ABEKHIT 18 - AMÜSÜH HÜM CL Bible (BSI)

Jethronü Mosa Rhuakheahkhi

¹ Mosa akü Jethro, Midia amükeamrü, apinü Mosa tüsho Israelrübo Ijip lomi chingnü Thrünpuhnü küruk bekhitkheanü alala so.

² Jumonü zojihbah ayükhi Mosa niube Zippora api lung bebah Mosa kilim arü,

³ tüsho atsührü mahne Gershom tüsho Eliezer. (Mosanü tha, “I khiungkerü lomi ching hanrü khülang lakheah;” jumonü apinü tsührü khülang mung Gershom de ji.

⁴ Kheaküshe apinü tha, “I buh pürü Thrünpuh ju I rungrü lakheah, tüsho Pharao nukshang chingnü I khümkhit;” jumonü apinü tsührü püpü mung Eliezer de ji.)

⁵ Jethro lung Mosa niube tüsho api tsührü mahne bebah sunglo ching api binpung Thrünpuh wung ching Mosa kilim arü.

⁶ Kheakü apinü Mosa ki tha, “I nü kü Jethro, nü niube lung atsührü mahne bebah nü kilim arüchoh.”

⁷ Jumonü Mosa akü shorupü wukhiuk, tüsho api miki mükhümbah müthsüp. Tüsho arünü tsüde alakhi keoachihbah khimyam ching yüzah.

⁸ Tüsho Mosanü Pharao tüsho Ijiprü kheak Israel thsungkheak Atungpuhnü arhimokhi alala, limro ching küpkhuk arübo kheak arükhi alala, tüsho Atungpuhnü arü bekhitkhi akü ki thaa huh.

⁹ Judüki Atungpuhnü Israel thsungkheak atsü rhimode Ijiprü khah chingnü arü bekhitkhi alala dünkheak Jethronü asüh.

¹⁰ Tüsho Jethronü tha, “Nü tüsho mihtsürübo Ijiprü le Pharao khah chingnü bekhitbuh Atungpuh shiang.

¹¹ Kheakü thrünpuhbo alala kheaknü Atungpuh atobe ah de inü mükheahlah; tümütüsho arünü kükheangde arhimochoki arü kumung api lakheah.”

¹² Judüki Mosa akü Jethronü taka kingaünkhi tüsho laksah-a kingaünkhibo Thrünpuh kilim jih. Tüsho Aron lung Israel azothsürü alala Mosa akü lung yikhap tsühpü Thrünpuh miki arü.

Mahkhaprübo Mokhitkhi

¹³ Ashidopü Mosanü mihtsürübo mahkhappü bin; tüsho mihtsürübonü Mosa miki yapsunü arelim khiungde zhip.

¹⁴ Jumonü mihtsürübo thsungkheak rhimokhi harü alala ngübah Mosa akünü tha, “Nünü mihtsürübo thsungkheak rhimokhi ha tümü a? Tümüde nü langzü bincho, tüsho mihtsürübo nü miki yapsunü arelim khiungde zhipcho?”

¹⁵ Mosanü akü ki alo, “Tümütüsho mihtsürübonü Thrünpuh lümkhi keokhikeorapü I ki arüchoh.

¹⁶ Küyimki arü neamneamruru labanü, arünü I kilim arüchoh, tüsho inü arü khülang le khülang dükeak mahkhapjihchoh; tüsho inü Thrünpuh yuzüngbo tüsho api yakzanbo mükheahshihchoh.”

¹⁷ Jumonü Mosa akünü api ki tha, “Nünü arhimokhi ha atsü yung.

¹⁸ Nü le nü lung harü mihtsürübo dükde keakabahbah. Tümüde ha nü thsungkheaknü hodaklah; ha nü langzünü mürhimokhuk.

¹⁹ Kheakü I yu aniang; inü nü lümthiyan jihanü tüsho Thrünpuh nü lung labah: Mihtsürübo thsungkheak Thrünpuh miki zhipang, junangde neamneamrurubo nünü Thrünpuh ki lude arübah.

²⁰ Tüsho nünü arü ki thiyuzüng le yakzanbo thsangyubah tüsho arünü atsahpü limro tüsho rhimopübo huhbah.

²¹ Kheaküshe nünü mihtsürü alala lungnü athsükhuk mihtsürü–Thrünpüh trerü, thiyuro mihtsürü, yihnelune mülarü mokhitang; tüsho arübo ju chithürübo, chibo, thünimbo tüsho thürübo kurungkheak yakzanshuhrübo thsüshang.

²² Tüsho arünü kim alala ching mihtsürübo mahkhapshang. Junangde lümkhi ato arünü nü kilim hande arübah, tüshe lümkhi anini a arü küdah thsüde akhapbah. Junangde ha nü thsungkheaknü athülihbe labah, tümüde arünü nü lung hahmülang hanrungbah.

²³ Nünü ha rhimosho, tüsho Thrünpuhnü nü ki thiyukhüm jihsho, nü mükeaksah, tüsho harü mihtsürü alala lümkhi mülübah thüyam lim yübah.”

²⁴ Jumonü Mosanü akü yu ania lu tüsho apinü athakhi alala rhimo.

²⁵ Mosanü Israel alala lungnü athsükhuk mihtsürü mokhit tüsho mihtsürü chithürübo, chibo, thünimbo tüsho thürü kurung yakzanshuhrübo thsüshih.

²⁶ Junangde arünü kim alala ching mihtsürübo mahkhap; lümkhi achakbo arünü Mosa kilim hande arü, tüshe lümkhi anini a arü küdah thsüde khap.

²⁷ Judüki Mosanü akü ju wulungshih, tüsho api nihbuh lomi lim limro ching yü.