ABEKHIT 20 - AMÜSÜH HÜM CL Bible (BSI)

Thiyuzüng Thürü

¹ Tüsho Thrünpuhnü harü yubo alala asukde tha:

² “I nüsa Ijip lomi, azhorü yamkhün chingnü abekhitbuh Atungpuh nüsa Thrünpuh ah.

³ “Nünü I miki püpü thrünpuhbo dülashih.

⁴ “Nünü nü thsungkheak thüning, yungsho alo kheak lakhi, yungsho ke ching lakhi tümükhüh kiphahde sangthsü düthsü;

⁵ nünü arü ki dükhukning yungsho dükingaün. Tümüde I Atungpuh nüsa Thrünpuh, mükthsü Thrünpuhnü bebuhrü mülimkhi tsührübo kheak lün mahsam tüsho lün phüyi khiungde I thraneanrü rhua kheahchoh,

⁶ tüshe I muzhorü tüsho I yukhümbo zorü chithürübo ki mihmüthsüm huhchoh.

⁷ “Nünü Atungpuh nü Thrünpuh mung akeangkeang ching dütam, tümüde Atungpuhnü api mung akeangkeang ching tamrü thsümüchibah.

⁸ “Amunimung müsühde azopü lümkhitang.

⁹ Nimung thuruk nünü nü rhimo alala thsübah,

¹⁰ tüshe athüne nipü ju Atungpuh nü Thrünpuh amunimung ah. Ju nimung nünü rhimo tümü düthsü; nü, nü tsührübo, nü tsührübebo, nü yamlarübo, nü yamlaberübo, nü shiwühbo yungsho nü chipi bukkhüp nü hanrübo.

¹¹ Tümütüsho Atungpuhnü nimung thuruk chingnü thüningbo tüsho alomi, keto tüsho ju ching lakhi alala thrün, tüsho thüne nipü sühakhim. Jumonü Atungpuhnü amunimung müngühjih tüsho müsühkhit.

¹² “Nü buh tüsho nü be wüntreang, junangde Atungpuh nü Thrünpuhnü nü kilim jihkhi lo ching nü kutsüp ashang labah.

¹³ “Nünü dülaksah.

¹⁴ “Nünü müzammüram düyihbeak.

¹⁵ “Nünü dahüh.

¹⁶ “Nünü nü yamhingrü azhihde arükchih thiyumütsan düthsü.

¹⁷ “Nünü nü yamhingrü yam dülune; nünü nü yamhingrü niuberü, ayamlarü, ayamlaberü, api moshipung, donki yungsho api lakhi tümü dülune.”

Mihtsürübonü Atrekhi

¹⁸ Kheakü mihtsürü alalanü tsüngmuk, chinchobe, hulipungpung düsheak tüsho müzüng kheak mokhühkhi kheahde alakheah. Tüsho küyimki arünü ju ngükheanü, arübo ajan tüsho limshu ching zhip.

¹⁹ Judüki arünü Mosa ki tha, “Nünü isa ki asukang tüsho isanü anibah; tüshe Thrünpuhnü isa ki dasukshih, jude yungsho isa ashebah.”

²⁰ Tüsho Mosanü mihtsürübo ki tha, “Dütre; tümüde nüsa rüka kheahpü Thrünpuh arüdo, tüsho api trekhi nüsa miki labah, junangde nüsanü neak müyihbeak.”

²¹ Jumonü mihtsürübonü limshude zhip, tüshe Mosa a Thrünpuh lapung amiting akheah thüninde yü.

Kingaün Sadam Yakzanbo

²² Judüki Atungpuhnü Mosa ki tha, “Nünü Israelrü ki ha thaang: ‘Inü yinmi chingnü nüsa ki asukachihkhi nüsanü ngüdo.

²³ Nüsanü I kheak atrude shotoyinchi thrünpuhbo, suna thrünpuhbo nüsa thsungkheak tümü düthsü.

²⁴ Nüsanü I thsungkheak alonü kingaün sadam khülang thsang tüsho ju kheak taka kingaün, mungtsü kingaün, namfimihnu tüsho moshipungbo jihang. Nüsanü I kingaünpü inü mokhita lakhi dangpung aban ching I nüsa kilim arübah tüsho nüsa müngühjihbah.

²⁵ Tüsho nüsanü I thsungkheak lungnü kingaün sadam thsüsho, ju nüsanü akheanrüpkhi lungnü düthsü; tümüde nüsanü ju kheak müzam ahorisho, nüsanü ju müneando.

²⁶ Nü bünkeang lakhi ngübah mütsüle I kingaün sadam jing düküpung kheak duwutu.’