ABEKHIT 14 - AMÜSÜH HÜM CL Bible (BSI)

Amürüm Keto Hokhi

¹ Kheakü Atungpuhnü Mosa ki tha,

² “Israelrü ki Pi-hahiroth müngüh Migdol tüsho Keto dükeak Baal-zephon mikhuh binkheampü thaang.

³ Tümüde Pharaonü Israelrü dünkheak thabah, ‘Arü alominü yingyingshihdo; sunglonü arü lüpdodo.’

⁴ Judüki inü Pharao mulong müküpshihbah apinü nüsa müshambah; Pharao tüsho api bonungrü hode I müretahbah, junangde Ijiprünü I Atungpuh de amükheahbah.” Tüsho Israelrünü jude rhimo.

⁵ Küyimki mihtsürübo tsokhi kiulongthsüpuh ki thakhea, Pharao tüsho api yamlarübo lümkhi mihtsürübo kilim müthri tüsho tha, “Israel isa tankihkhi chingnü atsoshihkhi ha isanü tümü rhimokhea?”

⁶ Jumonü api yo khora-lolungbe tüsho api bonungrü bea lu,

⁷ tüsho amokhitkhi khora-lolungbe 600 tüsho arü alala kurungkheak atorübo bede püpü Ijip khora-lolungbebo alala lu.

⁸ Atungpuhnü Ijip kiulongthsüpuh Pharao mulong müküpshih tüsho mulong tode ayürü Israelrü müsham.

⁹ Ijiprü alala, Pharao khorabo le khora-lolungbe, tüsho khoraberü le api bonungrü alalanü arü Pi-hahiroth ki keto ching, Baalzephon müngüh binkheamchoki müshamde yünü yanphuh.

¹⁰ Küyimki Pharao phünide ayükhea, Israelrünü zünga kheah, tüsho Ijiprü arü dunglim müshamde alakheah. Jumonü arünü khide tre, tüsho Israelrünü Atungpuh ki zhi.

¹¹ Judüki arünü Mosa ki tha, “Ijip ching kiuyuk mülakhinü isa sunglo ching sheshihpü nünü bede arükhea de? Tümüde nünü isa Ijip chingnü bekhitkhea?

¹² Isanü Ijip ching ha yu nü ki thakhi yung de, ‘Isa zangrü zojang, junangde isanü Ijiprü tankihbah?’ Tümüde isa sunglo ching shepü düna Ijiprü tankihkhi atsübe ah.”

¹³ Tüsho Mosanü mihtsürübo ki tha, “Dütre. Düngde zhipang, tüsho Atungpuhnü nüsa khümkhitpü khihni rhimopü lakhi kheahang. Tümüde nüsanü khihni ngükhi Ijiprübo lünnü müngülo.

¹⁴ Atungpuhnü nüsa thsungkheak keochihbah, tüsho nüsa zhikde laang.”

¹⁵ Tüsho Atungpuhnü Mosa ki tha, “Tümüde nüsanü I ki zhicho? Israelrü ki mikhuh yüpü thaang.

¹⁶ Tüshe nü tso shuhkihang, tüsho keto kumung nü khah chungkihang tüsho ju azüshang, junangde Israelrünü akung lo kheaknü kero phulung hobah.

¹⁷ Tüsho inü Ijiprü mulong müküpshihbah, junangde arünü arü dunglim yüzahbah, tüsho Pharao le api bonungrü, api khora-lolungbebo, tüsho api khoraberü hode I müretahbah.

¹⁸ Küyimki inü Pharao, api khora-lolungbebo, tüsho api khoraberü kurungkheak müretah ngübanü Ijiprünü I Atungpuh de amükheahbah.”

¹⁹ Tüsho Israel bonungrü müngüh yükhi Thrünpuh yunirünü rholobah arü dunglim yü; tüsho amo dungto arü mikhuhnü yübah arü dunglim zhip.

²⁰ Junangde Ijip bonungrü le Israel bonungrü dükeak arü. Hanangde amo lakhinü khülang lim amiting la, tüsho püpü lim azhing ching ayin jih, junangde tsüngre amuyung sheshe phüniachihde marü.

²¹ Judüki Mosanü keto kumung akhah chungkih; tüsho Atungpuhnü aniakhiuklim amüküp pungnü tsüngre amuyung yünlode tsoshih, tüsho keto ju alo akung kamshih, tüsho kebo ju azüabah.

²² Jumonü Israelrünü kero phulung alo kheak yüzah, tüsho kebo ju arü khah tsülim tüsho huzulim rhü nangde alakheah.

²³ Ijiprübonü müshamde yü tüsho arü dunglim Pharao khorabo, api khora-lolungbebo, tüsho api khoraberü alala kero phulung yüzahabah.

²⁴ Ayinkhipü müngüh Atungpuhnü mo dungto tüsho amo chingnü Ijip bonungrü kheak abinkhia kheah tüsho arübo yingyingde kamshih.

²⁵ Tüsho apinü arü khora-lolungbe jingbo wukhiukshih, junangde arünü abepü küpkhukde kam; tüsho Ijiprünü tha, “Israel mikinü isa tsoanü, tümüde Atungpuhnü Ijiprü azhihde arü thsungkheak keochihjihchoh.”

²⁶ Judüki Atungpuhnü Mosa ki tha, “Nü khah keto kumung chungkihang, junangde Ijiprü, arü khora-lolungbebo tüsho khoraberübo kheak kebo bukkihlobah.”

²⁷ Mosanü keto kumung akhah chungkih, tüsho küyimki ayinkhikhea, keto ju milode kam. Ijiprünü ke chingnü atsokhitpü mürang, tüshe Atungpuhnü arübo keto ching jipyuka bah.

²⁸ Judüki kebo alodarübah khora-lolungbebo, khoraberübo, tüsho arü dunglim keto ching arükhi Pharao bonungrü alala zündo.

²⁹ Tüshe Israelrü a kero phulung ching alo akung kheaknü tsah, tüsho kebo ju arü khah tsülim tüsho huzulim rhü nangde alakheah.

³⁰ Jumonü Atungpuhnü ju nimung Ijiprü khah chingnü Israel khümkhit, tüsho Ijiprübo keyean shea lakhi Israelnü ngü.

³¹ Hanangde Atungpuhnü Ijip ching ato rhimokhi Israelnü ngü; jumonü mihtsürübonü Atungpuh tre tüsho Atungpuh le api yamlarü Mosa kheak kin.