ABEKHIT 4 - AMÜSÜH HÜM CL Bible (BSI)

Thrünpuhnü Mosa kilim Khinthiyinbe Wu Jihkhi

¹ Judüki Mosanü alo tüsho tha, “Tüshe mihtsürübonü I yu kheak akin mülade, Atungpuh nü miki makhiuk de thasho küde?”

² Atungpuhnü api ki keokhi, “Nü khah ching lakhi ju tümü a?” Apinü alo, “Tso khülang ah.”

³ Atungpuhnü tha, “ Ju alo kheak jipa bahang.” Jumonü Mosanü ju alo kheak jipa bah, tüsho junü phuruto khülang kam; tüsho Mosanü ju kheaknü tso.

⁴ Judüki Atungpuhnü Mosa ki tha, “Nü khah chungbah ju mo kheak tholoang.” Mosanü akhah chungbah phuruto ju tholo tüsho ju akhah ching tso khülang kam.

⁵ Atungpuhnü tha, “Israelrübo ki nüsa jipürü Abraham, Isak tüsho Jakob Thrünpuhnü nüsa miki akhiukdo de amütsan thsüpü ha rhimoang.”

⁶ Kheaküshe Atungpuhnü Mosa ki tha, “Nü khah ju pangkhümpü ching chungyukang.” Jumonü Mosanü api pangkhümpü ching akhah chungyuk, tüsho küyimki apinü ju yihkhitkhea, api khah kheak apham ju phürüm nangde alakheah.

⁷ Tüsho apinü tha, “Kheaküshe nü khah ju pangkhümpü ching chungyukang.” Jumonü Mosanü api khah pangkhümpü ching yuklo, tüsho küyimki apinü akhah thokhitkhea püpü shihtsü ruk kama lakheah.

⁸ Atungpuhnü api ki tha, “Arünü nü ki manisho yungsho akhuhbe amütsan kheak akin mülasho, mahnepü amütsan jua akinbah.

⁹ Arünü harü amütsan mahne yungsho nü düsheak manisho, nünü Nile ayung chingnü ke anükhüh luang tüsho ju alo akung kheak dunga bahang, tüsho ke ju thiyih kambah.”

¹⁰ Tüshe Mosanü Atungpuh ki tha, “O ITUNGPUH , adüsonü yungsho nünü nü yamlarü ki asukachihshunü I thiyu thasorü yung; tüshe thiyu thapü duhduhlah.”

¹¹ Atungpuhnü api ki tha, “Shepünü mihtsürü mün thsüjihkhea? Shepünü mulo kikshihcho, yungsho nükhün peangshihcho, ngüshihcho yungsho mük dukshihcho? Ju I Atungpuh yung de?

¹² Jumonü yüang tüsho athapü ching inü arungbah, tüsho nünü tümü thabea ju inü thaa huhbah.”

¹³ Tüshe Mosanü alo, “O Atungpuh , muzhobah püpürü yüshang.”

¹⁴ Judüki Mosa azhihde Atungpuhnü bukakhiuk tüsho tha, “Levi trük chingnü nü khiung Aron müla de? Apinü tsüde thachoh de inü mükheahlah. Kheakü api nü shorupü arümuroh tüsho küyimki apinü nü ngübanü api mulong asühbah.

¹⁵ Nünü api ki thabah tüsho thiyu ju api mün ching yukjihbah; tüsho athapü thsungkheaknü inü nüke chido rungbah tüsho tümü thabea ju inü nüke chido ki thabah.

¹⁶ Api ju mihtsürübo ki nü thsung thsüde athajihrü thsübah; tüsho nü api thsungkheaknü Thrünpuh nangde alabah.

¹⁷ Ha tso nü khah ching shuhang tüsho junü nünü amütsanbo rhimobah.”

Mosa Ijip ching Alode Yükhi

¹⁸ Mosanü akü Jethro kilim yülobah api ki tha, “Ijip lomi ching I keoniorübo kheakü khiungde arhang la shi mülanü alode yübah akheahpü thsungkheaknü muzhobah I yüshang de mushuchoh.” Jethronü mulongde api ki tha, “Tsüde yüang.”

¹⁹ Kheaküshe Midia ching Mosa ki Atungpuhnü tha, “Ijip ching alode yüang, tümütüsho nü laksahpü yimrübo alala shekhamdo.”

²⁰ Jumonü Mosanü ayamkhünbe tüsho atsührübo bea lubah donki kheak binshihbah Ijip lomi lim alode yü, tüsho api khah ching Thrünpuh tso shuh.

²¹ Atungpuhnü Mosa ki tha, “Küyimki nü Ijip lomi lim alode ayübanü inü nü kilim sühmüh jihkhi nangde Ijip kiulongthsüpuh miki khinthiyinbe rhimo alala rhimoang. Tüshe inü api mulong müküpde kamshihbah tüsho mihtsürübo ju müyüshih.

²² Judüki nünü Pharao ki thabah, Atungpuhnü ha thachoh, Israel I tsührü adüjibuh ah.

²³ Jumonü inü nü ki tha, I tsührünü I tankihshihpü yüshang, tüshe nünü api müyüshih, jumonü inü nü tsührü adüjibuh laksahbah.”

²⁴ Arü yüchoki limro ching binkheampung Atungpuhnü Mosa shoru tüsho api laksahpü yim.

²⁵ Judüki Zipporanü lung ayuk handarübah atsührü küp tsütabah, junü Mosa jing qiu tüsho tha, “Atsütsü nü a thiyihnü I yamkhünbuh ah.”

²⁶ Jumonü Atungpuhnü Mosa tsoshih. Alibenü tha, “Tsütabahkhi hode nü thiyihnü yamkhünbuh ah.”

²⁷ Atungpuhnü Aron ki tha, “ Mosa shorupü nü sunglo ching yüang.” Jumonü apinü yübah Thrünpuh wung kheak Mosa shoru tüsho api kheak müthsüp.

²⁸ Judüki Mosanü Aron ki Atungpuhnü api ki thakhi yu alala tüsho amütsanbo rhimopü Atungpuhnü mülükhi alala tha.

²⁹ Judüki Mosa le Aron ane yübah Israel azothsürübo alala bemukhung.

³⁰ Atungpuhnü Mosa ki thakhi yu alala Aronnü azothsürübo ki tha. Kheaküshe Mosanü mihtsürübo ki amütsanbo rhimoa huh.

³¹ Mihtsürübonü kin, tüsho küyimki arünü Atungpuhnü Israelrü rhuakheahdo tüsho arü küpkhukkhi ngüdo de asokhea, arünü mükhümbah kingaün.