ABEKHIT 37 - AMÜSÜH HÜM CL Bible (BSI)

Tangzüng Sangdan Thsükhi

¹ Judüki Bezalelnü akasia sangnü sangdan thsü; ayunglim khahnap 2 kheak damshakkhüh, atolim khahnap I kheak damshakkhüh, tüsho achanglim khahnap I kheak damshakkhüh.

² Apinü aleanglim tüsho alunglim suna müthsün lüpkih tüsho amünküp alala yeande suna yihkih.

³ Apinü ju thsungkheak suna phuhpho phüyi thsü, tüsho amühit phüyi ching yuk; phuhpho mahne thripkhüh kheak, tüsho püpü mahne thripkhüh kheak lakheah.

⁴ Apinü akasia sangnü akhrihbe sangbo thsü tüsho sunanü mujudo.

⁵ Tüsho apinü sangdan shuhpü thsüde akhrihbebo ju sangdan rheangbo kheak phuhphobo ching yuk.

⁶ Apinü mihmüthsüm binkiu suna müthsünnü thsü; ayunglim khahnap 2 kheak damshakkhüh tüsho atolim khahnap 1 kheak damshakkhüh lakheah.

⁷ Apinü suna kingkhinü cherubim mahne thsü; apinü mihmüthsüm binkiu mahne akheam kheak thsü.

⁸ Akheam khülang kheak cherub khülang tüsho cherub khülang püpü akheam kheak thsü; apinü mihmüthsüm binkiu khülang akheam mahne kheak cherubim thsü.

⁹ Cherubimnü arü ghidükeangbo mihmüthsüm binkiu lüpdode akulim chungkih, tüsho ane miro kheahachih; cherubim mirobo ju mihmüthsüm binkiu lim abin.

Yikhap Dükhüm Thsükhi

¹⁰ Apinü akasia sangnü dükhüm thsü; ayunglim khahnap 2, atolim khahnap 1, tüsho achanglim khahnap 1 kheak damshakkhüh lakheah.

¹¹ Apinü ju kheak suna müthsün lüpkih tüsho alala mükamde suna yihkih.

¹² Apinü mükamde akümlopü müyikhühnü thsü, tüsho akümlopü alala mükamde suna yihkih.

¹³ Tüsho apinü ju thsungkheak suna phuhpho phüyi thsü, tüsho amühitbo ching ajing phüyi abande yuk.

¹⁴ Phuhphobo ju dükhüm shuhpü akhrihbebo wuklode akümlopü thüninde yuk.

¹⁵ Apinü dükhüm shuhpü akhrihbebo ju akasia sangnü thsü, tüsho ju kheak suna lüpkih.

¹⁶ Apinü phurubo, pungbo, phühbo, tüsho phurusükbo yukhu kingaünpü suna müthsünnü thsü.

Tsünpung Dubopung Thsükhi

¹⁷ Apinü suna müthsünnü kingde tsünpung dubopung thsü. Adung, adüthrün, sangbün-ruk pungbo, tüsho züt thsükhibo bümkhüh lang thsü.

¹⁸ Tüsho arheanglimnü adüthrün thuruk akhiukshih: adubopung düthrün mahsam thripkhüh tüsho mahsam püpü thrip lakheah.

¹⁹ Almond sangbün duduhde tüsho apungkhi nangde pung mahsam adüthrün khülang kheak kih, mahsam ju püpü düthrün kheak kih, tüsho alala rukhühnü adüthrün thuruk tsünpung dubopung kheaknü akhiukshih.

²⁰ Tsünpung dubopung kheak pung phüyi aban almond pungkhi nangde sangbün züt thsükhibo lakheah.

²¹ Akhuhbe dudu düthrün khüp aduduh khülang, mahnepü dudu düthrün khüp aduduh khülang, mahsampü dudu düthrün khüp aduduh khülang–alalanü adüthrün thuruk tsünpung dubopung chingnü akhiukshih.

²² Khah zhimpung, adüthrün tüsho tsünpung dubopung ju pangkhüh lang akingkhi suna müthsünnü thsü.

²³ Tüsho apinü tsünpung thüne, mokhih-müjipbe tüsho phurubeakbo suna müthsünnü thsü.

²⁴ Tsünpung dubopung tüsho kukrukbo alala suna müthsün khahngak 35nü thsü.

Jinjinlak Kingaün Sadam Thsükhi

²⁵ Apinü jinjinlak kingaün sadam akasia sangnü thsü. Ayunglim khahnap 1, atolim khahnap 1, tüsho achanglim khahnap 2nü arihkhühnü thsü. Apang kheak ju ajuhbo kihshih.

²⁶ Aku le athrip alala tüsho ajuhbo suna müthsünnü lüpdo, tüsho amung yeande suna yuk.

²⁷ Ju hanbe suna phuhpho mahne thsü tüsho amung yean khüp ahanbe sangkhrih tholopü thrip mahne kheak yihkih.

²⁸ Tüsho apinü sangkhrihbo akasia sangnü thsübah suna müthsünnü lüpdo.

Amujube Müdangke tüsho Rhümthüneabe

²⁹ Apinü thüneabe nangde düsahde mujude-müsühkhitbe müdangke amüsüh tüsho thüneabebonü jinjinlak müthsün thsü.