AMIKHEAKAKHIUKKHI 12 - AMÜSÜH HÜM CL Bible (BSI)

Aliberü tüsho Dragon

¹ Tüsho thüning kheak amütsan ato akhiuk; aliberü khülangnü ani phuyu, ajing khüp khinu la, tüsho aku kheak chining thürükheak mahne kuthran lakheah.

² Alibe ju mübünkeangde lakheah tüsho anihbenü zübepü lachoki thsünü chingnü zhi.

³ Jushu amütsan püpü thüning kheak akhiuk; dragon amuliuh amürüm khülang aku thüne, ajuh thürü tüsho akubo kheak kuthran thüne kihde alakheah.

⁴ Api monü thüning kheak chining shihcham mahsam ching khülang phütkhia alomi kheak akishih. Tüsho alibenü zübechoki anihbe tsührü tsühabahpü thsüde, khungarü zübepü lachoki dragon ju alibe miki zhip;

⁵ trükshih alala yinchi tsonü yakzan shuhpü thsüde alibenü athrürü nunu zübejih, tüshe anihbe khungarü ju jangkhia lubah Thrünpuh kilim api kiulongthsübinkiu ching bekih,

⁶ tüsho alibe ju Thrünpuhnü athsakhamkhi sunglo ching, anihbe nimung 1260 kümpü lakhi lim yüabah.

⁷ Kheakü yinmi ching Maikel tüsho api yunirübonü dragon azhihde thirithsü akhiuk; tüsho dragon le api yunirübonü keochih,

⁸ tüshe arübonü mukuk tüsho yinmi ching arü lapung mülade kam.

⁹ Tüsho dragon ato, ju jipü phuruto, Amünean tüsho Arimri de ajikhi, alomiküp athrünkhi mülapyukbuh ju api lung anihbuh yunirübo bede alomi ching jipkhia bah.

¹⁰ Tüsho yinmi ching düsheak achangnü thade inü so, “Kheakü akhümkhit, wu isa Thrünpuh kiulongthsü tüsho api yo Khrista thiyukhüm-sühmüh arüdo, tümüde isa Thrünpuh miki azhing ayin isa keoniorü amülim jihrü jipkhia bahdo.

¹¹ Namfimihnunu thiyih tüsho arü thiyumütsan yu hode arünü api kuk, tümüde arünü ashepü she thsüde nihbuh rhangdungbo mümuzho.

¹² O yinmi tüsho nüsa ju ching larübo, asühachihang! Tüshe nüsa alomi tüsho keto are, tümüde amünean bukakhiukkhi ato chingnü nüsa kilim akido; tümütüsho api kim zhomalah de apinü mükheahlah!”

¹³ Tüsho küyimki dragonnü api alomi ching jipkhia bahkhi ngükhea, apinü khungarü athrürü zübejihkhi liberü müsham.

¹⁴ Tüshe alibe kilim müleang topü ghidükeang mahne jihbah phuruto kinü phinde, anihbe kam mahsam kheak thripkhüh kümpü lakhi dangpung sunglo ching yü.

¹⁵ Phurutonü anihbe ju kekingnü zünde atsopü thsüde amün chingnü ayung nangde ke bukkhitshih.

¹⁶ Tüshe alibe rungpü alo arü, tüsho dragonnü amün chingnü abukkhitkhi ayung ju alonü amün kabah muyuabah.

¹⁷ Judüki dragonnü alibe kheak bukakhiuk, tüsho aningkhi anihbe tsührübo, Thrünpuh yuzüngbo tüsho Jisu thiyumütsan zorü bede thirithsüpü yüabah.

¹⁸ Judüki dragonnü kemungyean zhip.