AMIKHEAKAKHIUKKHI 11 - AMÜSÜH HÜM CL Bible (BSI)

Thiyumütsan Mahne

¹ Judüki tso nangde akesang khülang I kilim jih, tüsho I ki tha: “Wusuang tüsho Thrünpuh arüngyam le kingaün sadam tüsho ju ching kingaünrübo akeang,

² tüshe arüngyam aleanglim a dake; ju aninga zojang, tümüde ju trükshihbo kilim jihdo, tüsho arünü khinu yirükheak mahne amüsüh kiuto kheak jungbah.

³ Tüsho inü I thiyumütsan thsürü mahne shungliukhim phuyubah nimung 1260 müchitpü wu mülüjihbah.”

⁴ Harü ju oliv sangdung mahne tüsho alomi Atungpuh miki zhipkhi tsünpung mahne lah.

⁵ Tüsho khürünü ane trünthsüsho, ane mün chingnü mo akhiukbah tüsho arü riribo aniuabahbah; hanangde khürünü ane trünthsüsho asheshihbah.

⁶ Anenü müchitkhi nimungbo ching tsüng marüpü thsüde thüning rihpü ane wu lah, tüsho kebonü thiyih kampü, tüsho anenü akünkhi alochode arümbonü alomi shikpü wu lah.

⁷ Tüsho küyimki ane thiyumütsan arün thsübanü alokhünbit chingnü akhiukkhi shiwühnü ane bede thirithsübah akukbah tüsho ane laksahbah,

⁸ tüsho ane ashemibo ju amütsan thsüde Sodom tüsho Ijip de ajikhi, arü Atungpuh yümkihpung, ato kiuto kiudunglimro ching yapbah.

⁹ Tümüde trükshihbo, trükbo, thiyuthabo, boto alala chingnü mihtsürübonü ane ashemibo kheak nimung mahsam kheak thripkhüh kheahbah tüsho ane kiuyuka bahpü reanglobah,

¹⁰ tüsho alomi ching larübonü ane kurungkheak asühachihbah tüsho thsambahbo jihachihbah, tümütüsho alomi ching larübo kheak hane wukihrübonü thsümütsü hande arüdo.

¹¹ Tüshe nimung mahsam kheak thripkhüh dunglim Thrünpuh kilimnü arhang sheak ane kheak yüzah, tüsho ane ngürü alala müyinsah.

¹² Judüki yinmi chingnü düsheak achangnü ane ki thakhi so, “Halim akihang!” Tüsho ane riribo mikinü anenü amo chingnü yinmi lim yükih.

¹³ Ju kim ching muliuyuk ato züng, tüsho kiuto shihcham thürü ching khülang thsümünim; muliuyuk ching mihtsürü 7000 laksah, tüsho aninga larünü müyinnim tüsho yinmi ching Thrünpuh kilim müretah jih.

¹⁴ Mihtrebe mahnepü hodo; kheahang, mihtrebe asampü nahde arüpü lah.

Hulipungpung Thünepü

¹⁵ Judüki athünepü yunirünü api hulipungpung müt, tüsho yinmi chingnü düsheak achangnü tha, “Alomi kiulongthsü ju isa Atungpuh tüsho api yo Khrista kiulongthsü kamdo, tüsho apinü lünnü lün kiulongthsübah,”

¹⁶ Tüsho Thrünpuh miki arü kiulongthsü-binkiubo kheak binkhi azothsürü mukukheak phüyinü arü miro mükhüm tüsho Thrünpuh kingaünde

¹⁷ tha, “Atungpuh Wuto Thrünpuh, isanü nü ki makshe jihchoh, shepü la tüsho shepü lakhea, tüsho arüpü la, tümütüsho nünü wu ato lu tüsho kiulongthsüpü tankih.

¹⁸ Trükshihbonü bukakhiuk tüsho nü mulong zhipzhip, asherü mahkhappü kim arü, tüsho nü tankihrübo, wukihrübo tüsho amüsührü, nü mung trerü, anini tüsho ato chido thsambah jihpü, tüsho alomi thsümünimrü dükheakshihpü lah.”

¹⁹ Judüki yinmi ching Thrünpuh arüngyam khimshuh, tüsho api tangzüng sangdan ju api arüngyam ching ngü; tüsho ju ching chinchobe, düsheakbo, tsüngmukbo, muliuyuk, tüsho aru mülangde ashukhi lakheah.