ABEKHIT 25 - AMÜSÜH HÜM CL Bible (BSI)

Arüngkhimyam thsungkheak Jihchungkhibo

¹ Judüki Atungpuhnü Mosa ki tha:

² “I kilim kingaün hande arüpü Israelrü ki thaang. Mihbüm abannü mulongsahde ajihkhi I thsungkheaknü leangkhiang.

³ Tüsho nünü arü kheaknü kingaün harübo luang: suna, shotoyinchi, müwayinchi;

⁴ biyi le mürümmuchu tüsho aneakrüm hing, atsüdak khimthünak, tüsho mihnu nam;

⁵ namfimihnupung küp amürüm; atsüdak shihküp; akasia sang;

⁶ tsünpungbo thsungkheak moke; amujube müdangke tüsho rhümthüneabe thsungkheak thüneathürabebo;

⁷ lungmütribo, amükeamrü khim tüsho treangkhümbe ching yukpü lungbo.

⁸ Tüsho arünü I khilim arüngakopung khülang thsüshang, junangde I arü bolung labah.

⁹ Inü nü ki huhpü lakhi jakjak ha arüngkhimyam tüsho binkiulungkiubo thsang.

Tangzüng Sangdan

¹⁰ “Tüsho arünü akasia sangnü sangdan thsübah; ayunglim khahnap 2 kheak damshakkhüh, atolim khahnap I kheak damshakkhüh, tüsho achanglim khahnap I kheak damshakkhüh.

¹¹ Aleanglim tüsho alunglim suna müthsün lüpkihang tüsho amünküp alala yande suna yihkihang.

¹² Nüsanü ju thsungkheak suna phuhpho phüyi thsang, tüsho amühit phüyi ching yukang; phuhpho mahne thripkhüh kheak, tüsho püpü mahne thripkhüh kheak labah.

¹³ Nüsanü akasia sangnü akhrihbe sangbo thsang tüsho sunanü mujudoang.

¹⁴ Nüsanü akhrihbebo ju sangdan rheangbo kheak phuhphobo ching yukang, junangde jurünü sangdan shuhbah.

¹⁵ Akhrihbebo ju sangdan phuhphobo ching labah; jurübo ju chingnü müyihkhit.

¹⁶ Tüsho sangdan ching ju inü nüsa kilim jihkhi thiyukhümbo thrütkihkhi lungbeak mahne yukang.

¹⁷ Nüsanü mihmüthsüm binkiu suna müthsünnü thsang; ayunglim khahnap 2 kheak damshakkhüh tüsho atolim khahnap I kheak damshakkhüh labah.

¹⁸ Tüsho nüsanü sunanü kingde cherubim mahne thsübah; mihmüthsüm binkiu mahne akheam kheak thsang.

¹⁹ Akheam khülang kheak cherub khülang thsang, tüsho cherub khülang püpü akheam kheak thsang; nüsanü mihmüthsüm binkiu khülang akheam mahne kheak cherubim thsang.

²⁰ Tüsho cherubimnü arü ghidükeangbo mihmüthsüm binkiu lüpdode akulim chungkihbah, tüsho ane miro kheahachihbah; cherubim mirobo ju mihmüthsüm binkiu lim abinbah.

²¹ Nüsanü sangdan mikheak mihmüthsüm binkiu yihkihbah, tüsho inü ajihpü lakhi lungbeak mahne sangdan ching yukang.

²² Tangzüng sangdan kumung lakhi cherubim mahne dükeaknü inü nü shorubah tüsho Israelrü thsungkheak I yukhümbo alala jihbah.

Yikhap Dükhüm

²³ “Nüsanü akasia sangnü dükhüm thsang; ayunglim khahnap 2, atolim khahnap I, tüsho achanglim khahnap 1 kheak damshakkhüh.

²⁴ Nüsanü ju kheak suna müthsün lüpkihang tüsho alala mükamde suna yihkihang.

²⁵ Nüsanü mükamde akümlopü müyikhühnü thsang, tüsho akümlopü alala mükamde suna yihkihang.

²⁶ Tüsho nüsanü ju thsungkheak suna phuhpho phüyi thsang, tüsho amühitbo ching ajing phüyi abande yukang.

²⁷ Phuhphobo ju dükhüm shuhpü khrihbebo wuklode akümlopü thüninde yukang.

²⁸ Nüsanü akhrihbebo ju akasia sangnü thsang, tüsho ju kheak suna lüpkihang tüsho jurünü dükhüm shuhang.

²⁹ Nüsanü phurubo, pungbo, phühbo, tüsho phurusükbo yukhu kingaünpü suna müthsünnü thsang.

³⁰ Tüsho nüsanü kamruhroro I miki dükhüm kheak amüsüh yikhap zoang.

Tsünpung Dubopung

³¹ “Nüsanü suna müthsünnü kingde tsünpung dubopung thsang. Adung, adüthrün, pungbo, züt thsükhibo tüsho sangbünbo bümkhüh lang thsang.

³² Tüsho arheanglimnü adüthrün thuruk akhiukshang: adubopung düthrün mahsam thripkhüh tüsho mahsam püpü thrip labah.

³³ Almond sangbün duduhde tüsho apungkhi nangde pung mahsam adüthrün khülang kheak kihbah, mahsam ju püpü düthrün kheak kihbah, tüsho alala rukhühnü adüthrün thuruk tsünpung dubopung kheaknü akhiukshang.

³⁴ Tsünpung dubopung kheak pung phüyi aban almond pungkhi nangde sangbün züt thsükhibo labah.

³⁵ Akhuhbe dudu düthrün khüp aduduh khülang, mahnepü dudu düthrün khüp aduduh khülang, mahsampü dudu düthrün khüp aduduh khülang–alalanü adüthrün thuruk tsünpung dubopung chingnü akhiukshang.

³⁶ Aduduhbo le adüthrünbo ju pangkhüh lang akingkhi suna müthsünnü athsübah.

³⁷ Jushu tsünpung thüne thsübah ju kheak zhipshang, junangde ju miki yinshihbah.

³⁸ Tüsho mokhih müjipbe le phurubeakbo ju suna müthsünnü thsang.

³⁹ Tsünpung dubopung tüsho kukrukbo alala suna müthsün khahngak 35nü thsang.

⁴⁰ Jurübo inü nüsa ki müzüng kheak huhkhi yande thsang.