ABEKHIT 36 - AMÜSÜH HÜM CL Bible (BSI)

¹ “Bezalel le Aholiab, tüsho Atungpuhnü arüngako alala rhimopü lümlung tüsho mükheahmudu jihrü abannü Atungpuhnü thiyukhüm jihkhi alala yande arhimobah.”

Thsambahbo Hihde Handarükhi

² Judüki Mosanü Bezalel le Aholiab, tüsho arübah rhimoshihpü Atungpuhnü lümlung jihrü tüsho mulong qiurü thsüsonungnürü alala ji.

³ Arünü arüngkhimyam rhimode ayüpü Israelrünü kingaün hande arükhi alala Mosa kheaknü leangkhi. Tüsho mihtsürübonü yapsu aban mutukzhakde arung kingaün handarü.

⁴ Jumonü thsüsonungnürü alalanü arü arüngakopung rhimo zokheambah arü,

⁵ tüsho Mosa ki tha, “Atungpuhnü thiyukhüm jihkhi rhimopü mihtsürübonü yihnüpü kheak kihode hande arüdo.”

⁶ Jumonü Mosanü thiyukhüm jih tüsho arünü binkheampung alala ching ha yu yüshih: “Athrürü yungsho aliberü shenü she arüngakopung arung thsungkheak dürhimo.” Jumonü mihtsürübonü jushu a hande marü,

⁷ tümütüsho arü lakhi ju rhimo alala thsungkheak yihnüpü kheaknü alü lakheah.

Arüngkhimyam Thsükhi

⁸ Judüki arü bolung arüngkhimyam thsürü thsüsonungnürübonü khimthünak, biyi, tüsho mürümmuchu le aneakrüm hingnü zhindokhim thürü thsü; cherubim yak khode thsü.

⁹ Zhindokhim aban ayunglim khahnap 28, tüsho atolim khahnap 4; zhindokhim ju akeara rukhüh lakheah.

¹⁰ Tüsho arünü zhindokhim phüngü ju rukhüh thüreru, tüsho püpü phüngü rukhüh thüreru.

¹¹ Apinü athüreru aban zhindokhim münkheam kheak biyi hingnü rhedo; apinü mahnepü thüreru kheak aleanglim junangde thsü.

¹² Arünü zhindokhim thürerukhi khülang akheambe kheak arhedokhi thünim yihkih tüsho mahnepü akheam kheak thünim yihkih; arhedokhibonü zhindokhim khülangnü khülang kheak wuhru.

¹³ Arünü zhindokhimbo wuhrupü sunanü awuklobe thünim thsü, junangde arüngkhimyam ju khülang lapü thsü.

¹⁴ Arünü arüngkhimyam kumung phudopü mihnu namnü zhindokhim thürükheak khülang thsü.

¹⁵ Arünü zhindokhim aban ayunglim khahnap 30, atolim khahnap 4nü thsü; tüsho zhindokhim thürükheak khülang alala akeara rukhüh lakheah.

¹⁶ Arünü phüngü khülang ching, tüsho thuruk püpü de thüreru.

¹⁷ Arünü zhindokhim mahne chamshakde athürerukhi akheam aban kheak aleanglim arhedokhi thünim yuk.

¹⁸ Tüsho arünü müwayinchinü awuklobe thünim thsübah arhedobebo ching yuk, tüsho khim ju wukrubah khülang kampü thsü.

¹⁹ Arünü namfimihnupung küp rung khiungkhi tüsho mihnu küpbonü khimyam muhiudobe thsü.

²⁰ Arünü arüngkhimyam thsungkheak akasia sangnü sangbeakbo thsüa zhipshih.

²¹ Sangbeak aban ayunglim khahnap 10 tüsho atolim khahnap 1 kheak damshakkhüh lakheah.

²² Sangbeak abande arhükarünpü mahne mujukkhitshih. Arüngkhimyam sangbeak alala jude thsü.

²³ Arünü arüngkhimyam düjinglim sangbeak muku thsü.

²⁴ Sangbeak muku ching yüzahshihpü shotoyinchi thranyukbebo yirü sangbeak mujukkhitkhi aban athranyukbe mahnene thsü.

²⁵ Arüngkhimyam dukulim sangbeak muku thsü,

²⁶ tüsho shotoyinchi thranyukbebo yirü, sangbeak aban mahnene thsü.

²⁷ Arünü arüngkhimyam aniyüzahlim akheam lim sangbeak thuruk thsü.

²⁸ Arünü arüngkhimyam dunglim amühit mahne thsungkheak sangbeak mahne thsü.

²⁹ Harü amühit sangbeakbo ju ajing limnü aku lim khiungde thoru. Amühit mahne kamshihkhi sangbeakbo junangde thsü.

³⁰ Junangde sangbeak tizheah tüsho shotoyinchi thranyukbebo thürükheak thuruk, sangbeak aban mahnene lakheah.

³¹ Tüsho arünü akasia sangnü akhrihbe thsü; arüngkhimyam thripkhüh sangbeakbo thsungkheak phüngü,

³² arüngkhimyam püpü thrip sangbeakbo thsungkheak akhrihbe phüngü, tüsho limshu aniyüzahlim arüngkhimyam sangbeakbo thsungkheak phüngü.

³³ Arünü aphulung khrihbe junü sangbeakbo akheamnü akheam khiungde kimhoshih.

³⁴ Arünü sangbeakbo kheak suna yihkih, akhrihbebo tholopü phuhphobo sunanü thsü tüsho akhrihbebo kheak suna yihkih.

³⁵ Arünü zhindokhim ju biyi, mürümmuchu, aneakrüm hing tüsho khimthünak atsüdak keakkhinü thsü. Ju athsüsorünü athsükhi cherubim keakyukde thsü.

³⁶ Arünü ju thsungkheak akasia sangnü dungjing phüyi thsübah suna yihkih. Arünü awuklobe sunanü thsü tüsho shotoyinchinü adubopungbo phüyi thsü.

³⁷ Arünü arüngkhimyam ripit zhindokhim ju biyi, mürümmuchu, aneakrüm hing tüsho khimthünaknü thsü,

³⁸ tüsho awuklobe bede dungjing phüngü thsü. Arünü dungjingbo ku le phuhpho kheak suna yihkih tüsho müwayinchinü athranyukbe phüngü thsü.