AMIKHEAKAKHIUKKHI 10 - AMÜSÜH HÜM CL Bible (BSI)

Yunirü tüsho Küpqiu Anikhüh

¹ Judüki inü püpü wuto yunirü amo ching hingbah, aku kheak mürechin kihde thüning chingnü akide ngü, tüsho amiro ju ani nangde, tüsho ajingbo ju mo dungtobo nangde alakheah.

² Api khah ching akhimshuhkhi küpqiu anikhüh khülang lakheah. Api jing tsülim keto kheak thrüm, tüsho api jing huzulim alo kheak thrüm,

³ tüsho kekhüzü arungkhi nangde düsheak achangnü zhi. Küyimki apinü ajikhea, tsüngmuk thüne arung.

⁴ Küyimki tsüngmuk thüne arungkheanü inü athrütpü thsü, tüshe yinmi chingnü athakhi düsheak inü so, “Tsüngmuk thünenü tümü thakheanü yümdoa zoang, tüsho ju düthrüt.”

⁵ Tüsho inü angükhi keto tüsho alo kheak zhipbuh yunirünü api khah tsülim chungkih

⁶ tüsho lünnü lün labuh, thüning tüsho ju ching lakhi, alomi tüsho ju ching lakhi, keto tüsho ju ching lakhi thrünrü tamde mashupü thiyuchihchim thsü,

⁷ tüshe athünepü yunirünü hulipungpung müt nimung apinü anihbuh wukihrübo ki zhiyukkhi Thrünpuh aramyu dünjibah.

⁸ Judüki yinmi ching inü asokhi düsheaknü I ki thalo, “Yüang, keto tüsho alo kheak zhipkhi yunirü khah ching küpqiu khimshuhkhi luang.”

⁹ Jumonü inü yunirü kilim yü tüsho küpqiu anikhüh ju I kilim jihpü api ki tha; tüsho apinü I ki tha, “Ju luang tüsho tsühang; ju nü buk ching akhüh labah, tüshe nü mün ching a mukhuke nangde aniungbah.”

¹⁰ Inü küpqiu anikhüh ju yunirü khah chingnü lu tüsho tsüh; ju I mün ching mukhuke nangde niungmüyingdo la, tüshe küyimki inü ju muyukheanü I buk ching khühmürakdo la.

¹¹ Tüsho I ki tha, “Nünü kheaküshe mihtsürübo, trükshih, thiyutha tüsho kiulongthsürü ahihkhüh dünkheak müchitbeah.”