ABEKHIT 19 - AMÜSÜH HÜM CL Bible (BSI)

Sinai Müzüng kheak Israelrü

¹ Israelrü Ijip chingnü awukhiuk dunglim khinu asampü ching, ju nimung arübo Sinai Müzüng ching arü.

² Tümüde arü Rephidim chingnü tsahmusubah Sinai sunglo ching arü tüsho binkheam. Junangde Israel ju müzüng müngüh binkheam.

³ Mosanü Thrünpuh kilim wutu, tüsho Atungpuhnü awung chingnü api ki ji, “Hanangde nünü Jakob yamkhün tüsho Israelrü ki thabah:

⁴ Inü Ijiprü kheak rhimokhi, tüsho müleang ghidükeangbo kheak nüsa I kilim hanbah arükhi nüsanü ngüdo.

⁵ Jumonü kheakü nüsanü atsütsü I yu anisho tüsho I tangzüng zosho, mihtsürü alala kurungkheak nüsa I lakhit atsübe thsübah; tümüde alomi alala I yo ah.

⁶ Tüsho nüsa ju I kilim amükeamrü kiulongthsü tüsho amüsüh trükshih khülang thsübah. Harü yubo ha nünü Israelrü ki thaang.”

⁷ Jumonü Mosanü arübah mihtsürübo kurung azothsürü ji tüsho Atungpuhnü api ki thiyukhüm jihkhi harü yubo alala arü ki tha.

⁸ Judüki mihtsürü alala rukhühnü alo tüsho tha, “Atungpuhnü athakhi yu alala isanü arhimobah.” Jumonü Mosanü mihtsürübo yu Atungpuh kilim lulode arü.

⁹ Tüsho Atungpuhnü Mosa ki tha, “Kheahang, inü nü ki asukkhi mihtsürübonü sobah nü kheak lünnü akin lapü thsüde I nü kilim amo akheah ching arükheah.” Junangde Mosanü mihtsürübo yu Thrünpuh ki tha.

¹⁰ Judüki Atungpuhnü Mosa ki tha, “ Mihtsürübo kilim yüang tüsho khihni le shido arü tsangkhitang, tüsho arü khimmih müsühshang.

¹¹ Tüsho arübo mahsam nipü thsungkheak thsakhamshang. Tümütüsho mahsam nipü Sinai Müzüng kheak mihtsürü alala miki Atungpuh akibah.

¹² Nünü alala mükamde mihtsürübo thsungkheak kishakde thaang, ‘Nüsanü müzüng kheak muwutupü yungsho ajing kheak müqiupü aniyuka zoang. Sherünü awung qiubanü tsükjide asheshihbah.

¹³ Khah khülangnü she api müqiu, tüshe tsükjide api lungnü arubah yungsho hühzonü akipbah; mihtsürü yungsho shiwüh thsüthsü api rhangdung müla.’ Küyimki hulipungpung ashangkhüh mütbanü, arünü müzüng thüninde arübah.”

¹⁴ Judüki Mosanü müzüng kheaknü mihtsürübo kilim akibah tsangkhitjih tüsho arünü arü khimmihbo müsüh.

¹⁵ Tüsho apinü mihtsürübo ki tha, “Asam nipü thsungkheak thsakhamang; niuberü thüninde düyü.”

¹⁶ Asam nipü yapsu müzüng kumung amo akheah kihde tsüngmuk tüsho chinchobe lakheah, tüsho hulipungpung khide achangnü müt, jumonü binkheampung ching mihtsürü alala ajan.

¹⁷ Mosanü mihtsürübo ju Thrünpuh shorupü binkheampung chingnü bekhitbah arü, tüsho arünü müzüng jing kheak zhip.

¹⁸ Kheakü Sinai Müzüng abümnü mokhüh lakheah, tümütüsho ju kheak Atungpuh mo ching aki. Mokhüh ju mokin ching yo mokhüh nangde aki, tüsho müzüng abümnü niuk.

¹⁹ Tüsho küyimki hulipungpung shangde mütbah achangbe tüsho achangbe kamkhea, Mosanü asuk, tüsho Thrünpuh düsheaknü api ki alo.

²⁰ Judüki Sinai Müzüng mujuk kheak Atungpuh aki. Atungpuhnü müzüng mujuk kheak Mosa ji tüsho Mosanü wutu.

²¹ Tüsho Atungpuhnü Mosa ki tha, “Yükiang tüsho mihtsürübo ki müzünde thaang, jude yungsho Atungpuh kheahpü arünü akishak hobah, tüsho arü ahihkhüh shebah.

²² Amükeamrübo she ATUNGPUH thüninde arürübo tsangkhitshang, jude yungsho inü arü thsümüchibah.”

²³ Mosanü Atungpuh ki tha, “ Mihtsürübonü Sinai Müzüng kheak matukhuk; tümüde nünü isa ki müzünde tha, ‘ Müzüng mükamde akishak yukang tüsho ju tsangkhitang.’”

²⁴ Judüki Atungpuhnü api ki alo, “Tsoang, yükiang tüsho Aron nüke atuang. Tüshe amükeamrübo le mihtsürübo Atungpuh kilim atupü akishak dühoshih, jude yungsho apinü arü thsümüchibah.”

²⁵ Jumonü Mosanü mihtsürübo kilim yüki tüsho arü ki asuk.