⁵ Akhuhbe shiwüh mejak kilim sheak jihpü api kheak wu jih; junangde junü thiyu thakhukbah tüsho mejak, kingaünpü arochihrü alala laksahpü lakheah.

¹⁶ Kheaküshe junü anini tüsho ato, alarü tüsho zhochihrü, zuzu tüsho azhorü alala tsülim khah yungsho kingkang kheak mütsan yihkihpü reangkih,

¹⁷ junangde mütsan kihkhi shiwüh mung yungsho amung khekhi mülasho shenü she athulopü yungsho ayinpü mukukde alakheah.

¹⁸ Ha lümlung ah: shepü anikhitkhi lanü shiwüh khekhi ju kheakheahang, tümüde ha mihtsürü khekhi lah, ha khekhi ju 666.