ABEKHIT 38 - AMÜSÜH HÜM CL Bible (BSI)

Taka Kingaünpü Sadam Thsükhi

¹ Apinü akasia sangnü kingaün sadam achanglim khahnap 3, ayunglim khahnap 5 tüsho atolim khahnap 5 shahrihkhühnü thsü.

² Apinü amühit phüyi kheak ajuh phüyi thsü; ajuhbo ju apang kheak kih tüsho müwayinchinü yihdo.

³ Apinü kingaün sadam phühlung alala thsü: keangkihphüh, mokhihmüjipbe, müsühmüra-phuru, tsapdüthreang tüsho mophühbo thsü; phühlung alala müwayinchinü thsü.

⁴ Apinü ayikeang ju kingaün sadam aphulung khiungde wutupü thsüde adamkhi khüp yuk.

⁵ Apinü müwayinchinü ayikeang khülang thsü tüsho amükbo kheak müwayinchi phuhpho phüyi thsü.

⁶ Tüsho apinü akasia sangnü akhrihbebo thsü, tüsho jurü kheak müwayinchi yihkih.

⁷ Jushu apinü akhrihbebo ju phuhphobo ching yuk, tüsho akhrihbebo ju kingaün sadam hanpü thsüde thrip mahne ching yuk.

Müwayinchi Müsühmüra-phuru

⁸ Apinü ashorupung khimyam ripit kheak tankihrü aliberü meayinpung chingnü müwayinchi müsühmüra-phuru tüsho müwayinchi dubopung thsü.

Arüngkhimyam Limkhuh

⁹ Judüki apinü düjinglim arüngkhimyam thsükih; zhindokhim ju atsüdak khimthünaknü ayunglim khahnap 100nü thsü.

¹⁰ Dungjing muku tüsho athranyukbe muku müwayinchinü thsü. Dungjingbo wuklobe tüsho yinchi-khrihbo shotoyinchi lakheah.

¹¹ Dukulim thrip ayunglim khahnap 100 tüsho zhindokhimbo, dungjing muku tüsho müwayinchi thranyukbebo muku, tüsho dungjingbo kheak shotoyinchi wuklobebo le yinchi-khrihbo lakheah.

¹² Aniyüzahlim thrip atolim khahnap 50 tüsho zhindokhimbo, dungjing thürü tüsho athranyukbe thürü.

¹³ Aniakhiuklim thrip atolim khahnap 50 lakheah.

¹⁴ Ripit khülang kheak zhindokhim ashanglim khahnap 15, dungjing mahsam tüsho athranyukbe mahsam.

¹⁵ Tüsho püpü thrip zhindokhim ashanglim khahnap 15, dungjing mahsam tüsho athranyukbe mahsam.

¹⁶ Limkhuh alala mükamde zhindokhimbo khimthünak atsünü akeakkhi lakheah.

¹⁷ Dungjing thranyukbebo ju müwayinchi, awuklobebo le akhrihbebo shotoyinchi, tüsho akudüdap kheak yihkihkhi ju shotoyinchi; tüsho limkhuh dungjingbo alala shotoyinchi khrihbebo lakheah.

¹⁸ Limkhuh ripit zhindokhim ju biyi le mürümmuchu tüsho aneakrüm hing, tüsho khimthünak atsüdak lakheah. Ayunglim khahnap 20, atolim khahnap 5, limkhuh zhindokhim nangde alakheah.

¹⁹ Tüsho dungjing phüyi kheak müwayinchi thranyukbebo lakheah; awuklobebo ju shotoyinchi, tüsho akudüdapbo le akhrihbebo kheak ju shotoyinchi lakheah.

²⁰ Arüngkhimyam tüsho limkhuh alala mükamde achingsang ju müwayinchi lakheah.

Arüngkhimyam Kukrukbo

²¹ Ha amükeambuh Aron tsührü Ithamarnü khuhlangahuhkhi yande Levirünü Mosa yuzüng ching thrütyukkhi Thiyuzüng Thürü zopung arüngkhimyam thsungkheak kukrukbo khekhi ah.

²² Juda trük Hur tsührü, Uri tsührü Bezalelnü Atungpuhnü Mosa ki thiyukhüm jihkhi alala rhimo;

²³ tüsho api lung Dan trük Ahisamak tsührü Aholiab, dozüdodorü tüsho thsüsonungnürü, biyi le mürümmuchu, aneakrüm hing tüsho atsüdak khimthünak keaksorü lakheah.

²⁴ Arüngakopung thsungkheak Atungpuh kilim müsühkhitkhi suna adünkhi ju arüngakopung shekel yande khahngak 1000 lakheah.

²⁵ Boto wühkhe chingnü shotoyinchi adünkhi ju arüngakopung shekel yande khahngak 3430–

²⁶ mihtsürü aban arüngakopung shekel chamkhüh yo beka 1. Kam 20nü akumung azorü wühkhekhi ju mihtsürü 603,550 lakheah.

²⁷ Arüngakopung khimtan tüsho zhindokhim thsüpü shotoyinchi khahngak 3400, khimtan aban thsungkheak khahngak 34 lakheah.

²⁸ Aningkhi khahngak 30nü Bezalelnü yinchitso, dungjing wuklobe, tüsho aku hüpdobebo thsü.

²⁹ Atungpuh kilim müsühkhitkhi müwayinchi ju khahngak 2425.

³⁰ Apinü junü ashorupung khimyam limro khimtanbo, müwayinchi yikeang bede müwayinchi kingaün sadam tüsho pungphurubo,

³¹ limkhuh mükamde khimtanbo tüsho ayüzahpung, arüngkhimyam tüsho limkhuh mükamde achingsangbo thsü.