ABEKHIT 26 - AMÜSÜH HÜM CL Bible (BSI)

Arüngkhimyam

¹ “Nüsanü zhindokhim ching khimthünak atsüdak, biyi, mürümmuchu tüsho aneakrüm hing keakyukde athsükhi thürü yukde arüngkhimyam thsang; thsüsonungnürünü athsükhi cherubim yukde keakang.

² Zhindokhim ayunglim khahnap 28, tüsho atolim khahnap 4 labah. Tüsho zhindokhim aban akeara rukhüh labah.

³ Zhindokhim phüngü ju rukhüh thüreruang, tüsho püpü phüngü rukhüh thüreruang.

⁴ Nüsanü athürerukhi zhindokhim khülang münkheam kheak aleanglim biyi hingnü rhedoang tüsho mahnepü zhindokhim kheak she jude thsang.

⁵ Zhindokhim thürerukhi khülang akheambe kheak arhedokhi thünim yihkihang tüsho mahnepü akheam kheak thünim yihkihang.

⁶ Tüsho nüsanü zhindokhimbo wuhrupü sunanü awuklobe thünim thsang, junangde ju arüngkhimyam khülang labah.

⁷ “Nüsanü arüngkhimyam kumung phudopü mihnu namnü zhindokhim thürükheak khülang thsang.

⁸ Zhindokhim aban ayunglim khahnap 30, atolim khahnap 4nü thsang; tüsho zhindokhim thürükheak khülang alala akeara rukhühnü thsang.

⁹ Arü phüngü khülang ching tüsho thuruk püpü de thüreruang. Thuruk ju arüngkhimyam mikhuh ki mahne thsüde naploang.

¹⁰ Zhindokhim mahne chamshakde athürerukhi akheam aban kheak aleanglim arhedokhi thünim yukang.

¹¹ “Tüsho nüsanü müwayinchinü awuklobe thünim thsübah arhedokhibo ching yukang, tüsho khim ju wukrubah khülang kamshang.

¹² Zhindokhim aningkhi junü arüngkhimyam dunglim zhinang.

¹³ Khimyam thrip abande aningkhi zhindokhim ayunglim khahnap 1nü zhindoang.

¹⁴ Namfimihnupung küp rung khiungkhi tüsho mihnu küpbonü khimyam muhiudobe thsang.

¹⁵ “Tüsho nüsanü arüngkhimyam thsungkheak akasia sangnü sangbeakbo thrüna zhipshang.

¹⁶ Sangbeak aban ayunglim khahnap 10 tüsho atolim khahnap 1 kheak damshakkhüh labah.

¹⁷ Sangbeak abande arhükarünpü mahne mujukkhitshang. Arüngkhimyam sangbeak alala jude thsang.

¹⁸ Arüngkhimyam düjinglim sangbeak muku thsang,

¹⁹ Sangbeak muku khüp shotoyinchi thranyukbebo yirü sangbeak mujukkhitkhi aban athranyukbe mahnene thsang.

²⁰ Arüngkhimyam dukulim sangbeak muku thsang,

²¹ tüsho shotoyinchi thranyukbebo yirü, sangbeak aban mahnene thsang.

²² Arüngkhimyam aniyüzahlim akheam lim sangbeak thuruk thsang,

²³ Tüsho arüngkhimyam dunglim amühit mahne thsungkheak sangbeak mahne thsang.

²⁴ Harü amühit sangbeakbo ju ajing limnü aku lim khiungde thoruang. Amühit mahne kamshihkhi sangbeakbo junangde thsang.

²⁵ Junangde sangbeak tizheah tüsho shotoyinchi thranyukbebo thürükheak thuruk, sangbeak aban mahnene labah.

²⁶ “Tüsho nüsanü akasia sangnü akhrihbe thsang; arüngkhimyam thripkhüh sangbeakbo thsungkheak phüngü,

²⁷ arüngkhimyam püpü thrip sangbeakbo thsungkheak akhrihbe phüngü, tüsho limshu aniyüzahlim arüngkhimyam sangbeakbo thsungkheak phüngü.

²⁸ Aphulung khrihbe junü sangbeakbo akheamnü akheam khiungde akimhobah.

²⁹ Sangbeakbo kheak suna yihkihang, akhrihbebo tholopü phuhphobo sunanü thsang tüsho akhrihbebo kheak suna yihkihang.

³⁰ Nüsa ki müzüng kheak akearaa huhkhi yande arüngkhimyam ju thsang.

³¹ “Nüsanü zhindokhim ju biyi, mürümmuchu, aneakrüm hing tüsho khimthünak atsüdak keakkhinü thsang. Ju athsüsorünü athsükhi cherubim keakyukde thsang.

³² Ju suna yihkihkhi akasia sang dungjing phüyi kheak wuhkih-a zhinang, tüsho shotoyinchi dubopung phüyi kheak zhipshang.

³³ Zhindokhim ju awuklobe kheaknü zhinang tüsho ju dunglim tangzüng sangdan zoang. Zhindokhim junü Khide Amüsüh Dangpung kheaknü Amüsüh Dangpung büthsüjihbah.

³⁴ Khide Amüsüh Dangpung ching lakhi tangzüng sangdan kheak mihmüthsüm binkiu yihkihang.

³⁵ Arüngkhimyam dukulim zhindokhim wungdo dükhüm zoang tüsho düjinglim ju mikhuh tsünpung dubopung zoang.

³⁶ “Nüsanü arüngkhimyam ripit zhindokhim ju biyi, mürümmuchu, aneakrüm hing tüsho khimthünaknü yak khode thsang.

³⁷ Tüsho zhindokhim thsungkheak akasia sangnü dungjing phüngü thsang, tüsho ju kheak suna yihkihang; awuklobebo ju suna tüsho dungjingbo thsungkheak müwayinchinü adubopungbo phüngü thsang.