ABEKHIT 40 - AMÜSÜH HÜM CL Bible (BSI)

Arüngkhimyam Thsükhi

¹ Judüki Atungpuhnü Mosa ki tha,

² “Akhuhbe khinu atan nimung Atungpuh shorupung arüngkhimyam thsüa zhipshang.

³ Thiyuzüngbo zahkhi tangzüng sangdan ju ching zoang tüsho ju miki zhindokhim yukang.

⁴ Dükhüm hande azahang tüsho ju kheak kukrukbo zoang. Kheaküshe tsünpung dubopung lude azahang tüsho ju kheak tsünpungbo zoang.

⁵ Jinjinlak takpü tangzüng sangdan miki suna kingaün sadam zoang tüsho khimyam ching yüzahpung ki zhindokhim zhinang.

⁶ Ashorupung arüngkhimyam ching yüzahpung ki taka kingaünpü sadam zoang.

⁷ Ashorupung arüngkhimyam le kingaün sadam dükeak müsühmüra-phuru zoang, tüsho ju ching ke yukang.

⁸ Alala mükamde khikzhakpung thsang tüsho ripit kheak zhindokhim zhinang.

⁹ Amujube müdangke luang tüsho arüngkhimyam le ju ching lakhi alala mujude-müsühkhitang; nünü kukruk alala müsühkhitbah tüsho amüsüh labah.

¹⁰ Taka kingaünpü sadam tüsho pungphuru alala müsühkhitang, tüsho kingaün sadam ju khide amüsüh labah.

¹¹ Müsühmüra-phuru tüsho adubopung müsühkhitang.

¹² Jushu nünü Aron le api tsührübo ashorupung khimyam ripit ki bede arang tüsho arübo kemüyihjang.

¹³ Nünü Aron kheak amüsüh khimmih phukihjang, tüsho api mujude-müsühkhitang, junangde amükeamrü thsüde apinü I tankihbah.

¹⁴ Nünü api tsührübo bede arang tüsho khahkhih-pangkhümpü khümjang.

¹⁵ Arü abuh mujudemüsühkhitkhi nangde arübo mujudemüsühkhitang, junangde amükeamrübo thsüde arünü I tankihbah; tümüde arü mujude-müsühkhitkhi ju arü lün amuyung ching tsükjide akheam mülakhi amükeamrü thsübah.”

¹⁶ Junangde Atungpuhnü api kilim thiyukhüm jihkhi nangde Mosanü alala rhimo.

¹⁷ Tüsho kam mahnepü akhuhbe khinu, atan nimung arüngkhimyam ju thsü.

¹⁸ Jumonü Mosanü arüngkhimyam ju thsübah athranyukbebo yuk, sangbeakbo zhipshih, akhrihbebo yuk, tüsho dungjingbo zhipshih.

¹⁹ Tüsho Atungpuhnü thiyukhüm jihkhi nangde apinü arüngkhimyam kumung kheak phukih tüsho ju kheak amuhiudobe yihkih.

²⁰ Apinü lungbeak mahne ju lubah tangzüng sangdan ching yuk, sangdan phuhpho ching akhrihbebo yuk, tüsho sangdan mikheak mihmüthsüm binkiu yihkih.

²¹ Jushu apinü sangdan ju arüngkhimyam ching yuka zo tüsho zhindokhim zhin. Hanangde Atungpuhnü thiyukhüm jihkhi nangde apinü tangzüng sangdan ju zhindo.

²² Apinü ashorupung khimyam ching dukulim, zhindokhim aleanglim dükhüm yuka zo;

²³ tüsho Atungpuhnü thiyukhüm jihkhi yande apinü ju kheak yikhap akhinashu thsüde Atungpuh miki zo.

²⁴ Apinü ashorupung khimyam ching düjinglim, dükhüm mikhuh kheak tsünpung dubopung zo;

²⁵ tüsho Atungpuhnü thiyukhüm jihkhi nangde apinü Atungpuh miki tsünpungbo takkih.

²⁶ Apinü ashorupung khimyam ching zhindokhim miki suna kingaün sadam zo;

²⁷ tüsho Atungpuhnü thiyukhüm jihkhi nangde apinü ju kheak rhümthüneabe tak.

²⁸ Apinü arüngkhimyam ripit kheak azhindobe yihkih.

²⁹ Apinü ashorupung khimyam ripit miki taka kingaün sadam zo, tüsho Atungpuhnü thiyukhüm jihkhi nangde ju kheak taka kingaünkhi le hi kingaünkhi jih.

³⁰ Apinü arüngkhimyam le kingaün sadam dükeak müsühmüra-phuru zo, tüsho ju ching müsühmürapü ke yuk;

³¹ tüsho Mosa, Aron, tüsho api tsührübonü ju chingnü arü khahbo le jingbo müsüh.

³² Küyimki arü ashorupung khimyam ching yüba, tüsho arü kingaün sadam ki arübanü Atungpuhnü Mosa ki thiyukhüm jihkhi nangde arünü müsühmüra.

³³ Tüsho apinü ashorupung khimyam tüsho kingaün sadam alala mükamde khikzhakpung thsü, tüsho khikzhakpung ripit kheak zhindokhim yihkih. Junangde Mosanü rhimo alala ban.

Amo tüsho Müretahkhi

³⁴ Judüki amonü arüngkhimyam shodo, tüsho Atungpuh müretahkhinü mide kam.

³⁵ Tüsho Mosa ju ashorupung khimyam ching yüzahpü mukukde alakheah, tümütüsho amo ju kheak keam tüsho Atungpuh müretahkhinü arüngkhimyam mide kam.

³⁶ Küyimki arüngkhimyam kumungnü amo ju akhinbanü, Israelrünü arü mikhuhlim tsahmusude alakheah.

³⁷ Tüshe amo ju makhinsho, ju makhinyi nimung khiungde arünü mütsahmusu.

³⁸ Tümütüsho Israel yamkhün alala miki, arü hantsahkhi amuyung, Atungpuh amo ju animung arüngkhimyam kumung la, tüsho azhing ching ju kumung mo lakheah.