ABEKHIT 31 - AMÜSÜH HÜM CL Bible (BSI)

Arüngkhimyam Thsürübo

¹ Atungpuhnü Mosa ki tha:

² “Kheahang, inü Juda trük Hur tsührü, Uri tsührü Bezalel mokhitdo,

³ tüsho inü api lümlung ching, anikhitkhi ching, mükheahmudu ching, tüsho khah-rhimo alala ching Thrünpuh menü mishih,

⁴ thsüsonungnüpü, suna, shotoyinchi, müwayinchi rhimopü,

⁵ mürelung kiurüppü tüsho thsüa zhipshihpü, sang sümzüsümdopü, tüsho thsüsonungnü alala.

⁶ Kheaküshe inü Dan trük Ahisama tsührü Oholiab api rungpü moyukjih; tüsho thsüsonungnürü alala kilim inü nü ki thiyukhüm jihkhi alala rhimoshihpü rükrirükko jih:

⁷ ashorupung khimyam, tangzüng sangdan tüsho mihmüthsüm binkiu, tüsho khimyam ching kukruk alala–

⁸ dükhüm tüsho kukrukbo, suna müthsün tsün dubopung tüsho naknakruru kukrukbo alala, jinjinlak kingaün sadam,

⁹ taka kingaünbe kingaün sadam tüsho pungphuru alala, adubopung kihde müsühmüraphuru–

¹⁰ tüsho Aron le api tsührübo amükeamrü thsüde tankihchoki thsungkheak akeakkhi amüsüh khimmihbo,

¹¹ tüsho amüsüh dangpung thsungkheak mujude-mokhitbe müdangke tüsho jinjinlak. Inü nü ki thiyukhüm jihkhi nangde arünü jurü thsübah.”

Amuni

¹² Atungpuhnü Mosa ki tha,

¹³ “Israelrü ki thaang, ‘Nüsanü I yo amunibo mungbeah, tümüde ha I tüsho nüsa dükeak nüsa lünbo amuyung amütsan khülang lah, junangde I nüsa tsangkhitbuh Atungpuh de nüsanü mükheahbah.

¹⁴ Amuni mungang, tümütüsho ha nüsa thsungkheak amüsüh lah; ha thsümünimrü aban asheshihbah; shepünü ha nimung rhimo rhimobanü api ju nihbuh mihtsürü lungnü khekhita bahbah.

¹⁵ Nimung thuruk rhimo rhimobah, tüshe athüne nipü ju sühakhim amuni, Atungpuh kilim amüsüh lah. Shepünü amuni rhimo rhimobanü asheshihbah.

¹⁶ Israel mihtsürünü ha nimung ju tangzüng amütsan khülang thsüde azobeah.

¹⁷ Ha Israel mihtsürü le I dükeak lünnü amütsan khülang labah, tümütüsho I Atungpuhnü yinmi tüsho alomi nimung thuruk chingnü thsükhi, tüsho athüne nipü inü rhimo chingnü tuklo tüsho sühakhim.’ ”

¹⁸ Tüsho küyimki apinü Sinai Müzüng kheak Mosa ki asukachihkhamkhea, apinü anihbuh kilim Thrünpuhnü thiyukhüm thrütkihkhi lungbeak mahne jih.