ABEKHIT 30 - AMÜSÜH HÜM CL Bible (BSI)

Jinjinlak Kingaün Sadam

¹ “ Jinjinlak takpü akasia sangnü kingaün sadam khülang thsang.

² Ayunglim khahnap 1, atolim khahnap 1, tüsho achanglim khahnap 2nü arihkhühnü thsang. Ju kheak ajuhbo kihshang.

³ Aku le athrip alala tüsho ajuhbo suna müthsünnü lüpdoang, tüsho amung yeande suna yukang.

⁴ Ju hanbe suna phuhpho mahne thsang tüsho amung yean khüp ahanbe sangkhrih tholopü thrip mahne kheak yihkihang.

⁵ Harü sangkhrihbo akasia sangnü thsang tüsho sunanü lüpdoang.

⁶ Ha kingaün sadam ju tangzüng sangdan mikhuh zhinkhi khim aleanglim zoang. Ju dangpung ching inü nü shorubah.

⁷ Aronnü yapsu aban tsünpung kümpü arüchoki kingaün sadam kheak jinjinlak takbeah.

⁸ Apinü shuhyini ching tsünpung takkihchoki jinjinlak taklobeah, junangde jinjinlak ju lün alala thsungkheak mutukzhakde Atungpuh miki takde alabah.

⁹ Ha kingaün sadam kheak püpü jinjinlak, yungsho taka kingaün yungsho hi kingaün, tüsho ayungbe kingaün düjih.

¹⁰ Aronnü ha juhbo kheak kam ching khülang ki dünthsükhiang. Ha kam ching khülang ki dünthsükhipü ju lünbo thsungkheak neak kingaün thiyih lungnü jihang. Ha Atungpuh kilim khide amüsüh lah.”

Atungpuh Lapung Khimyam Ruk

¹¹ Atungpuhnü Mosa ki tha,

¹² “Küyimki nünü Israel mihtsürü wühkhe lubanü, mihtsürü abannü nihbuh rhangdung thsungkheak adün jihbeah, junangde wühkhe luchoki api kheak arüm marü.

¹³ Wühkhe ching kheyukrü abannü arüngyam ching yo shekel yande gera 20 adünkhi shekel chamshakkhüh jihbeah. Ha shekel chamshakkhüh ju Atungpuh kilim kingaünkhi ah.

¹⁴ Wühkhe ching kheyukrü aban kam 20 akumungnü Atungpuh kilim kingaün jihbah.

¹⁵ Nüsa rhangdung dünthsükhipü thsungkheak Atungpuh kilim kingaün jihchoki alarünü shekel chamshakkhüh kheak hode müjih tüsho zhochihrünü nükde müjih.

¹⁶ Dünthsükhikhi sho ju Israelrü kilimnü leangkhiang tüsho ashorupung khimyam mukhungmüdan thsungkheak ahoriang. Haju nüsa rhangdungbo thsungkheak dünthsükhide Atungpuh miki Israelrü thsungkheak mümihkhi khülang labah.”

Müwayinchi Müsühmüra-phuru

¹⁷ Atungpuhnü Mosa ki tha,

¹⁸ “ Müsühmürapü thsungkheak müwayinchi dubopung kihde müwayinchi müsühmüra-phuru khülang thsang. Hoju ashorupung khimyam le kingaün sadam dükeak zoang tüsho ju ching ke yukang.

¹⁹ Aron tüsho api tsührübonü ju chingnü arü khah tüsho jing müsühbah.

²⁰ Küyimki arünü ashorupung khimyam ching yüzahbanü, arünü kenü amüsühbah, junangde arü müshe. Kheaküshe, küyimki arünü ATUNGPUH kilim monü taka kingaün jihde I tankihpü kingaün sadam ki yübanü,

²¹ arünü arü khah tüsho jing müsühbah, junangde arü müshe. Ha lünnü Aron tüsho api tsühsoniuso lünbo thsungkheak thiyuzüng labah.”

Mujude-müsühkhitbe Müdangke

²² Atungpuhnü Mosa ki tha,

²³ “Atsüdak thüneathürabe harü luang: rhümthüneabe azhihzhih khahngak 6, aniung neakrüm-sungsung khahngak 3, thüre athüneabe khahngak 3,

²⁴ tüsho kassia moli khahngak 6–alala arüngakopung shekel ayannü–tüsho oliv müdangke pungdüchi 4.

²⁵ Thüneabe nangde düsahde mujude-müsühkhitbe müdangke amüsüh thsakhamang.

²⁶ Hanü ashorupung khimyam tüsho tangzüng sangdan mujude-müsühkhitang;

²⁷ dükhüm tüsho kukrukbo, tsünpung dubopungbo tüsho kukrukbo, tüsho jinjinlak kingaün sadam;

²⁸ pungphurubo alala bede taka kingaünpung sadam tüsho adubopung bede müsühmüra-phuru.

²⁹ Nünü jurübo müsühkhitang, junangde arübo khide amüsüh labah; tümüpürü jurü qiubanü amüsüh kambah.

³⁰ Aron tüsho api tsührübo müsühkhitang, junangde arübo amükeamrü thsüde I tankihbah.

³¹ Israelrü ki thaang, ‘Ha lünbo thsungkheak I ki mujude-müsühkhitbe amüsüh labah.

³² Ha mihtsürü phü kheak mubukkih; yungsho hanangde püpü müdangke dürhimokhit. Ha amüsüh ah, tüsho nüsa ki amüsüh labah.

³³ Shepünü thüneabe ha ruk thsüba tüsho amükeamrü kheak hode shepünü ayukbanü api ju nihbuh mihtsürü bolungnü khekhita bahbah.’ ”

Jinjinlak

³⁴ Atungpuhnü Mosa ki tha, “Thüneathürabe–ano, onika, galbanun tüsho jinjinlak müthsün luang; jurübo adünkhi rukhüh lang alabah.

³⁵ Thüneabe dungrukhi nangde jurübonü jinjinlak thsang. Tsangkhitde azopü tüsho amüsüh lapü thsungkheak thimi yukang.

³⁶ Ju chingnü anükhüh ayikangkang kamde dungang tüsho inü nü shorupung khimyam ching tangzüng sangdan miki zoang. Ha nü ki khide amüsüh labah.

³⁷ Nüsa thsungkheaknü hanangde püpü jinjinlak düthsü; Atungpuh kilim ha amüsüh de lümang.

³⁸ Khürünü thüneabe thsüpü ha ruk thsüsho api ju nihbuh mihtsürü bolungnü khekhita bahbah.”